ଅନୁଗୋଳ ଅଫିସ୍, ୧୦।୨: ଅନୁଗୋଳ ଜିଲାରେ ସରକାରଙ୍କ ‘ଖୁସି’ ଯୋଜନା ଦିଗହରା ହୋଇଯାଇଥିବା ନେଇ ଗତ ୮ ତାରିଖ ‘ଧରିତ୍ରୀ’ରେ ରିପୋର୍ଟ ପ୍ରକାଶ ପାଇବା ପରେ ଜିଲା ପ୍ରଶାସନ ପକ୍ଷରୁ ଏ ନେଇ ତନାଘନା ଆରମ୍ଭ ହୋଇଛି। ଘଟଣା ସମ୍ପର୍କରେ ଜିଲାପାଳ ମନୋଜ କୁମାର ମହାନ୍ତି ଜିଲା ମୁଖ୍ୟ ଚିକିତ୍ସାଧିକାରୀ (ସିଡିଏମ୍ଓ)ଙ୍କୁ ପଚାରି ବୁଝିବା ସହ ମେଡିକାଲ ପରିସରରେ କିପରି ଓ କେଉଁ ପରିସ୍ଥିତିରେ ହଜାର ହଜାର ସାନିଟାରୀ ନାପକିନ ପକାଇ ନଷ୍ଟ କରିଦିଆଗଲା ତାହା ଜାଣିବାକୁ ଘଟଣାସ୍ଥଳ ପରିଦର୍ଶନ କରିବେ ବୋଲି ସୂଚନା ଦେଇଛନ୍ତି। ତେବେ ନଷ୍ଟ ହୋଇଥିବା ସାନିଟାରି ନାପକିନ୍ ଖୁସି ଯୋଜନାର ନୁହେଁ ବୋଲି ସିଡିଏମ୍ଓ ସଫେଇ ଦେବା ପରେ ଏତେ ସଂଖ୍ୟକ ନାପକିନ କେଉଁଠୁ ଆସିଲା ତାହାକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। ଅନୁଗୋଳର ଅମିତ୍ ମୋଦି ନାମକ ଜଣେ ଯୁବକ ମୁଖ୍ୟମନ୍ତ୍ରୀ ଓ ସ୍ବାସ୍ଥ୍ୟମନ୍ତ୍ରୀଙ୍କୁ ଏ ନେଇ ଟୁଇଟ୍ କରିବାପରେ ଜିଲା ମୁଖ୍ୟ ଚିକିତ୍ସାଳୟ କର୍ତ୍ତୃପକ୍ଷଙ୍କ ଅଡ଼ୁଆ ଆହୁରି ବଢ଼ିଯାଇଛି।
ପ୍ରକାଶ ଯେ, ଜିଲା ମୁଖ୍ୟ ଚିକିତ୍ସାଳୟରେ ଜିଲା ଟ୍ରକ୍ ମାଲିକ ସଂଘ ଦ୍ୱାରା ନିର୍ମିତ ସେବା ଭବନର ଠିକ୍ ପଛ ପାର୍ଶ୍ୱ ଘରର ଖୋଲା ଅଗଣାରେ ହଜାର ହଜାର ସାନିଟାରି ନାପ୍କିନ୍ ପଡ଼ିରହି ନଷ୍ଟ ହୋଇଯାଇଛି। ଏ ନେଇ ଖବର ପ୍ରକାଶନ ପରେ ଜିଲାପାଳ ସିଡିଏମ୍ଓ ଅମରେନ୍ଦ୍ର ନାଥ ମହାନ୍ତିଙ୍କୁ ଘଟଣା ସମ୍ପର୍କରେ ପଚାରିଥିଲେ। କିନ୍ତୁ ସିଡିଏମ୍ଓ ଜିଲାରେ ଖୁସି ଯୋଜନା ଠିକ୍ ଠାକ୍ ଚାଲିଥିବା ଜିଲାପାଳଙ୍କୁ ସଫେଇ ଦେଇଥିଲେ। ଏପରି କି ପଡ଼ିଥିବା ନାପକିନ ମେଡିକାଲକୁ ଆସୁଥିବା ନାପ୍କିନ୍ ହୋଇଥାଇପାରେ ବୋଲି ଜିଲାପାଳଙ୍କୁ ସଫେଇ ଦେଇଥିଲେ। ଘଟଣାରେ ତାଳମେଳ ରହୁ ନ ଥିବାରୁ ଏ ନେଇ ଅବଗତ ହେବାକୁ ନିଜେ ଜିଲାପାଳ ଘଟଣାସ୍ଥଳକୁ ଯିବେ ବୋଲି କହିଛନ୍ତି। ଏ ନେଇ ସିଡିଏମ୍ଓ ଅମରେନ୍ଦ୍ରନାଥ ମହାନ୍ତିଙ୍କ ମୋବାଇଲ ନଂ ୯୪୩୯୯୮୧୩୩୧କୁ ଯୋଗାଯୋଗ କରାଯାଇଥିଲେ ମଧ୍ୟ ମତାମତ ମିଳିପାରି ନାହିଁ।