ଭଞ୍ଜନଗର,୨।୧୦(ଡି.ଏନ.ଏ.): ଭଞ୍ଜନଗର ଅଞ୍ଚଳରେ ବୁଧବାର ଅପରାହ୍ନ ୪ଟାରେ ଘଡ଼ଘଡ଼ି ସହ ପ୍ରବଳ ବର୍ଷା ହୋଇଥିଲା। ଏହାର ପ୍ରଭାବରେ ବିଶେଷ ଭାବେ ସାଉଥ୍କୋର କ୍ଷତି ହୋଇଛି। ଘଡ଼ଘଡ଼ି ଯୋଗୁ କଣ୍ଟେଇପଲ୍ଲୀ ଗ୍ରୀଡ଼ରୁ ଭଞ୍ଜନଗର ଆସିଥିବା ୩୩ କେଭି ଲାଇନର ଏକାଧିକ ଇନ୍ସୁଲେଟର ଫୁଟିଯାଇଛି। ଫଳରେ ୪ଟାରୁ ଭଞ୍ଜନଗର ଅଞ୍ଚଳରେ ବିଦ୍ୟୁତ୍ ସେବା ବ୍ୟାହତ ହୋଇଛି। ଲଗାଣ ବର୍ଷା ଯୋଗୁ ଲୋକେ ଅସୁବିଧାର ସମ୍ମୁଖିନ ହୋଇଛନ୍ତି। ସାଉଥ୍କୋ କର୍ମଚାରୀ ବିଦ୍ୟୁତ୍ ସେବାକୁ ସ୍ବାଭାବିକ କରିବାକୁ ଚେଷ୍ଟା ଚଳାଇଛନ୍ତି। ରାତି ୭ଟା ସୁଦ୍ଧା ବିଦ୍ୟୁତ୍ ସେବା ସ୍ବାଭାବିକ ହୋଇପାରିନାହିଁ। ଏନେଇ ସାଉଥ୍କୋ ସହକାରୀ ନିର୍ବାହୀଯନ୍ତ୍ରୀ ହୃଦୟ ବଲ୍ଲବ ପ୍ରଧାନଙ୍କ ସହ ଯୋଗାଯୋଗ କରିବାରୁ ସେ କହିଛନ୍ତି ଯେ, ଘଡ଼ଘଡ଼ି ମାରିବା ଯୋଗୁ ଏହି ସମସ୍ୟା ଉପୁଜିଛି। ରାତି ୮ଟା ସୁଦ୍ଧା ବିଦ୍ୟୁତ୍ ସେବା ସ୍ବାଭାବିକ କରିବା ପାଇଁ ଚେଷ୍ଟା ଚାଲିଛି। ଅପରପକ୍ଷେ କଣ୍ଟେଇପଲ୍ଲୀ ଗ୍ରୀଡ଼ରୁ ଭଞ୍ଜନଗର ସବ୍ ଷ୍ଟେସନକୁ ୮ କିମି ଦୁରତ୍ୱ ହୋଇଥିବାବେଳେ ଗୋଟିଏ ହିଁ ୩୩ କେଭି ଲାଇନ ଅଛି। ଉକ୍ତ ଲାଇନରେ ତ୍ରୁଟି ହେଲେ ଲୋକେ ଘଣ୍ଟାଘଣ୍ଟା ଧରି ବିଦ୍ୟୁତ୍ ସେବାରୁ ବଞ୍ଚତ୍ତ ହେଉଛନ୍ତି। ବିଗତ ୨ ବର୍ଷ ହେବ ରାସ୍ତା ଉପରେ ୩୩ କେଭି ନୂଆ ଲାଇନ କାମ ଚାଲିଛି। ବିଭିନ୍ନ କାରଣ ଯୋଗୁ ତାହା ମନ୍ଥର ଗତିରେ ଚାଲିଛି। ଉକ୍ତ କାମ ପୂର୍ଣ୍ଣାଙ୍ଗ ହେଲେ ସହରର ବିଦ୍ୟୁତ୍ ସମସ୍ୟା ଦୂର ହେବ। ତେଣୁ ଦ୍ୱିତୀୟ ଲାଇନ କାମ ତୁରନ୍ତ ସାରିବାକୁ ଦାବି ହୋଇଛି।