ଭୋପାଳ, ୬ା୩(ପି.ଟି.): ମଧ୍ୟପ୍ରଦେଶର କମଲନାଥ ସରକାରଙ୍କ ସଙ୍କଟ ଘନେଇବାରେ ଲାଗିଛି। ଗୁରୁବାର କଂଗ୍ରେସ ବିଧାୟକ ହରଦୀପ ସିଂ ଡଙ୍ଗ୍ ନିଜର ଇସ୍ତଫାପତ୍ର ବାଚସ୍ପତି ଏନ୍.ପି. ପ୍ରଜାପତିଙ୍କ ନିକଟକୁ ପଠାଇଛନ୍ତି। ଦ୍ୱିତୀୟ ଥର ସେ କଂଗ୍ରେସ ବିଧାୟକ ଭାବେ ନିର୍ବାଚିତ ହୋଇଥିଲେ ବି ଦଳ ତାଙ୍କୁ କୋଣଠେସା କରିଆସୁଛି ବୋଲି ସେ ପତ୍ର ମାଧ୍ୟମରେ ଦର୍ଶାଇଛନ୍ତି। ସରକାର ଦୁର୍ନୀତିରେ ବୁଡ଼ି ରହିଥିବାବେଳେ କୌଣସି ମନ୍ତ୍ରୀ କାମ କରିବାକୁ ଆଗ୍ରହୀ ନ ଥିବା ସେ ପତ୍ରରେ ଉଲ୍ଲେଖ କରିଛନ୍ତି। ମଙ୍ଗଳବାର ଭାଜପା ୧୦ ବିଧାୟକଙ୍କୁ ଅପହରଣ କରି ନେଇଥିବା ଅଭିଯୋଗ କରାଯାଇଥିବା ବେଳେ ହରଦୀପ ସେମାନଙ୍କ ମଧ୍ୟରୁ ଅନ୍ୟତମ। ଦିଲ୍ଲୀ ନିକଟସ୍ଥ ଗୁରଗାଓଁସ୍ଥିତ ହୋଟେଲରୁ ୬ ବିଧାୟକଙ୍କୁ କଂଗ୍ରେସ ଫେରାଇ ଆଣିବାରେ ସଫଳ ହୋଇଥିବା ବେଳେ ଭାଜପା କମଲନାଥ ସରକାରକୁ ଭାଙ୍ଗିବାକୁ ପ୍ରୟାସ କରୁଥିବା ଅଭିଯୋଗ କରାଯାଇଛି। ଏବେ ବି ବିଧାୟକ ରଘୁରାଜ କଂସନା, ବିସାହୁଲାଲ୍ ସିଂ ଓ ସ୍ବାଧୀନ ବିଧାୟକ ଶେରା ଭୈୟା ନିଖୋଜ ଅଛନ୍ତି। ୧୪ ବିଧାୟକଙ୍କୁ କରାୟତ କରିବା ଲାଗି ଭାଜପା ଘୋଡ଼ାବେପାର ଆରମ୍ଭ କରିଥିବା କଂଗ୍ରେସ ନେତା ରଣଦୀପ ସୁର୍ଜଓ୍ବୋଲା ଅଭିଯୋଗ କରିଥିବାବେଳେ ଭାଜପା ପକ୍ଷରୁ ଏହାକୁ ଖଣ୍ଡନ କରାଯାଇଛି। କଂଗ୍ରେସ ଉପରେ ଖପ୍ପା ହୋଇ ବିଧାୟକମାନେ ଦଳ ଛାଡ଼ୁଥିବା ଭାଜପା ନେତା ନରୋତ୍ତମ ମିଶ୍ର ପ୍ରକାଶ କରିଛନ୍ତି। ପ୍ରକାଶ ଯେ, ମଧ୍ୟପ୍ରଦେଶରେ ମୋଟ ୨୩୦ ଆସନ ମଧ୍ୟରୁ କଂଗ୍ରେସକୁ ୧୧୪, ଭାଜପାକୁ ୧୦୭ ଆସନ ମିଳିଥିଲା। ବିଏସ୍ପି, ଏସ୍ପି ଓ ସ୍ବାଧୀନ ବିଧାୟକଙ୍କ ସମର୍ଥନରେ କଂଗ୍ରେସ ସରକାର ଗଠନ କରିଥିଲା। ଅନ୍ୟପକ୍ଷରେ ବରିଷ୍ଠ କଂଗ୍ରେସ ନେତା ଦିଗ୍ବିଜୟ ସିଂ ଘୋଡ଼ାବେପାର ଲାଗି ପୂର୍ବତନ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନଙ୍କ ସମେତ ଭାଜପା ନେତା ନରୋତ୍ତମ ମିଶ୍ର, ସଞ୍ଜୟ ପାଠକ, ବିଶ୍ୱାସ ସାରଙ୍ଗ, ଭୁପେନ୍ଦ୍ର ସିଂଙ୍କୁ ଘୋଡ଼ାବେପାର ପାଇଁ ଦାୟୀ କରିଛନ୍ତି।