ବୁଗୁଡ଼ା,୧୭ା୧୧(ଡି.ଏନ.ଏ.)- କେ.ନୂଆଗାଁ ଥାନା ଦିଗବାରିଣୀ ପାହାଡ଼ ନିକଟସ୍ଥ କେରାଣ୍ଡିମାଳ ଜଙ୍ଗଲରୁ ଶୁକ୍ରବାର ପୋଲିସ ଯଜ୍ଞସେନ ଜେନା (୧୫)ଙ୍କ କଙ୍କାଳ ଉଦ୍ଧାର କରିଥିଲା। ନଂ. ୨୬୫/୧୯ରେ ମାମଲା ରୁଜୁ କରି ବୁଗୁଡ଼ା ପୋଲିସ ଜରଡ଼ା ଥାନା ହରଡ଼ମରାର କୃଷ୍ଣଚନ୍ଦ୍ର ଗୌଡ଼ଙ୍କୁ ଅଟକ ରଖିଥିଲା। ଶନିବାର ତାଙ୍କୁ ଗିରଫ କରାଯାଇଛି। କୃଷ୍ଣ ଓ ତାଙ୍କର ଜଣେ ସାଙ୍ଗ ମିଶି ଯଜ୍ଞସେନଙ୍କୁ ପଥରରେ ଛେଚି ହତ୍ୟା କରି ଜଙ୍ଗଲରେ ଫିଙ୍ଗି ଦେଇଥିବା ପୋଲିସକୁ କହିଛନ୍ତି। ଯଜ୍ଞସେନଙ୍କ ଘରକୁ କୃଷ୍ଣଚନ୍ଦ୍ର ଯିବାଆସିବା କରୁଥିଲେ। ଏହାକୁ ସେ ବିରୋଧ କରିବାରୁ ଏହି ହତ୍ୟାକାଣ୍ଡ ଘଟିଥିବା ପୋଲିସ କହିଛି। ଯେ, ଜରଡ଼ା ଥାନା ହରଡ଼ମରାରର ପରମେଶ୍ୱର ଜେନା ବୁଗୁଡ଼ା ଥାନା ଝୋଲରୀର ଅଞ୍ଜଳିଙ୍କୁ ବିବାହ କରି ସେଠାରେ ରହୁଥିଲେ। ୨ବର୍ଷ ପୂର୍ବେ କୃଷ୍ଣଚନ୍ଦ୍ର ଝୋଲରୀ ଆସି ହିଟାଚି ଡ୍ରାଇଭର ଭାବେ କାମ କରୁଥିଲେ। ଏହି ସମୟରେ ପରମେଶ୍ୱରଙ୍କ ବଡ଼ପୁଅ ବାଦଲ କୃଷ୍ଣଙ୍କର ଗାଡ଼ିର ହେଲପର ରୂପେ କାମ କରି ଅନ୍ୟତ୍ର ଯାଉଥିଲେ। ଉଭୟଙ୍କ ପରିବାର ସହ ଭଲ ସମ୍ପର୍କ ଥିଲା। ଗତ ଅଗଷ୍ଟ ୨୯ରେ କୃଷ୍ଣଚନ୍ଦ୍ର ପରମେଶ୍ୱରଙ୍କ ଘରେ ଆସି ୩ରୁ୪ ଦିନ ରହିଥିଲେ। ପରେ ସେପ୍ଟେମ୍ବର ୨ରେ ଯଜ୍ଞସେନଙ୍କୁ ବଡ଼ଭାଇ ବାଦଲ ପାଖରେ ଛାଡ଼ିଦେବି ବୋଲି ନେଇ ଯାଇଥିଲେ। କିଛିଦିନ ପର୍ଯ୍ୟନ୍ତ ଯଜ୍ଞସେନ ନ ଆସିବାରୁ ମା’ ପୁଅ ବିଷୟରେ କୃଷ୍ଣଙ୍କୁ ପଚାରିଥିଲେ। କିନ୍ତୁ ସେ ସେଠାରେ ଠିକ୍ ଅଛି ବୋଲି କୃଷ୍ଣଚନ୍ଦ୍ର କଥା ବୁଲାଇଦେଉଥିଲେ। ପରେ ୪୦ ହଜାର ଟଙ୍କା ଦେଇ ପୁଅକୁ ନେଇ ଯାଅ ବୋଲି କୃଷ୍ଣ କହିବାରୁ ପରମେଶ୍ୱର ଟଙ୍କା ଧରି ଯାଇଥିଲେ ମଧ୍ୟ ପୁଅକୁ ପାଇ ନ ଥିଲେ। ମା’ ଅଞ୍ଜଳି ଗୁରୁବାର ଥାନାରେ କୃଷ୍ଣଚନ୍ଦ୍ର ବିରୋଧରେ ଅଭିଯୋଗ କରିଥିଲେ। ବୁଗୁଡ଼ା ଆଇଆଇସି ସୀତାଂଶୁ ଶେଖର ମାନ୍ଧାତା ସମେତ କେ.ନୂଆଗାଁ ଆଇଆଇସି କୃଷ୍ଣଚନ୍ଦ୍ରଙ୍କୁ ଧରି କେରାଣ୍ଡିମାଳ ଜଙ୍ଗଲକୁ ଯାଇ ଯଜ୍ଞସେନଙ୍କ କଙ୍କାଳ ଉଦ୍ଧାର କରିଥିଲେ। କୃଷ୍ଣଙ୍କୁ ପଚାରିବାରୁ ସେ ଓ ତାଙ୍କ ସାଙ୍ଗ ମିଶି ଗତ ସେପ୍ଟେମ୍ବର ୫ରେ ଯଜ୍ଞସେନଙ୍କୁ ହତ୍ୟା କରିଥିବା ସ୍ବୀକାର କରିଥିଲେ। ତାଙ୍କ ସାଙ୍ଗ ଫେରାର ଅଛନ୍ତି।
