ବଇଣ୍ଡା, ୨୨ା୫(ଡି.ଏନ.ଏ.)- ଅନୁଗୋଳ ଜିଲା ଆଠମଲ୍ଲିକ ବ୍ଲକ କୁରୁମଟାପ ପଞ୍ଚାୟତ ମନ୍ଦରବାହାଳ ଗ୍ରାମରେ ଚେକଡ୍ୟାମ କେନାଲ ନିର୍ମାଣରେ ନିୟୋଜିତ ୧୭ ଜଣ ଶ୍ରମିକ ଘରକୁ ଯାଇ ନ ପାରି ସେଠାରେ ଅଟକି ରହିଛନ୍ତି। ଏଥିସହ ୨ ଦିନ ହେଲା ସେମାନେ ଓପାସରେ ଥିବା ଅଭିଯୋଗ କରି ଶୁକ୍ରବାର ପଞ୍ଚାୟତ ସମ୍ମୁଖରେ ଧାରଣା ଦେଇଛନ୍ତି।
ଅଭିଯୋଗ ମୁତାବକ, ଭୁବନେଶ୍ୱରର ଏକ ଠିକାସଂସ୍ଥା କେନ୍ଦୁଝରରୁ ୧୭ ଜଣ ମହିଳା ପୁରୁଷ ଶ୍ରମିକଙ୍କୁ ଆଣି କେନାଲ ନିର୍ମାଣ କାମରେ ନିୟୋଜିତ କରିଥିଲା। ମଙ୍ଗଳବାରଠାରୁ ସମ୍ପୃକ୍ତ ଠିକାଦାର କାମ ବନ୍ଦ କରାଇ ଦେଇଛନ୍ତି। ସେମାନଙ୍କ ମଜୁରି ୫୨ ହଜାର ହେଉଥିବାବେଳେ ସପ୍ତାହେ ତଳେ ଠିକାଦାର ମାତ୍ର ୮ ହଜାର ଟଙ୍କା ଦେଇଛନ୍ତି। ବକେୟା ମଜୁରି ପ୍ରଦାନ ନ କରିବା ସହ ରହିବା ଖାଇବାର ବ୍ୟବସ୍ଥା ନ କରି ସମ୍ପୃକ୍ତ ଠିକାଦାର ପଳାଇଛନ୍ତି। ପାଖରେ ଟଙ୍କା କିମ୍ବା ଖାଦ୍ୟ ପଦାର୍ଥ ନ ଥିବାରୁ ସେମାନେ ଉପାସ ଥିବା ଅଭିଯୋଗ କରିଛନ୍ତି। ଏ ଦିଗରେ ତୁରନ୍ତ ଜିଲା ପ୍ରଶାସନ ଦୃଷ୍ଟି ଦେବାକୁ ସେମାନେ ଦାବି କରିଛନ୍ତି।
ସରପଞ୍ଚ ସୁମନ୍ତ ବେହେରା କୁହନ୍ତି, ଶ୍ରମିକମାନଙ୍କୁ ଆଣିଥିବା ଠିକାଦାର ମଜୁରି ନ ଦେଇ କେଉଁଆଡେ ପଳାଇଛନ୍ତି। ସେମାନେ ପଞ୍ଚାୟତ କାର୍ଯ୍ୟାଳୟରେ ଅଭିଯୋଗ କରିବା ପରେ ପଞ୍ଚାୟତ ପକ୍ଷରୁ ଠାକୁରଗଡ ଥାନା ଓ ବ୍ଲକ ପ୍ରଶାସନକୁ ଅବଗତ କରାଯାଇଛି। ରାତିରେ ସେମାନଙ୍କୁ ପଞ୍ଚାୟତ ପକ୍ଷରୁ ଖାଦ୍ୟ ଯୋଗାଇ ଦିଆଯିବ। ଏ ସମ୍ପର୍କରେ ଆଠମଲ୍ଲିକ ବିଡିଓ ସଞ୍ଜୟ ଆଚାର୍ଯ୍ୟ କୁହନ୍ତି, ଶ୍ରମିକମାନେ ଘରକୁ ଯିବାର ବ୍ୟବସ୍ଥା ସମ୍ପୃକ୍ତ ଠିକାଦାର କରିବେ। ଯଦି ସେ ଏଥିରେ ଅବହେଳା କରନ୍ତି, ଶ୍ରମିକମାନେ ଥାନାରେ ଅଭିଯୋଗ କଲେ ମାମଲା ରୁଜୁ କରାଯାଇ କାର୍ଯ୍ୟାନୁଷ୍ଠାନ ନିଆଯିବ।