ଲାଞ୍ଜିଗଡ଼,୨୦।୧୨ (ଡି.ଏନ୍.ଏ.)-କଳାହାଣ୍ଡି ଜିଲା ଲାଞ୍ଜିଗଡ଼ ବ୍ଲକ କାନକୁଟ୍ରୁ ପଁଚେତ୍ ଅଧୀନ ପାଇକବୋରି ଗଁାର ମହେନ୍ଦ୍ର ମାର୍ଥା। ଭଲ ଘରଖଁଡ଼େ ଅଭାବୁ କୁଟୁମବସିଆ ଗୁଟେ ଭଂଗା ଦଦ୍ରା ମାଟି କୁରିଆରେ ପଲିଥିନ୍ ଢାପି ମୁଡ଼ ଗୁଁଜିଛନ୍। ସରକାରୀ ଯୋଜନାରେ ଘରଖଁଡ଼େ ପାଏବାର ଲାଗି ସେ ପରଶାସନିକ ଅଧ୍କାରୀମାନକୁ ଗୁହାରି କରି ନିରାଶ ହେଇଛନ୍।
ସୂଚନା ଅନ୍ସାରେ ପାଇକବୋରି ଗଁାର ମହେନ୍ଦ୍ର ମାର୍ଥାକଁର ପରିବାର କହେଲେ ମାଏକିନା ସୁକାନ୍ତି ଆର ୩ ପୁଓକେ ନେଇ ସଁସାର। ପରିବାରଟା ନିହାତି ଗରିବ୍, ଦୁଖସୁଖ କରି ଚଲୁଛନ୍। ଅଭାବ ଅନାଟନ ଲାଗି ଆଏଜ୍ତକ ସେ ଭଲ ଘରଖଁଡ଼େ ନାଇଁ କରିପାରି। ଗୁଟେ ମାଟି କୁରିଆରେ ପଲିଥିନ୍ ଢାପି କୁଟୁମବସିଆ ଖରା, ବରଷା, ଶୀତ କାକରରେ ବଡ଼ା ଗୁଲ୍ଗୁଲା ହେଇ ଜୀବନ୍ ବିତଉଛନ୍। ସରକାରୀ ଯୋଜନାରେ ଘରଖଁଡ଼େ ପାଏବାର ଲାଗି ମହେନ୍ଦ୍ର ପଁଚେତ୍ରୁ ବ୍ଲକ ଆର ଜିଲାପାଳକଁର ଅଭିଯୋଗ ଶୁନାନୀରେ ଗୁହାରି କରି ନିରାଶ ହେଇଛନ୍। ଉଲ୍ଟିଆ ଏସ୍ଇସିସି ତାଲିକାରେ ନଁା ନାଇଁଥିବାର ଲାଗି ଘର ନାଇଁ ମିଲବାର ବଲି ଅଧ୍କାରୀମାନେ କହୁଛନ୍। ଇଆଡ଼େ ମହେନ୍ଦ୍ରକଁର ମାଏକିନା ସୁକାନ୍ତି ନିଜେ କାନକୁଟ୍ରୁ ପଁଚେତ୍ ପାଇକବୋରିର ଓ୍ବାର୍ଡ ସଭ୍ୟା ଅଛନ୍। ତାକର ସୁପାରିଶରେ ଲୋକ୍ ଘର ପାଉଛନ୍। ହେଲେ ସେ ନିଜେ ଘରଖଁଡ଼େର ଲାଗି ପଁଚେତ୍ ନିର୍ବାହୀ ଅଧ୍କାରୀ ଈଶ୍ୱର ଚନ୍ଦ୍ର ସାହୁ, ସରପଁଚ୍ ସରସ୍ବତୀ ମାଝିକୁଁ ଅନେକ ଥର ଗୁହାରି କରି ନିରାଶ ହେଇଥିବାର ଅଭିଯୋଗ କରିଛନ୍। ଉଭଏ ଆମର ଭଂଗା ଦଦ୍ରା କୁରିଆ ଆର ଦୁରଦଶା ଦେଖିଛନ୍। ହେଲେ ଘର ଆଏଜ୍ ହେବା କାଏଲ୍ ହେବା କହି ମୋତେ ଭୁରତେଇ ଚାଲିଛନ୍ ବଲି ସେ ଅଭିଯୋଗ କରିଛନ୍। ବରଷା ଦିନେ ପରିବାରଟା ବଡ଼ା ଜହଗଁଜ୍ ହେଉଛନ୍। ଆଏଜ୍ ଇତାର ପିଁଢ଼ାରେ ତ କାଏଲ୍ କେନ୍ ସ୍କୁଲ ବାରନ୍ଡାରେ ଆଶ୍ରେ ନେଉଛନ୍। ଇ ଦୁଖି ଗରିବ୍ ପରିବାର ଉପରେ ଜିଲା ପରଶାସନ ଦୁରୁଷ୍ଟି ଦେଇ ଆବାସ ଯୋଜନାରେ ଘରଖଁଡ଼େ ଯୁଗେଇ ଦେବାକେ ଗଁାବାସୀ ଦାବି କରିଛନ୍। ଇ ବାବ୍ଦେ ଏବିଡିଓ ବିଭୁତି ଭୁଷଣ ଶତପଥୀକୁଁ ପଚ୍ରାଲାରୁ ପରିବାରର ସମକର ଆଧାର କର୍ଡ ଆନି ଅପଲୋଡ କଲା ଉତାରୁ ଏଇସିସି ତାଲିକାରେ ନଁା ଆଏବା ଆର ଘର ମିଲବା ବଲି ସେ କହିଛନ୍।