hand in jail
ନୟାଗଡ଼ ଅଫିସ,୨୧ା୧୦: ନୟାଗଡ଼ ଜିଲା ବିଚାର ବିଭାଗୀୟ ମାଜିଷ୍ଟ୍ରେଟ ମାନସ କୁମାର ପଣ୍ଡା ଶନିବାର ଦଶପଲ୍ଲା କ୍ୟାମ୍ପ କୋର୍ଟରେ ଏକ ଘରପୋଡ଼ି ମାମଲାର ବିଚାର କରି ଜଣେ ଯୁବକଙ୍କୁ ୮ବର୍ଷ ସଶ୍ରମ କାରାଦଣ୍ଡ ଶୁଣାଣି କରିଛନ୍ତି। ଏହାସହ ୨ ହଜାର ଟଙ୍କା ଜରିମାନା କରିଛନ୍ତି। ଯୁବକ ଜଣକ ହେଲେ ଦଶପଲ୍ଲା ଥାନା କରଡ଼ାପଦା ଗ୍ରାମର ଶଙ୍କର ନାୟକ। ମାମଲାର ବିବରଣୀରୁ ପ୍ରକାଶ ଯେ, ୧୧ ଫେବୃୟାରୀ ୨୦୧୮ ଅପରାହ୍ନ ୩ଟା ସମୟରେ ଶଙ୍କର ଏକ ଫାର୍ଶା ଧରି ଗ୍ରାମରେ ଆତଙ୍କ ସୃଷ୍ଟି କରିଥିଲେ। ଫାର୍ଶା ସାହାଯ୍ୟରେ ସେ କିଛି ଲୋକଙ୍କ ଘର ଆଗରେ ଥିବା ଖୁଣ୍ଟି ଓ ଘର ଉପରେ ପଡ଼ିଥିବା ଆଜେବେଷ୍ଟସ୍ ଭାଙ୍ଗି ଦେଇଥିଲେ। ଗ୍ରାମବାସୀ ଏହାକୁ ବିରୋଧ କରିବାରୁ ଶଙ୍କର ସେମାନଙ୍କୁ ଧମକାଇବା ସହିତ ଫାର୍ଶାରେ ଆକ୍ରମଣ କରିଥିଲେ। ପରେ ସେ ୩ରୁ ୪ଜଣଙ୍କ ଘରେ ନିଆଁ ଲଗାଇ ଦେଇଥିଲେ। ଏଥିରେ ସେମାନଙ୍କ ଘର ପୋଡ଼ି ଯିବା ସହିତ ଆସବାବପତ୍ର ନଷ୍ଟ ହୋଇଯାଇଥିଲା। ଖବର ପାଇ ଦମକଳବାହିନୀ ଘଟଣାସ୍ଥଳରେ ପହଞ୍ଚତ୍ ନିଆଁକୁ ଆୟତ୍ତ କରିଥିଲା। ଏ ନେଇ ଗୋପୀନାଥ ନାୟକ ଦଶପଲ୍ଲା ଥାନାରେ ଅଭିଯୋଗ କରିଥିଲେ। ପୋଲିସ ୨୫/୧୮ରେ ଏକ ମାମଲା ରୁଜୁ କରି ଶଙ୍କର ବିରୋଧରେ ଅଭିଯୋଗ ଫର୍ଦ୍ଦ ଦାଖଲ କରିଥିଲା। ଶନିବାର ଦଶପଲ୍ଲା କ୍ୟାମ୍ପ କୋର୍ଟରେ ସାକ୍ଷୀମାନଙ୍କ ବୟାନଙ୍କୁ ଭିତ୍ତି କରି ବିଚାର ବିଭାଗୀୟ ମାଜିଷ୍ଟ୍ରେଟ ପଣ୍ଡା ଉପରୋକ୍ତ ଦଣ୍ଡାଦେଶ ଶୁଣାଣି କରିଥିଲେ। ସରକାରୀ ଓକିଲ ଅମିୟ ପଟ୍ଟନାୟକ ମାମଲା ପରିଚାଳନା କରୁଥିଲେ।