ଆନନ୍ଦପୁର,୨୫। ୪(ସ୍ବ.ପ୍ର.)-ଘରବାହୁଡାଙ୍କ ପାଇଁ ପ୍ରତ୍ୟେକ ପଞ୍ଚାୟତ ସ୍ତରରେ ତତ୍ପରତା ପ୍ରକାଶ ପାଇଛି। ନାମ ପଞ୍ଜିକରଣ ବାଧ୍ୟତାମୂଳକ ହୋଇଥିବାରୁ ଆନନ୍ଦପୁର ବ୍ଲକ ବାଉଁଶଗଡ ପଞ୍ଚାୟତରେ ଭିଡ ପରିଲକ୍ଷିତ ହୋଇଛି। ବହୁ ସଂଖ୍ୟାରେ ଲୋକ ନିଜ ଅଞ୍ଚଳରେ କାମ ନ ପାଇ ବାହାର ରାଜ୍ୟରେ ରହି କାମଧନ୍ଦା କରି ପରିବାର ଭରଣ ପୋଷଣ କରିଆସୁଥିଲେ। କୋଭିଡ-୧୯ର କଟକଣା ପାଇଁ ବାହାର ରାଜ୍ୟରେ ରହୁଥିବା ଲୋକମାନେ ନିଜ ଘରକୁ ଫେରିବାରେ ନାନା ଅସୁବିଧାର ସମ୍ମୁଖୀନ ହେଉଛନ୍ତି। ସରକାରୀ ସ୍ତରରେ ନାମ ପଞ୍ଜିକରଣ କରିବା ପାରେ ବାହାର ରାଜ୍ୟରେ ରହୁଥିବା ଲୋକମାନେ ଘରକୁ ଫେରିବା ସହଜ ହେବ ବୋଲି ବିଜ୍ଞପ୍ତି ପ୍ରକାଶ ପାଇବା ପରେ ପରିବାରବର୍ଗଙ୍କ ମଧ୍ୟରେ ତତ୍ପରତା ପ୍ରକାଶ ପାଛି। ପଞ୍ଚାୟତ କାର୍ଯ୍ୟାଳୟରେ ସରପଞ୍ଚଙ୍କ ଦ୍ୱାରା ନାମ ପଞ୍ଜିକରଣ ବ୍ୟବସ୍ଥା କରିଥିବାରୁ ଲୋକାମାନଙ୍କ ଭିଡ ପରିଲକ୍ଷିତ ହୋଇଛି। ସୂଚନାଯୋଗ୍ୟ, ବାଉଁଶଗଡ ପଞ୍ଚାୟତରେ ୪୦୦ରୁ ଊର୍ଦ୍ଧ୍ୱ ଅଧିବାସୀ କଲିକତା, ଆନ୍ଧ୍ରପ୍ରଦେଶ, ତାମିଲନାଡୁ, କର୍ଣ୍ଣାଟକ, ବାଙ୍ଗାଲୋର ଆଦି ଅଞ୍ଚଳରେ ରହି କାମଧନ୍ଦା କରୁଛନ୍ତି। ମେ’ ୩ ତାରିଖରେ ଲକ୍ଡାଉନ୍ କଟକଣା ସରିବା ପରେ ସେମାନେ ନିଜ ଘରକୁ ଫେରିବେ। ହେଲେ ସରକାରଙ୍କ ବିଧିବ୍ୟବସ୍ଥା ଅନୁଯାୟୀ ନାମ ପଞ୍ଜିକରଣ ପରେ ସେମାନଙ୍କୁ କ୍ୱାରାଣ୍ଟାଇନ୍ ରଖିବାର ବ୍ୟବସ୍ଥା କରାଯାଇଛି। ଅନ୍ୟପଟେ ପଞ୍ଚାୟତରେ ଏକ ୫୦ ଶଯ୍ୟା ବିଶିଷ୍ଟ କ୍ୱାରାଣ୍ଟାଇନ୍ ହଲ ସରକାରୀ ଆଶ୍ରମ ବିଦ୍ୟାଳୟରେ କରାଯାଇଛି। ଏହା ବ୍ୟତୀତ ଆଉ ଏକ ୫୦ ଶଯ୍ୟା ବିଶିଷ୍ଟ କ୍ୱାରାଣ୍ଟାଇନ୍ ହଲ କରାଯିବ ବୋଲି ସରପଞ୍ଚ ଦୟାନିଧି ଘଡେଇ ପ୍ରକାଶ କରିଛନ୍ତି।