ନୂଆଦିଲ୍ଲୀ,୨୪। ୪(ପି.ଟି.): ପୂର୍ବତନ କ୍ରିକେଟର ତଥା ଭାଜପା ଏମ୍ପି ଗୌତମ ଗମ୍ଭୀର ତାଙ୍କ ଘରେ କାମ କରୁଥିବେ ଜଣେ ମହିଳାଙ୍କ ଶେଷକୃତ୍ୟ ସମ୍ପନ୍ନ କରିଛନ୍ତି। ୪୯ ବର୍ଷୟା ଏହି ମହଳାଙ୍କ ନାମ ସରସ୍ବତୀ ପାତ୍ର। ତାଙ୍କ ଓଡ଼ିଶା ଯାଜପୁର ଜିଲାରେ। ସେ ଦୀର୍ଘ ଦିନ ଧରି ଡାଇବେଟିସ୍ ଓ ହାଇ ବ୍ଲଡପ୍ରେସର ବିରୋଧରେ ସଂଗ୍ରାମ କରି ଆସୁଥିଲେ। କିଛି ଦିନ ତଳେ ତାଙ୍କୁ ସାର ଗଙ୍ଗା ରାମ ହସ୍ପିଟାଲରେ ଭର୍ତ୍ତି କରାଯାଇଥିଲା। ଚିକିତ୍ସା କରାଯାଉଥିବା ବେଳେ ସରସ୍ବତୀ ଗତ ୨୧ ତାରିଖରେ ମୃତ୍ୟୁବରଣ କରିଥିଲେ। ତେବେ ତାଙ୍କ ମୃତ ଶରୀରକୁ କୋଭିଡ-୧୯ ସଂକ୍ରମଣ ଜନିତ ଲକ୍ଡାଉନ କାରଣରୁ ଓଡ଼ିଶାରେ ଥିବା ତାଙ୍କ ପରିବାର ନିକଟକୁ ପଠାଯିବା ସମ୍ଭବ ହୋଇ ନ ଥିଲା। ଫଳରେ ଶେଷରେ ଗମ୍ଭୀର ନିଜେ ତାଙ୍କ ଅନ୍ତେଷ୍ଟିକ୍ରିୟା କରିଥିଲେ ବୋଲି ଟୁଇଟ କରି ସୂଚନା ଦେଇଛନ୍ତି।
ସରସ୍ବତୀ ମୋ ପିଲାର ଯତ୍ନ ନେଉଥିଲେ। ତେଣୁ ତାଙ୍କ ଚାକରାଣୀ ବୋଲି କୁହାଯିବା ଠିକ୍ ହେବନାହିଁ। ତାଙ୍କର ଶେଷକୃତ୍ୟ ସମ୍ପନ୍ନ କରିବା ମୋର ଦାୟିତ୍ୱ। ସେ ଆମ ଘରେ ଗତ ୬ ବର୍ଷ ଧରି କାର୍ଯ୍ୟ କରିଆସୁଥିଲେ। ସେ ଆମ ପରିବାରର ସଦସ୍ୟ ଥିଲେ ବୋଲି ଗମ୍ଭୀର କହିଛନ୍ତି। ଏହି ବଦାନ୍ୟତା ପାଇଁ କେନ୍ଦ୍ର ଷ୍ଟିଲ୍ ଓ ପୋଟ୍ରୋଲିୟମ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଗମ୍ଭୀରଙ୍କୁ ବେଶ୍ ପ୍ରଶଂସା କରିଛନ୍ତି। ଗମ୍ଭୀରଙ୍କ ଏହି କାର୍ଯ୍ୟ ମାନବିକତାକୁ ସୂଚାଉଛି। ଦେଶରେ ବହୁ ଗରିବ ଲୋକ ଜୀବୀକା ପାଇଁ ଘର ଛାଡି ବାହାରେ କାର୍ଯ୍ୟକରୁଛନ୍ତି। ତେଣୁ ଗମ୍ଭୀରଙ୍କ ଏ ଭଳି ବଦାନ୍ୟତା ସାରା ମାନବ ସମାଜ ପାଇଁ ଉଦାହରଣ ସୃଷ୍ଟି କରିଛି ବୋଲି ଧର୍ମେନ୍ଦ୍ର କହିଛନ୍ତି।
ଉଲ୍ଲେଖଥାଉ କି, ସରସ୍ବତୀ ୨୦୧୩ରେ ଜଣେ ପ୍ରତିନିଧି ଭାବେ ଏକ ସେମିନାରରେ ଅଂଶଗ୍ରହଣ କରିବା ପାଇଁ ଦିଲ୍ଲୀ ଯାଇଥିଲେ ବୋଲି ତାଙ୍କ ଭାଇ ପ୍ରଫୁଲ୍ଲ ପାତ୍ର କହିଛନ୍ତି। ସେଠାରେ ସେ ଜଣେ ଓଡ଼ିଆ ମହିଳାଙ୍କୁ ଭେଟିଥିଲେ। ସମ୍ପୃକ୍ତ ମହିଳା ଜଣକ ଗମ୍ଭୀରଙ୍କୁ ଜାଣିଥିଲେ। ସେ ମୋ ଭଉଣୀଙ୍କୁ ଗମ୍ଭୀରଙ୍କ ଘରକୁ ନେଇଥିଲେ। ସେଠାରେ ଗମ୍ଭୀରଙ୍କ ଘରେ ସରସ୍ବତୀ ଘରୋଇ କାର୍ଯ୍ୟରେ ସାହଯ୍ୟ କରୁଥିଲେ ବୋଲି ପ୍ରଫୁଲ୍ଲ କହିଛନ୍ତି। ବିବାହର କିଛି ବର୍ଷ ପରେ ସ୍ବାମୀଙ୍କ ଠାରୁ ଅଲଗା ହେବା ପରେ ସରସ୍ବତୀ ଯାଜପୁରର କୁସୁନପୁରରେ ଥିବା ତାଙ୍କ ବାପାଙ୍କ ଘରେ ରହୁଥିଲେ। ସ୍ବରସ୍ବତୀ ମଧ୍ୟ ଯାଜପୁରରେ ମାନବିକ ଅଧିକାର ପାଇଁ ସ୍ବେଚ୍ଛାକୃତ ଭାବେ କାର୍ଯ୍ୟ କରୁଥିଲେ। ୧୪ ତାରିଖରେ ସରସ୍ବତୀ ଅସୁସ୍ଥ ହୋଇପଡିବା ପରେ ଗମ୍ଭୀର ଆମ ସହ ଯୋଗାଯୋଗ କରିଥିଲେ ବୋଲି ପ୍ରଫୁଲ୍ଲ କହିଛନ୍ତି। ହସ୍ପିଟାଲରେ ତାଙ୍କୁ ଭର୍ତ୍ତି କରାଯିବା କଥା ମଧ୍ୟ ସେ କହିଛନ୍ତି। ଗମ୍ଭୀର ୨୦୧୧ ବିଶ୍ୱକପ୍ ବିଜୟୀ ଭାରତୀୟ ଦଳର ସଦସ୍ୟ ଥିଲେ। ୩୮ ବର୍ଷୀୟ ଗମ୍ଭୀର ୨୦୦୪ରୁ ୨୦୧୬ ମଧ୍ୟରେ ୫୮ଟି ଟେଷ୍ଟ, ୧୪୭ ଟି ଦିନିକିଆ ଓ ୩୭ଟି ଟି୨୦ ମ୍ୟାଚ୍ ଖେଳିଛନ୍ତି।