ଖୋର୍ଦ୍ଧା ଅଫିସ,୧୨।୯: ଖୋର୍ଦ୍ଧା ବ୍ଲକ ଓରବରସିଂ ପଞ୍ଚାୟତର ହିରିମୂଳ, ଡିହଖଳା, ଦୁର୍ଗାପୁର, ଓରବରସିଂ, ମଶାଣିଆ, ତେନ୍ତୁଳିମୂଳ, ରାୟପୁର, ବାଲିକୁଦା, ଲେଖନପୁର, କୃଷ୍ଣପୁର ଆଦି ୧୦ ଗଁ। ଓ ନରଣଗଡ ପଞ୍ଚାୟତର ଧବଳପୁର, ମାନପୁର, ଓରିମି ଓ ବଳପୁର ଆଦି ୪ ଗଁ। ରେ ବନ୍ୟା ପରିସ୍ଥିତି ଲାଗି ରହିଛି। ମୋଟରେ ୧୪ ଟି ଗଁ। ର ପ୍ରାୟ ୩୦ ହଜାର ଲୋକ ଜଳବନ୍ଦୀ ଭାବେ ଜୀବନ ବିତାଉଛନ୍ତି। ଗଁ। ଦାଣ୍ଡରେ ଅଢେଇରୁ ୪ ଫୁଟର ବନ୍ୟାଜଳ ଲହଡି ମାରୁଛି। ଘର ଭିତରକୁ ପାଣି ପଶିଲାଣି। ଗଁ। ଚାରିପଟ ଚାଷ ଜମିରେ ୩ରୁ ୮ ଫୁଟର ପାଣି ଜମି ରହିଛି। କିଛି ଗଁ।ରେ ଟ୍ୟୁବ ଯୋଗେ ଲୋକେ ରାସ୍ତା ପାରି ହେଉଛନ୍ତି। ଏଭଳିସ୍ଥଳେ ଘରେ ଚୁଲି ଜଳୁନି। ଘରେ ଶୋଇବାକୁ ଜାଗା ନାହିଁ। ଛାତ୍ରୀଛାତ୍ରଙ୍କ ପାଠପଢ଼ାରେ ଡୋରି ବନ୍ଧା ହୋଇଛି।
ଦଳେ ଚାହୁଁଛନ୍ତି, ଅନ୍ୟମାନେ ଖାଉଛନ୍ତି
ବନ୍ୟା ଅଞ୍ଚଳରେ ରିଲିଫ୍ ଯୋଗାଣ ସମୁଦ୍ରକୁ ଶଙ୍ଖେ। ବନ୍ୟାରେ ପ୍ରାୟ ୩୦ ହଜାର ଲୋକ ପ୍ରଭାବିତ ହୋଇଥିବାବେଳେ ରେଡକ୍ରସ ପକ୍ଷରୁ ୫୫୦ ପୁଡିଆ ଦିଆଯାଇଛି। ଏଥିରୁ ନରଣଗଡ ପଞ୍ଚାୟତକୁ ୧୫୦ ଓ ଓରବରସିଂ ପଞ୍ଚାୟତକୁ ୪୦୦ ପୁଡିଆ ଭାଗରେ ପଡିଛି। ଦୁଇ ପଞ୍ଚାୟତର ଲୋକ ପାଣି ଘେରରେ ରହିଥିବାବେଳେ ବୁଧବାର ଅପରାହ୍ନରେ ରୋଷେଇ ଖାଦ୍ୟ ଦିଆଯାଇଛି। ରାତିରେ ପୁଡିଆରେ କାମ ଚଳାଇ ଦିଆଯିବ। ଯେଉଁମାନେ ବାତ୍ୟା ଆଶ୍ରୟସ୍ଥଳରେ ଅଛନ୍ତି ସେମାନେ ପାଉଛନ୍ତି। ଯେଉଁ ବିପନ୍ନ ଘରେ ଅଛନ୍ତି ସେମାନଙ୍କ ପାଇଁ କିଛି ନାହିଁ। ବିପତ୍ତି କାଳରେ ବିପନ୍ନଙ୍କୁ ରିଲିଫ ଯୋଗାଇବାରେ ପ୍ରଶାସନ କାହିଁକି କୁଣ୍ଠିତ ହେଉଛି ତାହା ତଦନ୍ତ ସାପେକ୍ଷ। ଅନ୍ୟପକ୍ଷେ ବାତ୍ୟା ଫନୀରେ ଘର ଭାଙ୍ଗିଲା। ଘର ଭଙ୍ଗା ସହାୟତା ମିଳିଲା ନାହିଁ। ଯେଉଁମାନଙ୍କର ଘର ଭାଙ୍ଗିନି ସେମାନେ ସହାୟତା ପାଇଲେ। ପ୍ରତିବାଦ କରିବାରୁ ସହାୟତା ଦିଆଗଲାନି। ଅଗଷ୍ଟରେ ହୋଇଥିବା ବନ୍ୟାରେ ରନ୍ଧା ଖାଦ୍ୟ ମିଳିଲାନି। ଏବେ ବନ୍ୟାଜଳରେ ଥିଲେ ମଧ୍ୟ ରିଲିଫ ମିଳୁନି। ବନ୍ୟା ଓ ବାତ୍ୟା ବେଳେ ଆମ ଅଞ୍ଚଳରେ ରାଜନୀତି ଚାଲିଛି ବୋଲି କେତେଜଣ ବିପନ୍ନ ନଁ। ଗୋପନ ରଖି ପ୍ରକାଶ କରିଛନ୍ତି।
୫ ସ୍ଥାନରେ ୨ ଡଙ୍ଗା
ବନ୍ୟା ଅଞ୍ଚଳରେ ୫ଟି ଡଙ୍ଗାର ଆବଶ୍ୟକତା ଥିବାବେଳେ ମାତ୍ର ୨ଟି ଡଙ୍ଗା ପଡିଛି। ଧବଳପୁରରେ ଗୋଟିଏ ଡଙ୍ଗାର ଆବଶ୍ୟକତା ଥିବାବେଳେ ମାନପୁର ଓ ଓରମି ପାଇଁ ଅନ୍ୟ ଏକ ଡଙ୍ଗାର ଦରକାର ଅଛି। ତେବେ ଏହି ୩ଟି ଗଁ। ପାଇଁ ଆଦୌ ଡଙ୍ଗାର ବ୍ୟବସ୍ଥା ନାହିଁ। ତେବେ ହିରିମୂଳ ଓ ଡିହଖଳା ଗଁ। ପାଇଁ କେବଳ ୨ ଡଙ୍ଗାର ବ୍ୟବସ୍ଥା କରାଯାଇଛି।
ଉପାସରେ ଗୃହପାଳିତ ପ୍ରାଣୀ
ଧାନ ଜମି, ଗୋଚର ଜମି, ରାସ୍ତାରେ ବନ୍ୟାଜଳ ରହିଛି। ୪ଦିନ ହେଲା ଗୃହ ପାଳିତ ପ୍ରାଣୀମାନେ ଖାଇବାକୁ ପାଉନାହାନ୍ତି। ସେମାନଙ୍କ ପାଇଁ ଗୋଖାଦ୍ୟ ଆବଶ୍ୟକତା ରହିଥିବାବେଳେ ପ୍ରଶାସନ ପୂରା ଭୁଲି ଯାଇଛି। ଗୃହପାଳିତ ପ୍ରାଣୀମାନଙ୍କୁ ବାନ୍ଧି କରି ରଖିଲେ ବିପଦ। ତଥାପି ବିକଳ୍ପ ନ ଥିବାରୁ ବାନ୍ଧି କରି ରଖାଯାଇଛି।
ଓରବରସିଂ ପଞ୍ଚାୟତକୁ ଗଲେନି ବିଡିଓ
ବୁଧବାର ନରଣଗଡ ପଞ୍ଚାୟତର ବିପନ୍ନମାନେ ଜିଲାପାଳଙ୍କୁ ଅଭିଯୋଗ କରିବା ପରେ ଖୋର୍ଦ୍ଧା ବିଡିଓ ଉକ୍ତ ପଞ୍ଚାୟତ ଅଞ୍ଚଳର ପାଣି ଘେରରେ ଥିବା ଗଁ। ଗୁଡିକୁ ଯାଇ ସ୍ଥିତି ଆକଳନ କରିଛନ୍ତି। କିନ୍ତୁ ଓରବରସିଂରେ ପାଦ ନ ପଡିଥିବାରୁ ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।