ରଣପୁର,୧।୧୧(ସ୍ବ.ପ୍ର.): ନୟାଗଡ଼ ଜିଲା ରଣପୁର ବ୍ଲକ କାର୍ଯ୍ୟାଳୟ ରାସ୍ତାର ଜଣେ ବିଚାରପତିଙ୍କ ସରକାରୀ ବାସଭବନ ସମ୍ମୁଖସ୍ଥ ରାଜ କିଶୋର ଦାଶ ନାମକ ଜଣେ ବ୍ୟକ୍ତିଙ୍କ ଘରୁ ବୁଧବାର ବିିଳମ୍ବିତ ରାତିରେ ଚୋରି ହୋଇଛି। ଚୋରମାନେ ୨୫୦ ଗ୍ରାମ ସୁନା ଅଳଙ୍କାର ଓ ୪୫ ହଜାର ଟଙ୍କା ଚୋରି କରି ନେଇଛନ୍ତି। ପ୍ରାୟ ୭ଲକ୍ଷରୁ ଊର୍ଦ୍ଧ୍ୱ ଟଙ୍କାର ଅଳଙ୍କାର ଚୋରି ହୋଇଥିବା ଅଭିଯୋଗ ହୋଇଛି।
ପ୍ରକାଶ ଯେ, ଚୋରମାନେ ବୁଧବାର ରାତିରେ ରାଜକିଶୋରଙ୍କ ବାରିପଟ ଝରକାର ଗ୍ରିଲ ଭାଙ୍ଗି ଘରେ ପଶିଥିଲେ। ରାଜକିଶୋର ଓ ତାଙ୍କ ସ୍ତ୍ରୀ ଗାଁକୁ ଯାଇଥିବାବେଳେ ଘରେ ବଡପୁଅ ତଥା ଶିକ୍ଷକ ଚିତ୍ତରଞ୍ଜନ, ବୋହୂ ଓ ନାତୁଣୀ ଥିଲେ । ଚୋରମାନେ ରାଜକିଶୋରଙ୍କ ଶୋଇବା ଘରେ ପଶି ଗଡରେଜ ଆଲମିରା ଭାଙ୍ଗି ସୁନାଗହଣା ଓ ଟଙ୍କା ଲୁଟି ନେଇଥିଲେ। ପରେ ଅନ୍ୟ ଏକ ବଖରାରେ ପଶି ଚୋରି କରିଥିଲେ। ସେମାନେ ଚୋରି କରୁଥିବାବେଳେ ପୁଅ ବୋହୂ ଉଠି ଏହା ଜାଣି ପାରିଥିଲେ। ତେବେ ସେମାନଙ୍କ ଜୀବନ ପ୍ରତି ବିପଦ ଥିବାରୁ ସବୁ ଜାଣି ଚୁପ ରହି ବାହାରକୁ ଆସି ନଥିଲେ। କିନ୍ତୁ ରଣପୁର ଥାନାକୁ ଫୋନ କରି ଚୋରି ବିଷୟରେ ଜଣାଇଥିଲେ । ଘରଠାରୁ ଥାନା ପ୍ରାୟ ଦେଢ଼ କିମି ଦୂର ହୋଇଥିଲେ ମଧ୍ୟ ପୋଲିସ ଆସି ନ ଥିଲା । ପୋଲିସ ଠାରୁ ନିରାଶ ହେବା ପରେ ୬କିମି ଦୂର କଙ୍କିଆରେ ରହୁଥିବା ସାନ ଭାଇ ମନୋରଞ୍ଜନଙ୍କୁ ଜଣାଇଥିଲେ । ଖବର ପାଇ ମନୋରଞ୍ଜନ ତୁରନ୍ତ ପହଞ୍ଚତ୍ଥିଲେ । ହେଲେ ସେତେବେଳକୁ ଚୋରମାନେ ଚାଲି ଯାଇଥିଲେ । ସାନ ଭାଇ ଆସି ରାତିରେ ରଣପୁର ଥାନାରେ ପହଞ୍ଚତ୍ କବାଟ ବାଡେଇ ଥିଲେ । ହେଲେ କେହି ଥାନାର କବାଟ ଖୋଲି ନ ଥିଲେ। ସକାଳେ ଆସି ସେ ଅଭିଯୋଗ କରିଥିଲେ । ହେଲେ ପୋଲିସ ତଦନ୍ତ ପାଇଁ ବି ଗଲା ନାହିଁ । ଶେଷରେ ଜଣେ ବିଜେଡି ନେତାଙ୍କ ଚାପରେ ପୋଲିସ ତଦନ୍ତ କଲା । ନଂ.୧୩୨/୧୯ରେ ମାମଲା ରୁଜୁ କଲା । ଅପରାହ୍ନ ୫ଟାରେ ସାଇଁଣ୍ଟିଫିକ୍ ଟିମ୍ ସହ ସନ୍ଧାନୀ କୁକୁର ଆସି ଅନୁସନ୍ଧାନ କରି ଫେରିଯାଇଛି ।
