ଭୁବନେଶ୍ୱର, ୧୮ା୩(ବ୍ୟୁରୋ): ଯଥାସମ୍ଭବ କରୋନା ଭାଇରସ ସଂକ୍ରମଣ ରୋକିବା ପାଇଁ ସରକାରୀ ଓ ଘରୋଇ ବସ୍ ପାଇଁ କଟକଣା ଜାରି କରାଯାଇଛି। ସିଟ୍ଠାରୁ ଅଧିକ ଯାତ୍ରୀ ନ ନେବା ପାଇଁ ନିର୍ଦ୍ଦେଶନାମା ଜାରି କରାଯାଇଛି। ନିୟମ ଉଲ୍ଲଂଘନ ହେଲେ ବସ୍ କର୍ମଚାରୀ ଓ ମାଲିକଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ ବୋଲି ଚେତାବନୀ ଦିଆଯାଇଛି। ପୋଲିସ ଓ ପରିବହନ ବିଭାଗର ଅଧିକାରୀମାନେ ଏ ନେଇ ଯାଞ୍ଚ କରିବେ। ସେହିଭଳି ଡ୍ରାଇଭର, କଣ୍ଡକ୍ଟର ଓ ହେଲ୍ପର ମାସ୍କ ଓ ସାନିଟାଇଜର ବ୍ୟବହାର କରିବାକୁ ପରାମର୍ଶ ଦିଆଯାଇଛି। ହେଲେ ଉତ୍ତମ ସେବା ପାଇଁ ରାଜ୍ୟ ସରକାରଙ୍କ ‘ ମୋ ବସ୍’ରେ ଏହି କଟକଣା ପାଳନ ହେଉ ନ ଥିବା ଦେଖିବାକୁ ମିଳିଛି। ଏହାକୁ ପରିଚାଳନା କରୁଥିବା କ୍ୟାପିଟାଲ ରିଜିଅନ୍ ଟ୍ରାନ୍ସପୋର୍ଟ ଲିମିଟେଡ୍ (କ୍ରୁଟ୍) ଏଥିପ୍ରତି ଗୁରୁତ୍ୱ ଦେଉ ନ ଥିବାରୁ ଯାତ୍ରୀଙ୍କ ମନରେ ସଂକ୍ରମଣ ଭୟ ରହୁଛି। ମଙ୍ଗଳବାର ରୁଟ୍ ନଂ.୧୧ରେ ଚଳାଚଳ କରୁଥିବା ‘ମୋ ବସ୍’ (ନଂ. ଓଡି ୩୩ ଭି ୨୬୧୭)ରେ ସରକାରୀ ନିର୍ଦ୍ଦେଶନାମାକୁ ଖୋଲାଖୋଲି ଉଲ୍ଲଂଘନ କରାଯାଇଥିବା ଦେଖାଯାଇଥିଲା। ବସ୍ ଡ୍ରାଇଭର ଓ କଣ୍ଡକ୍ଟର ବିନା ମାସ୍କରେ ରହି ଯାତ୍ରୀଙ୍କ ସଂସ୍ପର୍ଶରେ ଆସୁଥିଲେ। ତେବେ ଏହି ଅଭିଯୋଗକୁ କ୍ରୁଟ୍ର ଜେନେରାଲ ମ୍ୟାନେଜର ଦୀପ୍ତି ମହାପାତ୍ର ଅସ୍ବୀକାର କରିଛନ୍ତି। ସେ କହିଛନ୍ତି, ଅଧିକାଂଶ ସମୟରେ ମୋ ବସ୍ ଜଣେ ଜଣେ ଯାତ୍ରୀଙ୍କୁ ନେଇ ଯାତାୟାତ କରୁଛି। ଓଭର ଲୋଡିଂ କେବେ ବି ହୋଇ ନ ଥିବ। କିନ୍ତୁ ସମସ୍ତ କର୍ମଚାରୀଙ୍କ ପାଇଁ ମାସ୍କ ଉପଲବ୍ଧ ନାହିଁ। ସ୍ବାସ୍ଥ୍ୟ ବିଭାଗର ପ୍ରମୁଖ ସଚିବଙ୍କୁ ମାସ୍କ ଯୋଗାଇ ଦେବା ପାଇଁ କ୍ରୁଟ୍ ପକ୍ଷରୁ ଅବଗତ କରାଯାଇଥିଲେ ମଧ୍ୟ ଏଯାଏ ମିଳିପାରିନି। ତେବେ କରେନାକୁ ନେଇ ‘ମୋ ବସ’ରେ ଲୋକଙ୍କୁ ସଚେତନ କରାଯାଉଛି। ନିୟମିତ ଭାବେ ହାତ ଧୋଇବା ସହିତ ସାନିଟାଇଜର୍ ଲିକ୍ୱିଡ୍ ବ୍ୟବହାର କରିବା ଉପରେ ଗୁରୁତ୍ୱ ଦେବାକୁ ପରାମର୍ଶ ଦିଆଯାଉଛି।
ସେହିପରି ସହରରେ ଚଳାଚଳ କରୁଥିବା ଘରୋଇ ସିଟି ବସ୍ଗୁଡିକ ମଧ୍ୟ ନିର୍ଦ୍ଦେଶକୁ ଉଲ୍ଲଂଘନ କରୁଥିଲେ ମଧ୍ୟ ଏଯାଏ କୌଣସି ପଦକ୍ଷେପ ଗ୍ରହଣ କରାଯାଇ ନ ଥିବା ଜଣାପଡିଛି। ବସ୍ ମାଲିକ ଓ କର୍ମଚାରୀମାନେ ସଚେତନ ରହୁ ନ ଥିବାରୁ ସଂକ୍ରମଣ ଆଶଙ୍କା ପ୍ରକାଶ ପାଇଛି। ମୋ ବସ୍ ଭଳି ଘରୋଇ ସିଟି ବସ୍ରେ ସିଟ୍ଠାରୁ ଅଧିକ ଯାତ୍ରୀଙ୍କୁ ନିଆଯାଉଥିବା ଦେଖିବାକୁ ମିଳିଛି।
ଅଧିକ ଲୋକ ନ ହେଲେ ବେପାର କରିହେବ ନାହିଁ ବୋଲି ବସ୍ କର୍ତ୍ତୃପକ୍ଷ କହୁଛନ୍ତି। ଖୋଦ୍ ରାଜଧାନୀରେ ନିୟମ ଉଲ୍ଲଂଘନକୁ ନଜର ନ ଥିବାବେଳେ ରାଜ୍ୟର ଅନ୍ୟ ସହରରେ ସ୍ଥିତି କିପରି ଥିବ ତାହା ସହଜରେ ବାରିହୋଇପଡୁଛି। ଏପରିସ୍ଥଳେ ପରିବହନ ମନ୍ତ୍ରୀଙ୍କ ପରାମର୍ଶ ପାଣିର ଗାର ହୋଇଛି। ନିଜ ଆଡୁ ସତର୍କ ହେବୁ କିପରି ବୋଲି ଯାତ୍ରୀମାନେ ପ୍ରଶ୍ନ କରିଛନ୍ତି।