ନୂଆଦିଲ୍ଲୀ,୫।୬: ଘରୋଇ ହସ୍ପିଟାଲରେ କୋଭିଡ-୧୯ର ଚିକିତ୍ସା ପାଇଁ ଦର ନିର୍ଦ୍ଧାରଣକୁ ନେଇ କରାଯାଇଥିବା ଆବେଦନର ଶୁଣାଣି ଶୁକ୍ରବାର ସୁପ୍ରିମେକୋର୍ଟ କରିଛନ୍ତି। କୋର୍ଟ ଏ ସମ୍ପର୍କରେ କେନ୍ଦ୍ର ସରକାରଙ୍କଠାରୁ ଜବାବ ମାଗିଛନ୍ତି। ଘରୋଇ ହସ୍ପିଟାଲରେ କୋଭିଡ-୧୯ର ଚିକିତ୍ସା ପାଇଁ ଫି ଧାର୍ଯ୍ୟ କରିବାକୁ ନେଇ ଅଭିଷେକ ଗୋୟଙ୍କାଙ୍କ ଦ୍ୱାରା ଦାଖଲ କରାଯାଇଥିବା ଅଭିଯୋଗର ଶୁଣାଣି ଜଷ୍ଟିଶ ଅଶୋକ ଭୂଷଣଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ଦ୍ୱାରା କରାଯାଇଥିଲା। ଏଥିରେ କେନ୍ଦ୍ର ସରକାରଙ୍କୁ ନୋଟିସ୍ ଜାରି କରାଯାଇଛି। ଏହାସହ ସଲିସିଟର ଜେନରାଲ ତୁଷାର ମେହେଟ୍ଟାଙ୍କୁ ଏକ ସପ୍ତାହ ମଧ୍ୟରେ ସ୍ବାସ୍ଥ୍ୟ ମନ୍ତ୍ରଣାଳୟରୁ ଜବାବ ଆଣିବାକୁ କୁହାଯାଇଛି। ସେହିପରି ଆୟୁଷ୍ମାନ ଭାରତ ଯୋଜନାରେ ନିର୍ଦ୍ଧାରିତ ଦର ଅନୁଯାୟୀ ଘରୋଇ ହସ୍ପିଟାଲମାନେ କୋଭିଡ-୧୯ର ଚିକିତ୍ସା କରିବାକୁ ରାଜି କି ନା ସେ କଥା ମଧ୍ୟ କୋର୍ଟ ପ୍ରଶ୍ନ କରିଛନ୍ତି। ତେବେ ଯେଉଁ ଘରୋଇ ହସ୍ପିଟାଲ ଗୁଡିକୁ କୋଭିଡ-୧୯ ଚିକିତ୍ସା କରିବାକୁ ମାଗଣାରେ ଜମି ଯୋଗାଇ ଦିଆଯାଇଛି ସେମାନଙ୍କୁ କୋର୍ଟ ଏହି ପ୍ରଶ୍ନ କରିଛନ୍ତି।