ଭୁବନେଶ୍ୱର, ୧୨।୭(ବ୍ୟୁରୋ) : ନିଜ ଘରୁ ବାହାରୁ ଥିବା ମଳଯୁକ୍ତ ମଇଳା ଓ ପଚା ମଇଳାକୁ କୌଣସି ଡ୍ରେନ କିମ୍ବା ନଦୀକୁ ପାଇପ ଯୋଗେ ଛାଡୁଥିଲେ ଏବେ ସେଥିପାଇଁ ଦଣ୍ଡିତ ହେବାକୁ ପଡ଼ିବ। ଭୁବନେଶ୍ୱର ମହାନଗର ନିଗମ (ବିଏମ୍ସି) ପକ୍ଷରୁ ଏ ନେଇ ନିର୍ଦ୍ଦେଶନାମା ଜାରି କରାଯାଇଛି। ଓଡ଼ିଶା ମହାନଗର ନିଗମ ଆଇନ, ୨୦୦୩ର ଧାରା ୫୧୮, ୫୧୯, ୬୫୮ ଓ ୬୫୯ ଦ୍ୱାରା ଏହି ନିର୍ଦ୍ଦେଶନାମାକୁ ବିଏମ୍ସି ଜାରି କରିଛି। ଏହାକୁ ମହାନଗର ନିଗମ ମଳଯୁକ୍ତ ମଇଳା ଓ ପଚା ମଇଳା ପରିଚାଳନା ବିନିମୟ ୨୦୧୮ (ଫେକାଲ ସ୍ଲଜ୍ ଆଣ୍ଡ ସେପ୍ଟିଜ୍ ମ୍ୟାନେଜ୍ମେଣ୍ଟ ତଥା ଏଫଏସ୍ଏସ୍ଏମ୍) ଭାବେ ନାମିତ କରାଯାଇଛି। ଅନ୍ୟ ରାଜ୍ୟଗୁଡିକ ଅପେକ୍ଷା ଓଡ଼ିଶାରେ ପ୍ରଥମ ଭାବେ ଏହି ବ୍ୟବସ୍ଥାକୁ ଆରମ୍ଭ କରାଯାଇଛି। ଏବେଠାରୁ ଏହାକୁ ବିଏମ୍ସି ଅଧୀନରେ ଥିବା ଅଞ୍ଚଳରେ ଜାରି କରିବାକୁ ସ୍ଥିର ହୋଇଛି। ନିର୍ଦ୍ଦେଶନାମାରେ ଲିଖିତ ତାରିଖଠାରୁ ଏହାକୁ କାର୍ଯ୍ୟକାରୀ କରାଯିବ। ଏ ନେଇ ବାସୁଆଘାଈରେ ମଳବର୍ଜ୍ୟ ପରିଚାଳନା କରିବା ଲାଗି ବିଏମ୍ସି ପକ୍ଷରୁ ୭୫ କେଏଲଡିର ଏକ ଟ୍ରିଟ୍ମେଣ୍ଟ ପ୍ଲାଣ୍ଟ କରାଯାଇଛି।
ରାଜ୍ୟ ସରକାର ଏହି ପରିଚାଳନାରେ ସହମତି ପ୍ରକାଶ କରିବା ପରେ ଏବେ ବିଏମ୍ସି ପକ୍ଷରୁ ସମସ୍ତ ଓ୍ବାର୍ଡ ଅଫିସରଙ୍କୁ ଓ୍ବାର୍ଡରେ ସର୍ବେକ୍ଷଣ କରିବା ଲାଗି ନିର୍ଦ୍ଦେଶ ଦିଆଯାଇଛି। ଯେଉଁମାନେ ନିଜ ଘର ପରିସରରେ ମଳବର୍ଜ୍ୟ ପରିଚାଳନା କରିବା ଲାଗି ସ୍ବତନ୍ତ୍ର ଟାଙ୍କି ନ କରି ସିଧାସଳଖ ଭାବେ ଡ୍ରେନ କିମ୍ବା ନଦୀକୁ ପାଇଖାନା ପାଇପ୍ ଛାଡିଛନ୍ତି ସେମାନଙ୍କୁ ପ୍ରାଥମିକ ଭାବେ ନୋଟିସ୍ ଦିଆଯିବ। ଯଦି ସେମାନେ ଏ ନେଇ ମାସକ ମଧ୍ୟରେ କୌଣସି ପଦକ୍ଷେପ ନ ନିଅନ୍ତି ତେବେ ସେଥିପାଇଁ ଜରିମାନା ସ୍ବରୂପ ତାଙ୍କୁ ୫ ହଜାର ଟଙ୍କା ଦେବାକୁ ପଡିବ। ଯେଉଁମାନେ ପାଇଖାନାରେ ଟାଙ୍କି ରଖିନାହାନ୍ତି ସେମାନଙ୍କୁ ଟାଙ୍କି ନିର୍ମାଣ କରିବାକୁ ପଡ଼ିବ ବୋଲି ଉକ୍ତ ନିର୍ଦ୍ଦେଶନାମାରେ ଲିଖିତ ହୋଇଥିବା ବେଳେ ବିଏମ୍ସିରେ ଏ ନେଇ ଜଣାଇବା ଲାଗି କୁହାଯାଇଛି।
ଏ ନେଇ ବିଏମ୍ସି ଅତିରିକ୍ତ ଆୟୁକ୍ତ ଶ୍ରୀମନ୍ତ ମିଶ୍ର କହିଛନ୍ତି, ଓ୍ବାର୍ଡ ଅଫିସରମାନେ ସର୍ବେକ୍ଷଣ ରିପୋର୍ଟ ଦେବା ପରେ ବିଏମ୍ସି କାର୍ଯ୍ୟାନୁଷ୍ଠାନ ଗ୍ରହଣ କରିବ। ଭୁବନେଶ୍ୱରର ବିଭିନ୍ନ ସ୍ଥାନରେ ସ୍ବେରେଜ୍ ଟିଟ୍ମେଣ୍ଟ ପ୍ଲାଣ୍ଟ ଜାମ ରହିବା, ରାସ୍ତା ଉପରେ ଆବର୍ଜନା ପାଣି ଭାସିବା ନେଇ ଅଭିଯୋଗ ଆସୁଥିବାରୁ ବିଏମ୍ସି ଏହି ପଦକ୍ଷେପ ଗ୍ରହଣ କରିଛି ବୋଲି ସେ କହିଛନ୍ତି।
ସୂଚନାଯୋଗ୍ୟ, ମଳବର୍ଜ୍ୟ ପରିଚାଳନା ପାଇଁ ସ୍ବତନ୍ତ୍ର ଭାବେ ଗାଡି ଓ କର୍ମଚାରୀଙ୍କୁ ମଧ୍ୟ ତାଲିମ୍ ଦିଆଯାଇଛି। ସେମାନେ ଆବଶ୍ୟକ ଉପକରଣ ସହ ମଳବର୍ଜ୍ୟ ଟାଙ୍କିକୁ କିପରି ସାବଧାନତାର ସହ ସଫା କରିବେ ସେନେଇ ତାଙ୍କୁ ବିଏମ୍ସି ପକ୍ଷରୁ ପ୍ରଶିକ୍ଷଣ ଯୋଗାଇ ଦିଆଯିବା ସହ କାର୍ଯ୍ୟରେ ନିୟୋଜିତ କରାଯାଇଛି। ଲୋକେ ତାଙ୍କ ମଳବର୍ଜ୍ୟକୁ ଅନ୍ୟ ମଜୁରିଆମାନଙ୍କ ଦ୍ୱାରା ଅସାବଧାନତାରେ ସଫା କରିବା ଛାଡି ସାବଧାନତା ସହ ତାକୁ ନିୟୋଜିତ କର୍ମଚାରୀମାନଙ୍କ ଦ୍ୱାରା ସଫା କରି ଟ୍ରିଟ୍ମେଣ୍ଟ ପ୍ଲାଣ୍ଟକୁ ପଠାଇବାକୁ ବିଏମ୍ସି ପକ୍ଷରୁ କୁହାଯାଇଛି।