ଭୁବନ, ୧୫।୩(ଡି.ଏନ.ଏ.) – ବ୍ୟକ୍ତିଗତ ସ୍ବାର୍ଥ ପାଇଁ ପୋତିଦେଲେ ଡ୍ରେନ୍। ନର୍ଦ୍ଦମା ପାଣି ନିଷ୍କାସନ ହେବାକୁ ବାଟ ନାହିଁ। ରାସ୍ତାରେ ଅହରହ ବୋହୁଛି ଦୁର୍ଗନ୍ଧମୟ ଆବର୍ଜନା ପାଣି। ଆଉ ତାହାରି ଉପରେ ଅସୁରକ୍ଷିତ ଭାବେ ଯାତାୟାତ କରୁଛନ୍ତି ଲୋକେ। ଏପରି ଦୃଶ୍ୟ ଦେଖିବାକୁ ମିଳିଛି ଢେଙ୍କାନାଳ ଜିଲା ଭୁବନ ଏନ୍ଏସି ଅଧୀନ ୨ନଂ. ଓ୍ବାର୍ଡ ଅରବିନ୍ଦ ମାର୍ଗ ରାସ୍ତାରେ। ଏନ୍ଏସି କର୍ତ୍ତୃପକ୍ଷ ଏହାର ପ୍ରତିକାର ବ୍ୟବସ୍ଥା କରୁ ନ ଥିବାରୁ ଅଞ୍ଚଳବାସୀଙ୍କୁ ଘାରିଛି ସଂକ୍ରାମକ ରୋଗ ଚିନ୍ତା। ଏହାକୁ ନେଇ ସେମାନଙ୍କ ମଧ୍ୟରେ ସୃଷ୍ଟି ହୋଇଛି ତୀବ୍ର ଅସନ୍ତୋଷ।
ଭୁବନ ଏନ୍ଏସିର ଅନ୍ୟତମ ବ୍ୟସ୍ତବହୁଳ ରାସ୍ତା ହେଉଛି ଅରବିନ୍ଦ ମାର୍ଗ। ଏହି ପଥ ଦେଇ ଦୈନିକ ହଜାର ହଜାର ସଂଖ୍ୟାରେ ଛାତ୍ରୀଛାତ୍ର, ଜନସାଧାରଣ ଅରବିନ୍ଦ ବିଦ୍ୟାଳୟ, ବାଜି ରାଉତ କଲେଜ, ମହିଳା କଲେଜ, ବ୍ଲକ କାର୍ଯ୍ୟାଳୟ ସମେତ ବଜାରକୁ ଯାଇଥାନ୍ତି। ରାସ୍ତା କଡ଼ରେ ଘର କରିଥିବା ପରିବାରର ଆବର୍ଜନା ପାଣି ଏବଂ ଷ୍ଟାଣ୍ଡ୍ ପୋଷ୍ଟରୁ ବାହାରୁଥିବା ଉଦ୍ବୃତ୍ତ ଜଳ ଡ୍ରେନ୍ରେ ନିଷ୍କାସିତ ହେଉଥିଲା। ହେଲେ କେତେଜଣ ନ୍ୟସ୍ତସ୍ବାର୍ଥ ବ୍ୟକ୍ତି ଘର କାମ ପାଇଁ ଡ୍ରେନ୍ ପୋତି ଦେଇଛନ୍ତି। ସେହିପରି ଡ୍ରେନ୍ର କେତେକ ସ୍ଥାନ ଆବର୍ଜନାରେ ପୋତି ହୋଇଯାଇଛି। ଫଳରେ ନର୍ଦ୍ଦମା ଜଳ ନିଷ୍କାସନ ହୋଇ ନ ପାରି ରାସ୍ତା ଉପରେ ଭାସୁଛି। ଏହାର ପ୍ରତିକାର କରିବାକୁ ସାହିବାସୀ ଅନେକ ଥର ଏନ୍ଏସି କର୍ତ୍ତୃପକ୍ଷଙ୍କ ନିକଟରେ ଗୁହାରି କରିଥିଲେ ମଧ୍ୟ ସୁଫଳ ମିଳୁ ନ ଥିବା ଅଭିଯୋଗ ହେଉଛି। ଭୁବନ ସହରର ପ୍ରମୁଖ ରାସ୍ତାର ଦୁଇପାର୍ଶ୍ୱରୁ ଜବରଦଖଲ ହଟାଇ ଡ୍ରେନ୍ ନିର୍ମାଣ କରାଗଲେ ଅଞ୍ଚଳବାସୀ ଉପକୃତ ହୋଇପାରନ୍ତେ ବୋଲି ମତପ୍ରକାଶ ପାଇଛି।
ଏ ସଂକ୍ରାନ୍ତରେ ଏନ୍ଏସି କାର୍ଯ୍ୟନିର୍ବାହୀ ଅଧିକାରୀ ପ୍ରମୋଦ କୁମାର ବରାଳ କୁହନ୍ତି, ରାସ୍ତାପାର୍ଶ୍ୱରେ ଘର କରିଥିବା କେତେକ ପରିବାର ମାଟି, ବାଲି ପକାଇ ଡ୍ରେନ୍ ପୋତି ଦେଇଛନ୍ତି। ଅଞ୍ଚଳବାସୀ ସହଯୋଗ କଲେ ଡ୍ରେନ୍ ଆବର୍ଜନାମୁକ୍ତ ହୋଇପାରିବ। ସମସ୍ୟାକୁ ଗୁରୁତ୍ୱ ଦେଇ ସମାଧାନ କରାଯିବ ବୋଲି ସେ ପ୍ରତିଶ୍ରୁତି ଦେଇଛନ୍ତି।