କଣିହାଁ,୨୬।୨(ଡି.ଏନ.ଏ.) – କଣିହାଁ ବ୍ଲକ ରେଙ୍ଗାଳି ଫରେଷ୍ଟ ସେକ୍ସନ ବଜ୍ରକୋଟ ଗ୍ରାମରେ ସୋମବାର ବିଳମ୍ବିତ ରାତିରେ ହାତୀ ପଶି ବ୍ୟାପକ କ୍ଷୟକ୍ଷତି ଘଟାଇଛି। ଭୋର ୫ଟାରେ ମାୟାଧର ପ୍ରଧାନଙ୍କ ଚାଳ ଛପର ଭାଙ୍ଗି ୨ କୁଇଣ୍ଟାଲ ଗଚ୍ଛିତ ଧାନ, ଗୋ-ଖାଦ୍ୟ ଖାଇବା ସହିତ ଅନ୍ୟାନ୍ୟ ଗୃହ ଉପକରଣ ନଷ୍ଟ କରିଥିଲା। ଖବରପାଇ ବନ ବିଭାଗ ସ୍କ୍ବାଡ୍ ପହଞ୍ଚି ବାଣ ଫୁଟାଇ ହାତୀକୁ ଘଉଡାଇଥିଲେ। ସେହିପରି ବର୍ଷା ବେଳେ ଉକ୍ତ ହାତୀ ପଞ୍ଚାୟତ ନିକଟକୁ ଚାଲିଆସିଥିଲା। ସେହି ସମୟରେ ଚିତ୍ତରଞ୍ଜନ ବାରିକ ଏକ ସାଇକେଲରେ ଆସୁଥିବାବେଳେ ହାତୀ ସହିତ ମୁହାଁମୁହିଁ ହୋଇଥିଲେ। ସେ ଦୌଡ଼ି ପଳାଇଯାଇଥିଲେ ହେଁ ହାତୀ ତାଙ୍କ ସାଇକେଲକୁ ଦଳିଚକଟି ଭାଙ୍ଗି ଦେଇଥିଲା। ଏହାପରେ ସୁବର୍ଣ୍ଣପୁର ସାହିକୁ ଯାଇ ବାଡ଼ି ବଗିଚା ନଷ୍ଟ କରିଥିଲା। ଫଳରେ ସ୍ଥାନୀୟ ବାସିନ୍ଦା ଏବେ ଆତଙ୍କିତ ହୋଇପଡ଼ିଛନ୍ତି। ତୁରନ୍ତ କ୍ଷତିଗ୍ରସ୍ତଙ୍କୁ କ୍ଷତିପୂରଣ ପ୍ରଦାନ ସହିତ ହାତୀ ଘଉଡ଼ାଇବା ପାଇଁ ଜିଲା ପରିଷଦର ପୂର୍ବତନ ସଦସ୍ୟ ନୃସିଂହ ବରାଳ, ପୂର୍ବତନ ସମିତି ସଭ୍ୟ ବିଧାନ ସାହୁ ଦାବି କରିଛନ୍ତି। ଏ ନେଇ କଣିହାଁ ବନାଞ୍ଚଳ ଅଧିକାରୀ ନୀଳମଣି ଦେହୁରୀ କହିଛନ୍ତି, କ୍ଷୟକ୍ଷତିର ଭରଣା ବିଧିମତେ କରାଯିବ। ମଙ୍ଗଳବାର ହାତୀ ଘଉଡ଼ାଇବା କାର୍ଯ୍ୟରେ ୨୦ ଜଣ କର୍ମଚାରୀ ନିୟୋଜିତ ହୋଇଛନ୍ତି।
