ଭୁବନେଶ୍ୱର,୬।୩(ବ୍ୟୁରୋ): ଚାଇନାରୁ ଏବେ ସାରା ବିଶ୍ୱକୁ ବ୍ୟାପିଚାଲିଥିବା ମାରାତ୍ମକ କରୋନାକୁ ନେଇ ଏବେ ଭାଳେଣି ପଡ଼ିଛି। ଭାରତରେ ଆକ୍ରାନ୍ତଙ୍କ ସଂଖ୍ୟା ବଢ଼ି ଚାଲିଥିବାବେଳେ ଓଡ଼ିଶାରେ ମଧ୍ୟ ଏକାଧିକ ସନ୍ଦିଗ୍ଧ ରହିଛନ୍ତି। ଆଗୁଆ ସତର୍କତାମୂଳକ ପଦକ୍ଷେପ ଗ୍ରହଣ କରିଥିବା ରାଜ୍ୟ ସରକାର ଏବେ ଆହୁରି ତତ୍ପରତା ପ୍ରକାଶ କରିଛି। ରାଜ୍ୟ ସରକାର ଓ ବିଭିନ୍ନ ବିଭାଗ ପକ୍ଷରୁ ନିର୍ଦ୍ଦେଶନାମା ଜାରି କରାଯିବା ପରେ ଲୋକଙ୍କ ମନରେ ଭୟ ବଢ଼ିଯାଇଛି। ଗାଁଠୁ ସହର ଆତଙ୍କ, ଆଶଙ୍କା ଭିତରେ ଘାରି ହେଉଛନ୍ତି ଲୋକେ। ବିଶେଷକରି ସରକାରଙ୍କ ସତର୍କତା ଓ ସ୍ବାସ୍ଥ୍ୟ ବିଭାଗର ନିର୍ଦ୍ଦେଶନାମାକୁ ଗୁରୁତ୍ୱ ଦେବା ଆରମ୍ଭ କରିଛନ୍ତି ଲୋକେ। ଫଳରେ ମାସ୍କ, ସାନିଟାଇଜର ଆଦିର ଡିମାଣ୍ଡ ବଢ଼ିଛି। ଏପରିସ୍ଥିତିରେ ଔଷଧ ଦୋକାନରେ ଏସବୁ ସାମଗ୍ରୀ ପାଇଁ ଭିଡ଼ ଆରମ୍ଭ ହୋଇଥିଲେ ମଧ୍ୟ ଆବଶ୍ୟକ ପରିମାଣର ମହଜୁଦ ନ ଥିବାରୁ ଲୋକେ ନିରାଶ ହେଉଛନ୍ତି। ବିଶେଷକରି ମାସ୍କ ପାଇଁ ଦୋକାନରୁ ଦୋକାନ ବୁଲୁଥିଲେ ମଧ୍ୟ ମାସ୍କ ମିଳୁ ନ ଥିବା ଜଣାପଡିଛି। ଯେଉଁ ଦୋକାନରେ ଅଳ୍ପକିଛି ମହଜୁଦ ରହିଛି ତାହାକୁ ଅଧିକ ଦାମ୍ରେ ବିକ୍ରି କରାଯାଉଥିବା ମଧ୍ୟ ଅଭିଯୋଗ ହେଉଛି। ସେହିଭଳି ଆଗୁଆ ସାନିଟାଇଜର କିଣି ଘରେ ମହଜୁଦ ରଖିବାକୁ ମଧ୍ୟ ଲୋକେ ଲାଗିପଡ଼ିଛନ୍ତି। ଫଳରେ ଏହାର ବିକ୍ରି ବଢ଼ିଯାଇଥିବା ଔଷଧ ଦୋକାନୀମାନେ କହିଛନ୍ତି।
ଏ ନେଇ ବାପୁଜୀନଗରସ୍ଥିତ ରବୀନ୍ଦ୍ର ମେଡିସିନ ଷ୍ଟୋର କର୍ତ୍ତୃପକ୍ଷ କହିଛନ୍ତି, ଦୋକାନରେ ମାସ୍କ ଯାହା ଥିଲା ସବୁ ବିକ୍ରି ହୋଇସାରିଛି। ଅର୍ଡର ଦିଆଯାଇଥିଲେ ମଧ୍ୟ ମାସ୍କ ଆସିବାରେ ବିଳମ୍ବ ହେବ ବୋଲି ଡିଲର ଜଣାଇଛନ୍ତି। କ୍ୟାପିଟାଲ ହସ୍ପିଟାଲ ପରିସରରେ ଥିବା ସେବା ଓ ଆଶୀର୍ବାଦ ମେଡିକାଲ ଷ୍ଟୋର୍ର ମିଥୁନ ଓ ସଞ୍ଜୟ କହିଛନ୍ତି, ହଠାତ୍ ଲୋକଙ୍କ ଡିମାଣ୍ଡ ବଢ଼ିବାରୁ ମାସ୍କ ଅଭାବ ଦେଖାଦେଇଛି। ଅଧିକ ମାସ୍କ ରଖି ନ ଥିବାରୁ ଲୋକେ ଫେରୁଛନ୍ତି। ମାସ୍କ ଅର୍ଡର କରିବାରୁ ଡିଲର ଦର ବଢ଼ିଥିବା କହୁଛନ୍ତି। ଯେଉଁମାନେ ଅଧିକ ଦାମ୍ ଦେଇ କିଣୁଛନ୍ତି, ସେମାନେ ତ ଗ୍ରାହକଙ୍କଠାରୁ ଅଧିକ ଦର ହିଁ ନେବେ। ସେହିପରି ବମିଖାଲ କେନାଲ ରୋଡ୍ରେ ଥିବା ଆପୋଲୋ ଫାର୍ମାସୀ କର୍ତ୍ତୃପକ୍ଷ କହିଛନ୍ତି, ମାଷ୍ଟର କ୍ୟାଣ୍ଟିନ୍ରେ ଥିବା ଡିପୋରୁ ନିୟମିତ ଭାବେ ମାସ୍କ ଆସେ ଓ ବିକ୍ରି ହୁଏ। ହେଲେ ଡିପୋରେ ମାସ୍କ ଷ୍ଟକ୍ ନାହିଁ।