ବନ୍ତଳା,୨୦ା୯(ଡି.ଏନ.ଏ.)-ଅନୁଗୋଳ ବ୍ଲକ ଅଞ୍ଚଳରେ ଅଜଣା ରୋଗରେ ଗୋରୁ ଆକ୍ରାନ୍ତ ହେଉଥିବା ବେଳେ ଏବେ ବ୍ରଏଲର କୁକୁଡ଼ା ମଡ଼କ ଦେଖାଦେଇଛି। ବିଶେଷକରି ବନ୍ତଳା ଅଞ୍ଚଳରେ କିଛି ଦିନ ମଧ୍ୟରେ ଘୁମା ରୋଗରେ ୫ ହଜାରରୁ ଊର୍ଦ୍ଧ୍ୱ କୁକୁଡ଼ା ମୃତ୍ୟୁମୁଖରେ ପଡ଼ିଥିବାରୁ ଏହି ଚାଷୀମାନେ ବହୁ ଆର୍ଥତ୍କ କ୍ଷତିର ସମ୍ମୁଖୀନ ହୋଇଛନ୍ତି। ଦେଢ଼ କେଜିରୁ ଦୁଇ କେଜି ମଧ୍ୟରେ ହୋଇଥିବା କୁକୁଡ଼ା ବିକ୍ରି ପୂର୍ବରୁ ରୋଗରେ ମରୁଥିବା ବେଳେ ବିଭାଗ ପକ୍ଷରୁ ପ୍ରତିକାର କରାଯାଉ ନାହିଁ। ଏ ନେଇ କୁକୁଡ଼ା ଚାଷୀ ମହଲରେ ତୀବ୍ର ଅସନ୍ତୋଷ ଦେଖାଦେଇଛି।
ଅନୁଗୋଳ ବ୍ଲକର ବନ୍ତଳା, ଖାଲଙ୍ଗା, ଖିଣ୍ଡା, ବାରଗୌଣିଆ, କଲେଇପଦା, କନ୍ତମେଘ, ରଗୁଡ଼ିଆପଡା, ମରଣ୍ଡା, ତାଳପଦା, ବଡ଼କନ୍ତକୁଳ, ସାନକନ୍ତକୁଳ, ଗଡ଼ତରାସ, ନୂଆଖେତା ଆଦି ଗ୍ରାମରେ ଏହି କୁକୁଡ଼ା ମଡ଼କ ଦେଖାଦେଇଛି। ଖିଣ୍ଡା ଗ୍ରାମର ଅରୁଣ କୁମାର ସାହୁଙ୍କ ୩୫୭, କାମଦେବ ଦେହୁରୀଙ୍କ ୩୮୦, କଲେଇପଦା ଗ୍ରାମର ସ୍ମୃତି ରଞ୍ଜନ ବେହେରାଙ୍କ ୧୯୦୦, ବଣାମୀରା ଗ୍ରାମର ଅନୀଲ କୁମାର ଦାସଙ୍କ ୧୦୦୦ କୁକୁଡ଼ା, ତାଳପଦା ଗ୍ରାମର ଗାଙ୍ଗୁଲି ପ୍ରଧାନଙ୍କ ୮୫୦, ନୂଆକ୍ଷେତାର ଅଶୋକ ପ୍ରଧାନଙ୍କ ୯୮୨ କୁକୁଡ଼ା ମରିଥିବା ବେଳେ ଆହୁରି ୫୦ରୁ ଅଧିକ ଚାଷୀଙ୍କ ଶହ ଶହ କୁକୁଡ଼ା ମୃତ୍ୟୁମୁଖରେ ପଡ଼ିଥିବା ଅଭିଯୋଗ ହୋଇଛି। ଚାଷୀମାନେ ବିଭିନ୍ନ ବ୍ୟାଙ୍କରୁ ଋଣ ଓ ହାତଉଧାରି ଆଣି ଏହି ଚାଷ କରିଥିବା ବେଳେ ଏଭଳି ମଡ଼କ ସେମାନଙ୍କ ଆର୍ଥିକ ମେରୁଦଣ୍ଡ ଭାଙ୍ଗି ଦେଇଛି। ଏଯାଏ ବିଭାଗ ପକ୍ଷରୁ କୋଣସି ପଦକ୍ଷେପ ନିଆଯାଇ ନ ଥିବାରୁ ଚାଷୀଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଇଛି। ଏ ସମ୍ପର୍କରେ ପ୍ରାଣୀ ବିଭାଗର ଉପ ନିର୍ଦ୍ଦେଶକ ଭରତ ଚନ୍ଦ୍ର ଗଡନାଏକ କୁହନ୍ତି, ବ୍ରଏଲର କୁକୁଡ଼ା ଚାଷୀମାନଙ୍କୁ ବିଭିନ୍ନ କମ୍ପାନୀ ଦେଉଛି। ସେମାନେ ତାହାର ରକ୍ଷାଣା ବେକ୍ଷଣ କରୁଛନ୍ତି। ଆମର ତାଙ୍କ ସହିତ କୌଣସି ସମ୍ପର୍କ ନାହିଁ। ଯଦି ଦେଶୀ କୁକୁଡ଼ା ମୃତ୍ୟୁମୁଖରେ ପଡ଼ନ୍ତି ତା’ହେଲେ ବିଭାଗ ପକ୍ଷରୁ ପଦକ୍ଷେପ ନିଆଯିବ।