ବାଲିକୁଦା,୧୯ା୮(ସ୍ବ.ପ୍ର.): ବାଲିକୁଦା ବ୍ଲକ ତଣ୍ଡିକୁଳ ପଞ୍ଚାୟତରେ ଏବେ କୃତ୍ରିମ ବନ୍ୟା ପରିସ୍ଥିତି ସୃଷ୍ଟି ହୋଇଛି। ଗତ ଖରାଦିନେ ପାରାଦୀପ ତୈଳ ବିଶୋଧନାଗାର ପାଇପ ଲାଇନ କାମ ବେଳେ ମଠସାହି ଘେରିବନ୍ଧକୁ କାଟି ଖେଲାଇ ଦିଆଯାଇଥିଲା। ଫଳରେ ଏଭଳି ପରିସ୍ଥିତି ସୃଷ୍ଟି ହୋଇଛି ବୋଲି ସ୍ଥାନୀୟ ଚାଷୀମାନେ କହିଛନ୍ତି। ସେହିପରି ଚଳିତବର୍ଷ ଜଳ ନିଷ୍କାସନ ନିମନ୍ତେ ଅନେକ କାମ ହାତକୁ ନିଆଯାଇଥିବାବେଳେ କୌଣସି ଗୋଟିଏ ସ୍ଥାନରେ ସାଇଫନ ନିର୍ମାଣ ହୋଇପାରିନାହିଁ। ଫଳରେ ସମସ୍ୟା ଅଧିକ ଜଟିଳ ହୋଇଛି ବୋଲି ଚାଷୀମାନେ କହିଛନ୍ତି। ଗତ ୧୩ ତାରିଖରେ ଜିଲାପାଳ ସଂଗ୍ରାମ କେଶରୀ ମହାପାତ୍ର ଏହି ପଞ୍ଚାୟତ ପରିଦର୍ଶନରେ ଆସିଥିବାବେଳେ ଅଞ୍ଚଳବାସୀ ଏ ସମ୍ପର୍କରେ ତାଙ୍କ ଦୃଷ୍ଟି ଆକର୍ଷଣ କରିଥିଲେ। ମାତ୍ର ଏଯାବତ୍ କୌଣସି ପଦକ୍ଷେପ ଗ୍ରହଣ କରାଯାଇ ନ ଥିବାରୁ ଚାଷୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ପ୍ରାୟ ହଜାର ଏକ ଫସଲ ଏବେ କୃତ୍ରିମ ବନ୍ୟାଜଳରେ ବୁଡି ରହିଛି। ଜମିରୁ ଉଦ୍ବୃତ ବର୍ଷାଜଳ ନିଷ୍କାସନ କରିବାକୁ ସରକାରଙ୍କ ପକ୍ଷରୁ କୌଣସି ବ୍ୟବସ୍ଥା କରାଯାଇ ନ ଥିବାରୁ ମଠସାହି ଗଁାର ଚାଷୀମାନେ ଘର ପିଛା ଚାନ୍ଦା କରି ନିଜ ଅର୍ଥରେ ଘେରିବନ୍ଧ କରିଥିଲେ। ଫଳରେ ବାହାର ପାଣି ଗହିର ଭିତରକୁ ପ୍ରବେଶ କରି ପାରୁ ନ ଥିଲା। ମାତ୍ର ଚଳିତବର୍ଷ ତୈଳ ବିଶୋଧନାଗାର ପାଇପ୍ ଲାଇନ କାମ ଚାଲୁଥିବାବେଳେ କମ୍ପାନୀର ଗାଡ଼ି ଚଳାଚଳରେ ଅସୁବିଧା ହେବାରୁ ଉକ୍ତ ଘେରିବନ୍ଧକୁ କାଟି ଦିଆଯାଇଥିଲା। ବର୍ଷାଦିନ ଆସିବା ପୂର୍ବରୁ କମ୍ପାନୀ କାମ ସାରି ଚାଲିଯାଇଥିବାବେଳେ ଘେରିବନ୍ଧ ଆଉ ମରାମତି କରି ନ ଥିଲା। ବର୍ଷା ଦିନେ ସାରା ଜିଲାର ଅର୍ଦ୍ଧାଧିକ ବର୍ଷାଜଳ ମଠସାହିର ଚାଷଜମି ଦେଇ ନିଷ୍କାସିତ ହୋଇଥାଏ। ଜିଲାର ସିଦ୍ଧଳଠାରୁ ଚଷାପଡା, ସିଙ୍ଗିରି, କରମଙ୍ଗ, ମୂଳୁଗଁା, ଗଉଡ଼ସାହି, ମହାଦେଇବ୍ରହ୍ମପୁର, ଦଳେଇ ତୋଟା, ଅସାରଣା, ସାରଣା, ମଠସାହି, ଦିଗୋଡା ଆଦି ଗ୍ରାମର ବର୍ଷା ଜଳ ଏହି ବାଟ ଦେଇ ନିକଟସ୍ଥ ହଂସୁଆ ନଦୀକୁ ଯାଇଥାଏ। ମାତ୍ର ଡ୍ରେନେଜ ଅଧିକାରୀଙ୍କ ବେପରୁଆ ମନୋଭାବ ଓ ତୈଳ ବିଶୋଧନାଗାର କାମ ପାଇଁ ଚଳିତବର୍ଷ ତଣ୍ଡିକୁଳ ପଞ୍ଚାୟତର ହଜାର ହଜାର ଏକର ଚାଷ ଜମି ପାଣିରେ ବୁଡି ରହିଛି। ତଳିଆ ଅଞ୍ଚଳ ହୋଇଥିବାରୁ ଏହି ଅଞ୍ଚଳର ଚାଷୀ ଭାଇମାନେ ପ୍ରାୟ ୭୦ ଭାଗ ଜମିରେ ଧାନ ରୋଇ ସାରିଥିଲେ। ମାତ୍ର ଜମିରେ ପାଣି ଜମି ରହିବା ଫଳରେ ଯାହା ରୁଆ ହୋଇଥିଲା ସବୁ ପଚିସଢି ଗଲାଣି। ଏପଟେ ତଳି ଘେରାରେ ଆଉ ତଳି ନାହିଁ। ଯାହା ତଳି ଥିଲା ସେଥିରେ ମଧ୍ୟ ପାଣି ଜମି ରହିବାରୁ ତାହା କ୍ଷତିଗ୍ରସ୍ତ ହୋଇଛି। ଏଥିରେ ବିଶେଷ ଭାବେ ସାରଣା, ଅସାରଣା, ମଠସାହି, ଦିଗୋଡ଼ା, ଶଙ୍କରସାହି, ତିହୁଡି, ପୋଦନା, ନାନକାର, ବସନ୍ତପୁର ଓ ତଣ୍ଡିକୁଳ ଗ୍ରାମର ଶହ ଶହ ଚାଷୀ କ୍ଷତିଗ୍ରସ୍ତ ହୋଇଛନ୍ତି। ଜମିରେ ଏତେ ପରିମାଣର ଜଳ ଲହଡ଼ା ମାରୁଛି ଯେ, ତାହା ବନ୍ୟାର ଏକ ଭ୍ରମ ସୃଷ୍ଟି କରୁଛି। ଉପଯୁକ୍ତ ଅନୁଧ୍ୟାନ କରି ସିଦ୍ଧଳ ରଙ୍କେଇ ସଫେଇରେ ଥିବା ଦଳ ସଫା କରିବା ଓ ବିଭିନ୍ନ ସ୍ଥାନରେ ଜଳ ନିଷ୍କାସନ ପାଇଁ ସାଇଫନ ଓ ସ୍ଲୁଇସ ଗେଟ୍ ନିର୍ମାଣ କରିବାକୁ ଜିଲାପାଳ ପଦକ୍ଷେପ ନେବା ପାଇଁ ଚାଷୀମାନେ ଦାବି କରିଛନ୍ତି।