କଟକ ରୋଡ,୩।୮(ଡି.ଏନ୍.ଏ.): ରାସ୍ତା କଡ଼ରେ ବାସହରା, ଅସହାୟ ବ୍ୟକ୍ତି ଶୋଇବେ ନାହିଁ। ରାତ୍ରି ଆଶ୍ରୟସ୍ଥଳି ସହରରେ ନିର୍ମାଣ ହେବ। ଆଶ୍ରୟସ୍ଥଳିରେ ରହୁଥିବା ଲୋକଙ୍କୁ ମାଗଣା ଖାଦ୍ୟ, କମଳ, ମଶାରି ସହ ନିୟମିତ ସ୍ବାସ୍ଥ୍ୟ ପରୀକ୍ଷା ହେବ। ୨୦୧୧ ରେ ଏଭଳି ନିର୍ଦ୍ଦେଶନାମା ଜାରି କରିଥିଲେ ସୁପ୍ରିମକୋର୍ଟ। ଏହିି ନିର୍ଦ୍ଦେଶକୁ ୮ବର୍ଷ ବିତିଯାଇଥିଲେ ମଧ୍ୟ ଭୁବନେଶ୍ୱର ମହାନଗର ନିଗମ (ବିଏମ୍ସି) ନିରାଶ୍ରୟଙ୍କ ମନ ଜିଣିପାରୁ ନାହିଁ। ଫଳରେ ଏବେ ବି ରାସ୍ତାକଡ଼, ଦୋକାନ ବାରଣ୍ଡା ଅସହାୟଙ୍କ ଆଶ୍ର୍ରୟସ୍ଥଳି ପାଲଟିଛି।
ସୂଚନା ଅନୁଯାୟୀ, ୨୦୧୧ରେ ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ ୨୦୧୨ ରେ ଭୁବନେଶ୍ୱର ସହରରେ ଏହା ଠିକ୍ କାର୍ଯ୍ୟକାରୀ ହୋଇପାରୁ ନ ଥିବା ନେଇ ନଗର ଉନ୍ନୟନ ବିଭାଗ ଜଣାଯାଇଥିଲା। ଫଳରେ ଏ ନେଇ ବିଭାଗ ବିଏମ୍ସିକୁ ତୁରନ୍ତ ସହରରେ ୭ଟି ଆଶ୍ରୟସ୍ଥଳି ଖୋଲିବା ପାଇଁ ନିର୍ଦ୍ଦେଶ ଦେବା ସହ ବସଷ୍ଟାଣ୍ଡ, ଷ୍ଟେଶନ ସହ ମୁଖ୍ୟ ରାସ୍ତା କଡରେ ରହୁଥିବା ଲୋକଙ୍କୁ ସଚେତନ କରିବା ପାଇଁ ଦାୟିତ୍ୱ ଦିଆଯାଇଥିଲା। ଏ ନେଇ ତତ୍କାଳୀନ ବିଏମ୍ସି କମିଶନର ବିଶାଲ କୁମାର ଦେବଙ୍କ ସହ ଏକ ଟିମ ହଠାତ ରେଲଓ୍ବେ ଷ୍ଟେଶନ ଓ ଆଖପାଖ ଅଞ୍ଚଳରେ ପହଞ୍ଚି ପ୍ରାୟ ୨୫୦ରୁ ଊର୍ଦ୍ଧ୍ୱ ବ୍ୟକ୍ତିଙ୍କୁ ଠାବ କରିଥିଲେ। ତୁରନ୍ତ ଆଶ୍ରୟସ୍ଥଳୀ ନିର୍ମାଣ ହୋଇପାରି ନ ଥିବା ବେଳେ ପ୍ରାଥମିକ ପର୍ଯ୍ୟାୟରେ ସେମାନଙ୍କୁ ୟୁନିଟ-୩ କମ୍ୟୁନିଟି ସେଣ୍ଟର ଓ ପୁରୁଣା ଭୁବନେଶ୍ୱର ଜ୍ଞାନନଗର କମ୍ୟୁନିଟି ସେଣ୍ଟରରେ ଥଇଥାନ କରାଯାଇଥିଲା। ଇତି ମଧ୍ୟରେ ଗଙ୍ଗନଗର, ଭୀମପୁର, ଅଶୋକନଗର, ୟୁନିଟ-୩, ଚନ୍ଦ୍ରଶେଖରପୁର, ଘାଟିକିଆ ଓ ବରମୁଣ୍ଡାରେ ଆଶ୍ରୟସ୍ଥଳି ନିର୍ମାଣ ସରିଛି। ବହୁ ଅର୍ଥ ବ୍ୟୟରେ ତିଆରି ହେବା ସହ ୨ଟି ଏଜେନ୍ସିକୁ ଲୋକଙ୍କୁ ଆଶ୍ରୟସ୍ଥଳିକୁ ବୁଝାଯାଇ ଅଣାଯିବ, ନିରାଶ୍ରୟଙ୍କୁ ଖାଦ୍ୟ ପ୍ରଦାନ ସହ ଅନ୍ୟାନ୍ୟ ସୁବିଧା ସୁଯୋଗ ଦେବା ପାଇଁ ପ୍ରତି ଆଶ୍ରୟସ୍ଥଳି ପିଛା ପ୍ରାୟ ୭୦ହଜାର ଟଙ୍କାରୁ ୧ଲକ୍ଷ ଟଙ୍କା ପର୍ଯ୍ୟନ୍ତ ମାସିକ ବିଏମ୍ସି ସମ୍ପୃକ୍ତ ଏଜେନ୍ସିକୁ ଅର୍ଥ ପଇଠ କରୁଥିବା ମହାନଗର ନିଗମ ପକ୍ଷରୁ ସୂଚନା ମିଳିଛି। ବିଭାଗୀୟ ଅଧିକାରୀଙ୍କ ସୂଚନା ମୁତାବକ, ମାସିକ ପ୍ରାୟ ୭ଲକ୍ଷ ଟଙ୍କା ଏଜେନ୍ସି ଅର୍ଥ ନେଉଥିବା ବେଳେ କିନ୍ତୁ ସଚେତନ ବାବଦରେ ସେଭଳି କିଛି ପଦକ୍ଷେପ ନ ନେବା ଯୋଗୁ ସହରର ବିଭିନ୍ନ ସ୍ଥାନରେ ଅସହାୟ ବର୍ଷା ଦିନରେ ରାସ୍ତା କଡ଼ରେ ଶୋଇଥିବା ପରିଲକ୍ଷିତ ହୋଇଛି। ମୁଖ୍ୟତଃ ରେଲଓ୍ବେ ଷ୍ଟେଶନ ସମ୍ମୁଖ, ବସଷ୍ଟାଣ୍ଡ, କଳ୍ପନା ଛକ, କଟକ ରୋଡ, ବିଭିନ୍ନ ଓଭରବ୍ରିଜ ତଳେ ଅସହାୟ ରାତ୍ରିଯାପନ କରୁଛନ୍ତି। କଟକରେ ୩ ଅସହାୟଙ୍କୁ ହତ୍ୟା କରାଯିବା ପରେ ମଧ୍ୟ ବିଏମ୍ସି ନିରାଶ୍ରୟଙ୍କୁ ମନାଇବା ପାଇଁ ସେଭଳି କିଛି ତତ୍ପରତା ପ୍ରକାଶ କରିନାହିଁ। ବିଏମ୍ସିର କାର୍ଯ୍ୟ ପ୍ରଣାଳୀ ନେଇ ସାଧାରଣରେ ସନ୍ଦେହ ସୃଷ୍ଟି କରିଛି। ସହରର ପ୍ରମୁଖ ସ୍ଥାନ ତଥା ଛକ ଅଞ୍ଚଳରେ ନିରାଶ୍ରୟ ଓ ବାସହରାଙ୍କୁ ସଚେତନ କରିବା ସହ ରାଜଧାନୀରେ ଖୋଲିଥିବା ଆଶ୍ରୟସ୍ଥଳି ବାବଦରେ ସୂଚନା ଓ ଠିକଣା ପ୍ରଦାନ ନେଇ ସୁପ୍ରିମକୋର୍ଟ ନିର୍ଦ୍ଦେଶନାମା ଜାରି କରିଛନ୍ତି। କିନ୍ତୁ ଏଯାବତ ସହରରେ ହୋର୍ଡିଂ କିମ୍ବା ବ୍ୟାନରରେ ଲଗାଯାଇନାହିଁ। ଫଳରେ ବିଏମ୍ସି କତ୍ତୃପକ୍ଷ ଏଦିଗରେ କେତେ ସଫଳତା ହାସଲ କରିଛନ୍ତି ତାହାକୁ ନେଇ ପ୍ରଶ୍ନବାଚୀ ସୃଷ୍ଟି କରିଛି। କଳ୍ପନା ଛକର ଏକ ଦୋକାନ ବାରଣ୍ଡାରେ ଶୋଇଥିବା ଗଞ୍ଜାମ ଜିଲା ବେଲଗୁଣ୍ଠା ଥାନା ନୂଆଗଁା ଗ୍ରାମର ରମେଶ ବେହେରା କୁହନ୍ତି, କଟକ ଘଟଣା ଶୁଣିବା ପରେ ଆମ୍ଭମାନଙ୍କ ମଧ୍ୟରେ ଭୟ ଦେଖାଦେଇଛି। ପୋଲିସ କିମ୍ବା ମ୍ୟୁନିସିପାଲିଟି କେହି କେବେ ଲୋକଙ୍କୁ ବୁଝାଇବା ଦେଖିନାହିଁ। କିଛି ଦିନ ହେବ ରାତିରେ ଲୁଟ ହେଉଥିବା ଜାଣିବା ପରେ ବିଳମ୍ବିତ ସମୟ ପର୍ଯ୍ୟନ୍ତ ଅନିଦ୍ରା ରହୁଛୁ ବୋଲି କୁହନ୍ତି ଶ୍ରମିକ ଶରତ ଗଉଡ। ଏ ସମ୍ପର୍କରେ ବିଏମ୍ସି ଡେପୁଟି କମିଶନର(ଓ୍ବେଲଫେୟାର) ସଂଘମିତ୍ରା ବେହେରା କୁହନ୍ତି, ଏ ବିଷୟରେ ସୂଚନା ଦେବା ପାଇଁ ଆଶ୍ରୟସ୍ଥଳି ଦାୟିତ୍ୱରେ ଥିବା ବିଏମ୍ସି ଟିମ ଲିଡରଙ୍କୁ କହିଥିଲେ। ବିଏମ୍ସି ଟିମ ଲିଡରଙ୍କ କହିବାନୁଯାୟୀ, ମଝିରେ ମଝିରେ ଡେପୁଟି କମିଶନର ଓ ମୁଁ ଏଜେନ୍ସି ଲୋକଙ୍କୁ ନେଇ ବିଭିନ୍ନ ସ୍ଥାନରେ ନିରାଶ୍ରୟଙ୍କୁ ଅଶ୍ରୟସ୍ଥଳି ଆସକୁ ଆଣିବା ପାଇଁ ବୁଝାଉଛୁ। କିନ୍ତୁ ସେମାନେ ଆସିବାକୁ ମଙ୍ଗୁନାହାନ୍ତି। ଷ୍ଟେଶନ ଛକରେ ଥିବା ହୋର୍ଡିଂ ବାତ୍ୟା ଫନୀରେ ଭାଙ୍ଗିଯାଇଛି। ଅନ୍ୟାନ୍ୟ ଅଞ୍ଚଳରେ ହୋର୍ଡିଂ ଲଗାଇବା ପାଇଁ ସେଭଳି କିଛି ପଦକ୍ଷେପ ଅଦ୍ୟାବଧି ନିଆଯାଇନାହିଁ। ଖୁବଶୀଘ୍ର ସମସ୍ତ ପ୍ରମୁଖ ଛକରେ ହୋର୍ଡିଂ ଲଗାଯିବା ସହ ସଚେତନତା ବଢ଼ାଇବା ପାଇଁ ଉଦ୍ୟମ ଆରମ୍ଭ ହେବ ବୋଲି କହିଥିଲେ।