ଘୋଷଣାରେ ସୀମିତ ଆଦର୍ଶ ଗାଁ: ମଉଲିକ୍ ସୁବିଧାରୁ ବଁଚିତ୍ ଗାଁବାସୀ
21 ପଦ୍ମପୁର, ୨୧।୬ (ଡି.ଏନ୍.ଏ): ବରଗଡ଼ ଜିଲା ପଦ୍ମପୁର ବ୍ଲକ ଦହିଗଁା ପଁଚେତ୍ର ବ୍ରାହ୍ମଣଡ଼ିହି ଗଁାକେ ୨ ବଛର ଆଗରୁ ମାଲ ମାଲ ଅଫିସରକଁର ଧାର ଲମିଥିଲା। ହଜାର ହଜାର ଲୁକ୍କର ଆଘେ ଘୋଷନା କରାଗଲା ଆଦର୍ଶ ଗଁା। ୧ ହଜାରରୁ ଅଧ୍କା ଲୋକ୍ ବାସ କରୁଥିବାର ବ୍ରାହ୍ମଣଡ଼ିହିବାସୀ ଭାବିଥିଲେ ଆମର ଆଶ୍ ପୂରନ୍ ହେବା। ହେଲେ ଦିନାକେତେ ଉତାରୁ ଦେଖ୍ଲାବେଲେ ସବୁ ଫସକିଗଲା। ଆଦର୍ଶ ଗଁାର ଫାଇଲ ହଜିଗଲା। ସୁଆସ୍ତିଅ ସେବାର ଲାଗି ଡାକ୍ତରଖାନା, ସ୍କୁଲରେ ପଢ଼ାକୁଠି, ଗଁାକେ ପିଇଲା ପାଏନ୍ର ବେବସ୍ତା, ରାସ୍ତାଘାଟର ସୁବିଧା, ଧଁଦାମୂଲକ କାଯ୍କରମ ଜରିଆରେ ଲୋକ୍ କେନ୍ଥେଇ ରୁଜଗାର କରି ନିଜର ଗୁଡ଼େ ନିଜେ ଠିଆ ହେଇପାରବେ ଲେଖେଁ ସପନ୍ ଗଁାବାସୀକୁ ଦେଖୋଯାଇଥିଲା। ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାରେ ରାସ୍ତା ଖଁଡ଼େକେ ଛାଡ଼ିଦେଲେ ଆଏଜ୍ତକ ଗଁାରେ କିଛି ନାଇଁହେଇ। ଆଏଜ୍ ବି ଗଁାରେ ୪୦ରୁ ୫୦ ଝନ୍ ଅସାହା ବୁଢ଼ାବୁଢ଼ି ବିଧବା ଭତା ପାଏବାରୁ ବଁଚିତ୍ ହେଇ ରହିଛନ୍। ଗଁାରେ ସ୍ବାସ୍ଥ୍ୟ କେନ୍ଦ୍ର ଅଭାବୁ ଅଙ୍ଗନଓ୍ବାଡି କରମୀ ଛୁଆ ଆର ମା’ମାନକୁ ଟୀକାକରନ ଲାଗି ପାସର ଦର୍ଲିଗୁଡ଼ା ଗଁାକେ ନେଉଛନ୍। ୪ କି.ମି. ରାସ୍ତା ତିଆର ହେଲେ ଗଁାବାସୀ ଅତି ସହଜ ଆର ସୁବିଧାରେ ପଦ୍ମପୁର ଯାଇ ନିଜର ସରକାରୀ, ବେସରକାରୀ କାମ୍ କରି ଫିରିପାରତେ। ହେଲେ ଇ ୪ କି.ମି. ରାସ୍ତା ଅଭାବୁ ଲୋକ୍ ଉପେ ଶୂଇନ୍ ହେଇ ୧୪ କି.ମି. ରାସ୍ତା କିଁଦ୍ରିବୁଲି ପଦ୍ମପୁରରେ ପୁହୁଁଚୁଛନ୍। ଆଦର୍ଶ ଗଁା ହେଲେ ଗଁାର ରୂପରେଖ ବଦଲି ଯିବା ବଲି ସମକିରି ଆଶ୍ ଥିଲା, ହେଲେ ଦିନୁଦିନ୍କେ ଗଁାବାସୀକର ଇ ଆଶ୍ ମହଲି ଯାଉଛେ। ଇ ବାବ୍ଦେ ଥାନୀୟ ସରପଁଚ୍ ସୁକାନ୍ତ କୁମାର ବାଗକୁଁ ପଚରାଲାରୁ ଆଦର୍ଶ ଗଁା ଖାଲି ଘୋଷନାରେ ରହିଯାଇଛେ। ସରକାର ଘୋଷନା କରି ଚୁପ୍ମାରି ବସିଛନ୍। କେହେନ୍ସି ପରକାର ବିକାଶ ମୂଲକ ଯୋଜନାର ଚିଠିପତର ପଁଚେତ୍କେ ନାଇଁ ଆସି ବଲି ସେ କହିଥିଲେ। ସେନ୍ତା ଓ୍ବାର୍ଡ ସଭ୍ୟ ସୁରେନ୍ଦ୍ର ସାହୁକୁଁ ପଚରାଲାରୁ ୨୦୧୭ରେ ଗଁାକେ ଆଦର୍ଶ ଗଁା ଘୋଷନା କରାଯାଇଥିଲା। ଗଁାରେ ୧ କୋଟି ଟଁକାର ଭିନେ ଭିନେ ପ୍ରକଳ୍ପ ହେବା ବଲି କୁହାଯାଇଥିଲା, ହେଲେ ସେସବୁ ଦିନ୍ବେଲିଆ ସପନ ଥିଲା ଲେଖେଁ ଲାଗୁଛେ ବଲି ସେ କହୁଥିଲେ। ଝନେ ଗଁାବାସୀ ବିଦ୍ୟାଧର କମଲିଆ କହିଛନ୍ ଯେ, ସରକାରୀ ବାବୁମାନେ ବଡ଼ବଡ଼ କଥା କହିକରି ପଲାଲେ। ହେଲେ ଗଁାର ରାସ୍ତାଘାଟ, ସ୍କୁଲ, ଅଙ୍ଗନଓ୍ବାଡି କେନ୍ଦ୍ର ଆଗରୁ ଯେନ୍ତା ଥିଲା, ଏହେଦେ ବି ସେନ୍ତା ଅଛେ।