ଛତ୍ରପୁର,୨୭ା୩(ଡି.ଏନ୍.ଏ):ଗଞ୍ଜାମକୁ ବାଲ୍ୟବିବାହମୁକ୍ତ ଜିଲା ଭାବେ ୨୦୨୨ ଜାନୁଆରୀ ୩ରେ ଘୋଷଣା କରାଯାଇଥିଲା। ରାଜ୍ୟରେ ଏପରି ଘୋଷଣା ପ୍ରଥମ ବୋଲି ସେତେବେଳେ ପ୍ରଶାସନ ପକ୍ଷରୁ କୁହାଯାଇଥିଲା। ତେବେ ବାସ୍ତବରେ ଏହା ଘୋଷଣାରେ ସୀମିତ ରହିଛି। କାରଣ ଏବେବି ଜିଲାର ବିଭିନ୍ନ ସ୍ଥାନରେ ବାଲ୍ୟବିବାହ ହେଉଥିବା ଦେଖିବାକୁ ମିଳୁଛି। କେତେକ ସ୍ଥାନରେ ବାଲ୍ୟବିବାହକୁ ସ୍ଥାନୀୟ ପୋଲିସ ଓ ପ୍ରଶାସନ ରୋକିବାରେ ସଫଳ ହୋଇଛନ୍ତି। ଚଳିତ ବର୍ଷ ଜାନୁଆରୀରେ ୧୨ ଓ ଫେବୃଆରୀରେ ୧୫ଟି ବାଲ୍ୟବିବାହ ରୋକାଯାଇଥିବା ବିଭାଗୀୟ ପକ୍ଷରୁ ସୂଚନା ମିଳିଛି । ଏଥିରୁ ଜଣାପଡୁଛି ଗଞ୍ଜାମ ଜିଲାରେ ବାଲ୍ୟବିବାହ ସମ୍ପୂର୍ଣ୍ଣ ବନ୍ଦ ହୋଇନି। ତେବେ ଜିଲା ପ୍ରଶାସନର ଉଦ୍ୟମ ଓ ବିଭିନ୍ନ ଯୋଜନା ଯୋଗୁଁ ବହୁମାତ୍ରାରେ ବାଲ୍ୟବିବାହ କମିଥିବା ଜଣାଯାଇଛି।
ବାଲ୍ୟବିବାହ ଓ କନ୍ୟ ଭ୍ରୁଣ ହତ୍ୟା ରୋକିବା ସହ ଝିଅ ଓ ପୁରୁଷ ଅନୁପାତ ସମାନ କରିବା ଉଦ୍ଦେଶ୍ୟରେ ଜିଲାପ୍ରଶାସନ ପକ୍ଷରୁ ‘ମୋ ଗେହ୍ଲା ଝିଅ’, ‘ନିର୍ଭୟା କଢୀ’ ଭଳି ବିଭିନ୍ନ କାର୍ଯ୍ୟକ୍ରମ ହାତକୁ ନିଆଯାଇଛି। ତତ୍କାଳୀନ ଜିଲାପାଳ ବିଜୟ ଅମୃତା କୁଲାଙ୍ଗେଙ୍କ ସମୟରେ ଏହି ସବୁ କାର୍ଯ୍ୟକ୍ରମ ଆରମ୍ଭ ହୋଇଥିଲା। ଏଥିସହ ସେ ହିଁ ଗଞ୍ଜାମ ଜିଲାକୁ ବାଲ୍ୟବିବାହମୁକ୍ତ ଜିଲା ଘୋଷଣା କରିଥିଲେ। ଗଞ୍ଜାମ ଜିଲାର ୩୩୦୯ ଗ୍ରାମ, ୨୮୦ ଟି ସହରାଞ୍ଚଳ ୱାର୍ଡ ଓ ୫୦୩ ଟି ପଞ୍ଚାୟତକୁ ବାଲ୍ୟ ବିବାହମୁକ୍ତ ଭାବେ ଘୋଷଣା କରାଯାଇଥିଲା। ପ୍ରଶାସନ ପଦକ୍ଷେପ ସ୍ବରୂପ ଯେଉଁ ଅଞ୍ଚଳର ସ୍କୁଲରେ ଲଗାତର କୌଣସି ଝିଅ ଅନୁପସ୍ଥିତ ରହିଲେ, କେଉଁ କାରଣ ପାଇଁ ଅନୁପସ୍ଥିତ ରହିଲେ, ତାହାର ସତ୍ୟତା ନେଇ ଶିକ୍ଷକମାନେ ଯାଞ୍ଚ କରିବାକୁ କୁହାଯାଇଥିଲା। ସେହିପରି ଅଙ୍ଗନାବାଡି କର୍ମୀ/ଆଶାଦିଦି ମଧ୍ୟ ନିଜ ଅଞ୍ଚଳରେ ହେଉଥିବା ବାଲ୍ୟ ବିବାହ ଉପରେ ତୁରନ୍ତ ସିଡିପିଓ ଓ ସୁପର ଭାଇଜରଙ୍କୁ ଅବଗତ କରାଇବେ। ବାଲ୍ୟ ବିବାହ ରୋକିବା ଉପରେ କୂଳ ସମାଜର ମୁଖ୍ୟ ଭୂମିକା ଏବଂ ଗ୍ରାମ୍ୟ କମିଟିର ମଧ୍ୟ ମୁଖ୍ୟ ଭୂମିକା ରହିଛି। ସେମାନେ ବିଲ୍ୟ ବିବାହକୁ ମନା କଲେ ଜିଲାରେ ଆଉ ବାଲ୍ୟ ବିବାହ ହେବନାହିଁ । ତେବେ ଏତେସବୁ ପଦକ୍ଷେପ ପରେ ମଧ୍ୟ ବାଲ୍ୟବିବାହ ନେଇ ଲୋକଙ୍କଠାରେ ସଚେତନତା ଅଭାବ ପରିଲକ୍ଷିତ ହେଉଛି। ଏକ ସମୀକ୍ଷାରୁ ଜଣାଯାଇଛି ଯେ ଜିଲାରେ ୬ବର୍ଷ ମଧ୍ୟରେ ୮୫୧ଟି ବାଲ୍ୟ ବିବାହ ପୋଲିସ ସହାୟତାରେ ପ୍ରଶାସନ ପକ୍ଷରୁ ରୋକାଯାଇଛି । ୨୦୧୭ରେ ୨୪, ୨୦୧୮ରେ ୨୨, ୨୦୧୯ରେ ୪୫, ୨୦୨୦ରେ ୨୨୮, ୨୦୨୧ରେ ୨୦୧ ଓ ୨୦୨୨ରେ ସର୍ବାଧିକ ୩୩୧, ବାଲ୍ୟ ବିବାହ ରୋକିବାରେ ଜିଲାପ୍ରଶାସନ ସଫଳ ହୋଇଛି ।