ରଣପୁର,୭ା୭(ସ୍ବ.ପ୍ର.)-ନୟାଗଡ଼ ଜିଲା ଚାନ୍ଦପୁର ଥାନା ଅଞ୍ଚଳରୁ ଜଣେ ନାବାଳିକା(ବୟସ-୮)ଙ୍କୁ ଚକ୍ଲେଟ୍ ଦେବା ବାହାନାରେ ଡାକି ଦୁବୁର୍ତ୍ତମାନେ ଅପହରଣ କରି ନେଇଥିବା ପରିବାର ପକ୍ଷରୁ ଶନିବାର ରାତିରେ ଥାନାରେ ଅଭିଯୋଗ ହୋଇଛି । ଏ ନେଇ ପୋଲିସ କେସ୍ ନଂ ୯/୧୯ ଅନୁସାରେ ତଦନ୍ତ କରିଥିଲେ ମଧ୍ୟ ଏ ପର୍ଯ୍ୟନ୍ତ ନାବାଳିକାଙ୍କ ସମ୍ପର୍କରେ କୌଣସି ସନ୍ଧାନ ମିଳିପାରି ନ ଥିବା ଜଣାପଡ଼ିଛି। ପରିବାର ପକ୍ଷରୁ ବହୁ ଖୋଜାଖୋଜି ପରେ ମଧ୍ୟ ନାବାଳିକାଙ୍କ ପତ୍ତା ନ ମିଳିବାର ହତୋତ୍ସାହ ସୃଷ୍ଟି ହୋଇଛି। ଘଟଣାର ୨୪ ଘଣ୍ଟା ବିତି ଯାଇଥିଲେ ସୁଦ୍ଧା ପୋଲିସର ବିଫଳତା ନେଇ ଚାନ୍ଦପୁର ଅଞ୍ଚଳରେ ଉତ୍ତେଜନା ପ୍ରକାଶ ପାଇଛି। ଘଟଣାରୁ ପ୍ରକାଶ, ନାବାଳିକା ଜଣକ ସ୍ଥାନୀୟ ଏକ ପ୍ରାଥମିକ ବିଦ୍ୟାଳୟରେ ଦ୍ୱିତୀୟ ଶ୍ରେଣୀରେ ପାଠ ପଢ଼ନ୍ତି । ତେବେ ଘଟଣା ଦିନ ମଧ୍ୟାହ୍ନ ୧୨ ଟା ୨୦ରେ ନାବାଳିକା ଜଣକ ଅନ୍ୟ ଜଣେ ନାବାଳକ ସହ ଖେଳିବା ପାଇଁ ସାଇକେଲ୍ ଯୋଗେ ରାସ୍ତାକୁ ଆସିଥିଲେ। ନାବାଳିକାଙ୍କ ଏହି ସମ୍ପର୍କିୟ ଭାଇ(ନାବାଳକ ଶିଶୁ)ଙ୍କ କହିବା ଅନୁସାରେ, ସେମାନେ ଖେଳୁଥିବାବେଳେ ୨ ଯୁବକ ଗୋଟିଏ ବାଇକ୍ରେ ଆସି ସେଠାରେ ଠିଆ ହୋଇଥିଲେ। ଏଥିରୁ ଜଣେ ଯୁବକ ବାଇକ୍ରୁ ଓହ୍ଲାଇ ନାବାଳିକାଙ୍କୁ ଚକ୍ଲେଟ୍ ଦେବା ପାଇଁ ଡାକିଥିଲେ। ତେବେ ନାବାଳିକାଙ୍କ ଭାଇ ଚକ୍ଲେଟ୍ ଆଣିବା ପାଇଁ ସେଠିକୁ ଯିବାକୁ ମନା କରିଥିଲେ । କଥା ନ ମାନି ଚକ୍ଲେଟ୍ ପାଇଁ ଯିବା ପରେ ଯୁବକ ଜଣକ ନାବାଳିକାଙ୍କ ନାକରେ କିଛି ଜିନିଷ ଶୁଘାଂଇ ଦେଇ ଅପହରଣ କରି ନେଇଥିଲେ।