ଖପ୍ରାଖୋଲ, ୬ା୬(ଡି.ଏନ.ଏ.)
ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ ଅଞ୍ଚଳରେ ଚଢାଦରରେ କିରୋସିନ ବିକ୍ରି ହେଉଛି। ଏହିଭଳି ଅଭିଯୋଗ ପରେ ପ୍ରଶାସନ ତରଫରୁ ମହରାପଦର ପଞ୍ଚାୟତର ବିଭିନ୍ନ ଗାଁରେ ତଦନ୍ତ ଆରମ୍ଭ ହୋଇଛି ା ପାଟଣାଗଡ ସହକାରୀ ଜିଲାପାଳ ପଦ୍ମନାଭ ପୁରୋହିତଙ୍କ ନେତୃତ୍ୱରେ ଖପ୍ରାଖୋଲ ଯୋଗାଣ ଅଧିକାରୀ ରାଜରାମ ହୋତା, ମହରାପଦର ଏବଂ ବାଗଝରନ୍ ଗାଁକୁ ଯାଇ ହିତାଧିକାରୀଙ୍କୁ ଚଢାଦରରେ ବିକ୍ରି ସମ୍ପର୍କରେ ପଚାରି ବୁଝିଥିଲେ। ସରକାର ମେ ଏବଂ ଜୁନ ମାସ ପାଇଁ କିରୋସିନ ଲିଟର ପିଛା ଡିଲରମାନେ ସର୍ବାଧିକ ୧୮ ଟଙ୍କାରେ ବିକିବା ପାଇଁ କହିଥିବାବେଳେ ୩୩ ଟଙ୍କା ଦରରେ ବିକିଥିବା ଜଣାଯାଇଥିଲା ା ତଦନ୍ତ ସମୟରେ ମହରାପଦର ଏବଂ ବାଗଝରନ୍ ଗାଁରେ ଡିଲର ହଳଧର ଭୋଇ ୩୩ଟଙ୍କା ଦରରେ କିରୋସିନ ବିକିଥିବା ହିତାଧିକାରୀମାନେ ତଦନ୍ତକାରୀ ଅଧିକାରୀଙ୍କୁ କହିଥିଲେ। କେବଳ ମହରାପଦର ନୁହଁ ବ୍ଲକର ଅନ୍ୟ ଗାଁମାନଙ୍କରେ ମଧ୍ୟ ୩୩ଟଙ୍କାରୁ ୪୩ଟଙ୍କା ଦରରେ କିରୋସିନ ଡିଲରମାନେ ବିକ୍ରି କରି ଲକ୍ଷାଧିକ ଟଙ୍କା ମୁନାଫା ପାଇଥିବା ଜଣାଯାଇଛି ା ଏ ନେଇ ବ୍ଲକ ଯୋଗାଣ ଅଧିକାରୀ ରାଜରାମ ହୋତାଙ୍କୁ ପଚାରିବାରୁ ନିର୍ଦ୍ଧାରିତ ଦରଠାରୁ ଅଧିକ ଦରରେ ମହରାପଦରରେ କିରୋସନ ବିକ୍ରି ହୋଇଛି ଏବଂ ଏହାର ତଦନ୍ତ ଚାଲିଛି। ଏ ନେଇ ତଦନ୍ତକାରୀ ଅଧିକାରୀ ପୁରୋହିତଙ୍କୁ ପଚାରିବାରୁ ୩୩ଟଙ୍କା ଦରରେ ଖାଉଟିମାନେ କିରୋସିନ କିଣିଥିବା ତଦନ୍ତ ସମୟରେ ଅଭିଯୋଗ କରିଛନ୍ତି। ରିପୋର୍ଟ ପାଟଣାଗଡ ଉପଜିଲାପାଳଙ୍କୁ ଦେବି ବୋଲି ସେ କହିଛନ୍ତି।
