କୋଲକାତା, ୩।୧୨- ସ୍ଥାନୀୟ ଯାଦବପୁର ବିଶ୍ୱବିଦ୍ୟାଳୟ ଗ୍ରାଉଣ୍ଡରେ ଅନୁଷ୍ଠିତ କୁଚ୍ ବିହାର ଟ୍ରଫି (୧୯ ବର୍ଷରୁ କମ୍)ର ଏକ ମ୍ୟାଚ୍ରେ ଚଣ୍ଡିଗଡ଼ ଏକ ଇନିଂସ ଓ ୬୦୩ ରନରେ ମିଜୋରାମକୁ ପରାସ୍ତ କରିଛି। ଫଳରେ ଭାରତୀୟ କ୍ରିକେଟ୍ କଣ୍ଟ୍ରୋଲ ବୋର୍ଡ (ବିସିସିଆଇ) ଆନୁକୂଲ୍ୟରେ ଅନୁଷ୍ଠିତ ଘରୋଇ କ୍ରିକେଟ୍ ଇତିହାସରେ ଚଣ୍ଡିଗଡ଼ ସର୍ବବୃହତ୍ ବିଜୟ ରେକର୍ଡର ଅଧିକାରୀ ହୋଇଛି। ଏହି ମ୍ୟାଚରେ ପ୍ରଥମେ ବ୍ୟାଟିଂ କରି ଚଣ୍ଡିଗଡ଼ ଚିରାଗବୀର ଧିନ୍ଦାସ (୨୫୩)ଙ୍କ ଦ୍ୱିଶତକ ଓ ଅଧିନାୟକ ସୂର୍ଯ୍ୟ ନାରାୟଣ ଯାଦବ (୧୫୭)ଙ୍କ ଶତକ ବଳରେ ପ୍ରଥମ ଇନିଂସରେ ୯ ଉଇକେଟ୍ ବିନିମୟରେ ୭୦୦ ରନ କରି ଇନିଂସ ଘୋଷଣା କରିଥିଲା। ଏହାପରେ ପ୍ରଥମ ଇନିଂସ ଆରମ୍ଭ କରିଥିବା ମିଜୋରାମ ମାତ୍ର ୫୮ ରନରେ ଅଲ୍ଆଉଟ୍ ହୋଇଥିଲା। ଏହାପରେ ଫଲୋଅନ୍ ହୋଇ ବ୍ୟାଟିଂ କରିଥିବା ମିଜୋରାମ ଦ୍ୱିତୀୟ ଇନିଂସରେ ମଧ୍ୟ ବିପର୍ଯ୍ୟୟର ସମ୍ମୁଖୀନ ହୋଇ ମାତ୍ର ୩୯ ରନରେ ସୀମିତ ରହିଥିଲା। ଅତିରିକ୍ତ ଆକାରରେ ସଂଗୃହିତ ହୋଇଥିବା ୧୨ ରନ୍ ଇନିଂସର ସର୍ବାଧିକ ସ୍କୋର ରହିଥିଲା। ଫଳରେ ମିଜୋରାମ ଏକ ଇନିଂସ ଓ ୬୦୩ ରନରେ ଲଜ୍ଜାଜନକ ପରାଜୟର ସମ୍ମୁଖୀନ ହୋଇଥିଲା। ଦୁଇଟି ଯାକ ଇନିଂସରେ ମିଜୋରାମ ବ୍ୟାଟ୍ସମ୍ୟାନ ଆରୁକ ଦାସ (୧୧ ଓ ୧୫ ରନ) କେବଳ ଦୁଇ ଅଙ୍କବିଶିଷ୍ଟ ସ୍କୋର କରିପାରିଥିଲେ। ଏଠାରେ ଉଲ୍ଲେଖଯୋଗ୍ୟ, ଘରୋଇ କ୍ରିକେଟ ଇତିହାସରେ ବୃହତ୍ ବିଜୟର ରେକର୍ଡ ପୂର୍ବରୁ ଆସାମ ଦଳ ନାମରେ ରହିଥିଲା। ୧୯୯୧-୯୨ ରଣ୍ଜୀ ସିଜନରେ ଆସାମ ଏକ ଇନିଂସ ଓ ୪୭୨ ରନରେ ତ୍ରିପୁରାକୁ ପରାସ୍ତ କରିଥିଲା।