ଅନୁଗୋଳ ଅଫିସ, ୧।୭: ଅନୁଗୋଳ ଜିଲା ବନ୍ତଳା ଥାନା ଚନ୍ଦନପୁରଠାରେ ଏକ କୁକୁଡା ଫାର୍ମରେ ବିଷାକ୍ତ ମଦ ପିଇ ଦୁଇ ଜଣ ମହିଳାଙ୍କ ମୃତ୍ୟୁ ଘଟିଥିବା ଅଭିଯୋଗ ହୋଇଥିଲା। ଘଟଣାକୁ ୬ ମାସ ପୂରିଥିଲେ ମଧ୍ୟ ଆଜି ପର୍ଯ୍ୟନ୍ତ ଭିସେରା ରିପୋର୍ଟ ଆସିପାରିନାହିଁ। ପୋଲିସ ତଦନ୍ତରେ ଶିଥିଳତା ଯୋଗୁ ଏ ପର୍ଯ୍ୟନ୍ତ ମୃତ୍ୟୁର କାରଣ ଜଣାପଡି ନ ଥିବା ସାଧାରଣରେ ଅଭିଯୋଗ ହୋଇଛି।
ଚନ୍ଦନପୁରରେ ଥିବା ଅରୁଣ ସିଂହଙ୍କ କୁକୁଡ଼ା ଫାର୍ମରେ ସୁନ୍ଦରଗଡ଼ ଜିଲା କୋଇଡା ଅଞ୍ଚଳର ବୁଦୁନି ନାଏକ(୪୦) ଓ ବିମଳା ନାଏକ(୫୦) କାମ କରୁଥିଲେ। ଗତ ବର୍ଷ ଡିସେମ୍ବରରେ ଉଭୟେ ମଦ୍ୟପାନ କରି ଶୋଇଥିବା ଅଭିଯୋଗ ହୋଇଥିଲା। ସକାଳେ ସେମାନେ ନ ଉଠିବାରୁ ଉଭୟଙ୍କୁ ଅନୁଗୋଳ ଜିଲା ମୁଖ୍ୟ ଚିକତ୍ସାଳୟ ନିଆଯାଇଥିଲା। ସେଠାରେ ଡାକ୍ତର ମୃତ ଘୋଷଣା କରିଥିଲେ। ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ପୋଲିସ ପକ୍ଷରୁ ଭିସେରା ରିପୋର୍ଟ ପାଇଁ ଭୁବନେଶ୍ୱରର ପରୀକ୍ଷାଗାରକୁ ନମୁନା ପଠାଯାଇଥିଲା। ହେଲେ ଅଦ୍ୟାବଧି ରିପୋର୍ଟ ଆସି ନ ଥିବା ଜଣାପଡିଛି।
ବନ୍ତଳା ଥାନା ଅଧିକାରୀ ପ୍ରଦୀପ ପ୍ରଧାନଙ୍କ ୯୪୩୭୧୫୩୦୩୩ ମୋବାଇଲ ନମ୍ବରକୁ ଫୋନ କରାଯାଇଥିଲେ ମଧ୍ୟ ଯୋଗାଯୋଗ ହୋଇ ନ ପାରିବାରୁ ମତାମତ ମିଳିପାରିନାହିଁ। ଜିଲାର ଜଣେ ବରିଷ୍ଠ ପୋଲିସ ଅଧିକାରୀ କହିଛନ୍ତି, ଘଟଣାକୁ ବହୁତ ଦିନ ହେଲାଣି। ରିପୋର୍ଟ ଆସିଯିବା କଥା। କିନ୍ତୁ କେଉଁ କାରଣରୁ ଆସି ନାହିଁ ସେ ନେଇ ଥାନା ଅଧିକାରୀଙ୍କ ସହ ଯୋଗାଯୋଗ କରିବି ବୋଲି କହିଛନ୍ତି। ଏହା ପୂର୍ବରୁ ମଧ୍ୟ ଅନୁଗୋଳ ତଳଗଡ଼ ଅଞ୍ଚଳର ୩ ଜଣ ଲୋକ ମଦ ପିଇ ମୃତ୍ୟୁ ବରଣ କରିଥିଲେ। ଏହା ସତ୍ତ୍ୱେ ମଦ ରନ୍ଧା ଓ ବିକ୍ରି ଉପରେ କଟକଣା ଲଗାଯାଉ ନ ଥିବାରୁ ଅଞ୍ଚଳରେ ବେଆଇନ ଭାବେ ଏହି କାରବାର ଚାଲିଥିବା ଅଭିଯୋଗ ହେଉଛି।