ପୁରୀ ଅଫିସ, ୨୬ା୧୨: ଚନ୍ଦ୍ରଭାଗା ଉପକୂଳରେ ଡଲ୍ଫିନ। ଗତ କିଛିଦିନ ହେଲା କୂଳଠାରୁ ପ୍ରାୟ ୫୦୦ ମିଟର ଦୂରରେ କିଛି ଡଲ୍ଫିନ ଖେଳୁଥିବା ଦେଖାଯାଉଛି। ତେବେ ପର୍ଯ୍ୟଟନ ଋତୁରେ ଡଲ୍ଫିନଙ୍କ ଉପସ୍ଥିତି ନିଶ୍ଚିତ ପର୍ଯ୍ୟଟକମାନଙ୍କ ପାଇଁ ଖୁସି ଖବର। ସବୁଠୁ ଗୁରୁତ୍ୱପୂର୍ଣ୍ଣ ହେଉଛି ବର୍ତ୍ତମାନ ରାମଚଣ୍ଡୀ ନିକଟ ବେଳାଭୂମିରେ ଚାଲିଛି ଇକୋ ରିଟ୍ରିଟ୍। ଏଠାରେ ଅତ୍ୟାଧୁନିକ ବ୍ୟବସ୍ଥା ଉପଲବ୍ଧ ହେଉଥିବାବେଳେ ପର୍ଯ୍ୟଟକମାନେ ରାତି ବିତାଉଛନ୍ତି। ସମୁଦ୍ରରେ ପର୍ଯ୍ୟଟକମାନେ ଜେଟ୍ସ୍କି, ସ୍ପିଡ୍ ବୋଟ ଏବଂ ବାନାନା ବୋଟରେ ବୁଲୁଥିବାବେଳେ ଏହି ଡଲ୍ଫିନଙ୍କୁ ମଧ୍ୟ ଦେଖିପାରନ୍ତି। ତେବେ ଏହା କେଉଁ ପ୍ରଜାତିର ଡଲ୍ଫିନ ତାହା ସ୍ପଷ୍ଟ ଜଣାପଡି ନାହିଁ। ତେବେ ଏହା ଇରାୱାଡି ପ୍ରଜାତିର ବୋଲି ଅନୁମାନ କରାଯାଉଛି।
ଗତ ଜାନୁୟାରୀ ୧୯ରେ ପୁରୀ ବନଖଣ୍ଡ ଅଧୀନ ୫ଟି ରେଞ୍ଜ ମଧ୍ୟରୁ ଗୋପ (ଡଲ୍ଫିନଙ୍କ ରହିବା ଲାଗି ଜଳାଶୟ ନ ଥିବାରୁ)କୁ ବାଦ୍ ଦେଇ ଅନ୍ୟ ୪ଟି ବ୍ରହ୍ମଗିରି, ବାଲୁଖଣ୍ଡ, କୋଣାର୍କ ଓ ଅସ୍ତରଙ୍ଗ ରେଞ୍ଜରେ ଗଣତି ହୋଇଥିଲା। ଦେବୀ ମୁହାଣଠାରୁ ଅରଖକୁଦା ମୁହାଣ ପର୍ଯ୍ୟନ୍ତ ବ୍ୟାପିଥିବା ଏହି ରେଞ୍ଜରେ ଗୋଟିଏ ହେଲେ ବି ଡଲ୍ଫିନ ଦେଖିବାକୁ ମିଳି ନ ଥିଲା। ଅବଶ୍ୟ କୁହୁଡି ଯୋଗୁ ଗଣନା କାର୍ଯ୍ୟ ଠିକ୍ ଭାବେ ହୋଇପାରି ନ ଥିବାରୁ ଡଲ୍ଫିନଙ୍କୁ ଠାବ କରାଯାଇପାରି ନ ଥିଲା ବୋଲି ଡିଏଫ୍ଓ ହର୍ଷବର୍ଦ୍ଧନ ଉଦ୍ଗାତା କହିଥିଲେ। ତେବେ ୨୦୧୮ରେ କେଳୁଣି ମୁହାଣରେ ୫ଟି ବଟଲନୋଜ ଡଲ୍ଫିନ ଦେଖିବାକୁ ମିଳିଥିବାବେଳେ ଚଳିତବର୍ଷ ସଂଖ୍ୟା ଶୂନ୍ ରହିବାକୁ ନେଇ ପରିବେଶବିତ୍ମାନେ ଉଦ୍ବେଗ ପ୍ରକାଶ କରିଥିଲେ। କୋଣାର୍କ ବନଖଣ୍ଡ ଅଧିକାରୀ ଅନନ୍ତ ନାରାୟଣ ମିଶ୍ରଙ୍କ ନେତୃତ୍ୱରେ ଗଠିତ ଟିମ୍ ଚନ୍ଦ୍ରଭାଗାରୁ କେଳୁଣୀ ମୁହାଣ ପର୍ଯ୍ୟନ୍ତ ଯାଇଥିଲେ ବି ଗୋଟିଏ ହେଲେ ଡଲ୍ଫିନ ଠାବ କରିପାରି ନ ଥିଲେ। ହେଲେ ଚନ୍ଦ୍ରଭାଗାରେ ଡଲ୍ଫିନ ଦେଖାଯିବା ଘଟଣା କିଛିମାତ୍ରାରେ ଆଶ୍ୱସ୍ତି ଆଣିଛି। ଏ ସମ୍ପର୍କରେ ପୁରୀ ଡିଏଫ୍ଓ ହର୍ଷବର୍ଦ୍ଧନ ଉଦ୍ଗାତା କହିଛନ୍ତି, ପୁରୀ ବନଖଣ୍ଡରେ ଡଲ୍ଫିନ ଆଦୌ ନ ଥିବା କହିବା ଭୁଲ୍ ହେବ। ଚଳିତବର୍ଷ ଗଣନା ଠିକ୍ ଭାବେ ହୋଇପାରି ନ ଥିଲା। ଗଣନା ଲାଗି ସକାଳ ୬ଟା ସମୟ ଧାର୍ଯ୍ୟ ହୋଇଥିଲା। ହେଲେ ପ୍ରବଳ କୁହୁଡି ଯୋଗୁ ୯ଟା ପର୍ଯ୍ୟନ୍ତ ଅପେକ୍ଷା କରିବାକୁ ପଡିଥିଲା। ତଥାପି କୁହୁଡି ଭଲ ଭାବେ ଛାଡି ନ ଥିଲା। ତେଣୁ ଗଣନା ଯେଉଁପରି ହେବା କଥା ହୋଇପାରି ନ ଥିଲା। ଆଉଥରେ ଡଲ୍ଫିନ ଗଣନା କରିବା ଲାଗି ବିଭାଗୀୟ ଅଧିକାରୀଙ୍କୁ ଜଣାଇଥିଲୁ। କିନ୍ତୁ ଏ ନେଇ କୌଣସି ସୂଚନା ଆସି ନ ଥିଲା। ଡଲ୍ଫିନ ନିର୍ଦ୍ଦିଷ୍ଟ ଭାବେ କୌଣସି ଗୋଟିଏ ସ୍ଥାନରେ ରହି ନ ଥାନ୍ତି। ତେଣୁ ଏବେ ଚନ୍ଦ୍ରଭାଗା ସମୁଦ୍ରରେ ଡଲ୍ଫିନ ବାହାରିଥିବା କିଛି ନୂଆ ନୁହେଁ ବୋଲି ସେ କହିଥିଲେ।