ନୂଆଦିଲ୍ଲୀ,୩।୯: ଚନ୍ଦ୍ରଯାନ-୨ର ଅର୍ବିଟରରୁ ଲ୍ୟାଣ୍ଡର ବିକ୍ରମ ସୋମବାର ଅଲଗା ହୋଇଥିଲା ବୋଲି ସୂଚନା ଦେଇଥିଲା ଭାରତୀୟ ମହାକାଶ ଗବେଷଣା ସଂସ୍ଥା(ଇସ୍ରୋ)। ଏହାପରେ ମଙ୍ଗଳବାର ଲ୍ୟାଣ୍ଡର ବିକ୍ରମ ଆଉ ଏକ ସଫଳତା ପାଇଛି ବୋଲି ଇସ୍ରୋର ବୈଜ୍ଞାନିକମାନେ ସୂଚନା ଦେଇଛନ୍ତି। ଇସ୍ରୋର ସୂଚନା ମୁତାବକ ଲ୍ୟାଣ୍ଡର ବିକ୍ରମ ମଙ୍ଗଳବାର ସକାଳ ପ୍ରାୟ ୮ଟା ୫୦ ମିନିଟରେ ସଫଳତା ପୂର୍ବକ ଓଲଟା ପଥରେ ଚାଲିବା ଆରମ୍ଭ କରିଛି। ସୋମବାର ଚନ୍ଦ୍ରଯାନ-୨ରୁ ଅଲଗା ହେବା ପରେ ଲ୍ୟାଣ୍ଡର ବିକ୍ରମ ୨୦ ଘଣ୍ଟା ପର୍ଯ୍ୟନ୍ତ ନିଜ ଅର୍ବିଟରର କକ୍ଷରେ ଘୁରି ବୁଲିଥିଲା। ହେଲେ ମଙ୍ଗଳବାର ଏହା ଓଲଟା ଦିଗରେ ଚାଲିଛି ଯାହାକୁ ଡିଅର୍ବିଟ କୁହନ୍ତି। ଏବେ ଚନ୍ଦ୍ରର ଦକ୍ଷିଣ ଧ୍ରୁବରେ ଓହ୍ଲାଇବା ପୂର୍ବରୁ ବିକ୍ରମ ଲ୍ୟାଣ୍ଡର ପାଖାପାଖି ୨ କିଲୋମିଟର ପ୍ରତି ସେକେଣ୍ଡରେ ଚନ୍ଦ୍ରର ଚାରିପଟେ ଘୁରି ବୁଲିବ।
