ଚେନ୍ନାଇ: ଚନ୍ଦ୍ରଯାନ-୨ ଅର୍ବିଟରରୁ ପ୍ରଥମ ମୁନ୍ ଲ୍ୟାଣ୍ଡର ବିକ୍ରମ ଅଲଗା ହେବା ପରେ ମଙ୍ଗଳବାର ପ୍ରଥମ ଓ ବୁଧବାର ଦ୍ୱିତୀୟ ଡି-ଅର୍ବିଟାଲ ଅପରେଶନ ସକାଳ ୩ ଟା୪୨ ମିନିଟ୍ରେ ଅନ-ବୋର୍ଡ ପ୍ରୋପଲ୍ଶନ ସିଷ୍ଟମ ମାଧ୍ୟମରେ ଆରମ୍ଭ କରାଯାଇ ୯ମିନିଟ୍ରେ ଶେଷ କରାଯାଇଛି। ଏବେ ଲ୍ୟାଣ୍ଡର୍ ୩୫x୧୦୧ କିଲୋମିଟର ଅର୍ବିଟ ବା କକ୍ଷରେ ଅବସ୍ଥାପିତ ହୋଇଛି। ଏହା ତିନିଦିନ ଯାଏ କକ୍ଷରେ ଚନ୍ଦ୍ରକୁ ପରିକ୍ରମା କରିବ । ଏହି ସମୟରେ ଲ୍ୟାଣ୍ଡର୍ ଓ ରୋଭର୍ ପ୍ରଜ୍ଞାକୁ ପରୀକ୍ଷା କରାଯିବ। ଏହି ପ୍ରକ୍ରିୟା ପରେ ଲ୍ୟାଣ୍ଡର୍କୁ କକ୍ଷରୁ ଚନ୍ଦ୍ରପୃଷ୍ଠକୁ ଧୀରେ ଧୀରେ ଅଣାଯାଇପାରିବ ବୋଲି ଭାରତୀୟ ଅନ୍ତରୀକ୍ଷ ଗବେଷଣା କେନ୍ଦ୍ର (ଇସ୍ରୋ)ପକ୍ଷରୁ ପ୍ରକାଶ କରାଯାଇଛି। ସେପ୍ଟେମ୍ବର ୭ତାରିଖରେ ଏହାକୁ ଚନ୍ଦ୍ରର ଦକ୍ଷିଣ ମେରୁ ଅଞ୍ଚଳରେ ଅବତରଣ କରାଯିବ। ଏହାକୁ ଚନ୍ଦ୍ରର ଦୁଇଟି ଗର୍ତ୍ତ ମଞ୍ଜିନସ୍ ସି’ ଓ ସମ୍ପେଲିୟସ୍ ଏନ୍ ମଧ୍ୟରେ ଥିବା ସମତଳ ପୃଷ୍ଠରେ ପାଖାପାଖି ୭୦ଂ ଅକ୍ଷାଂଶରେ ଅବତରଣ କରାଯିବାର ଯୋଜନା କରାଯାଇଛି। ରୋଭର୍ ପ୍ରଜ୍ଞା ସେହିଦିନ ୩ଟା ୩୦ ମିନିଟ୍ରୁ ୬ଟା ୩୦ମିନିଟ୍ ମଧ୍ୟରେ ଲ୍ୟାଣ୍ଡର୍ରୁ ବାହାରିବ। ରୋଭର୍ ଲ୍ୟାଣ୍ଡରରୁ ଅଲଗା ହେବା ପରେ ତାହା ଚନ୍ଦ୍ରପୃଷ୍ଠରେ ଏକ ଚନ୍ଦ୍ର ଦିବସ (ଯାହା ପୃଥିବୀର ୧୪ ଦିନ )ଯାଏ କାର୍ଯ୍ୟ କରିବ। ୧୪ ଦିନରେ ଏହା ୫୦୦ ମିଟର ଗତି କରି ଚନ୍ଦ୍ରପୃଷ୍ଠର ପରୀକ୍ଷା କରିବା ପରେ ନିଷ୍କ୍ରିୟ ହୋଇ ସେଠାରେ ଅନନ୍ତକାଳ ଯାଏ ପଡିରହିବ। ପ୍ରଜ୍ଞା ପୂର୍ବରୁ ରୁଷିଆ , ଆମେରିକା ଓ ଚାଇନା ଆଦି ଦେଶ ଚନ୍ଦ୍ରକୁ ପଠାଇଥିବା ୫ଟି ରୋଭର୍ ସେଠାରେ ପଡି ରହିଛି। ଅର୍ବିଟର ଚନ୍ଦ୍ରକକ୍ଷରେ ଏକ ବର୍ଷଯାଏ ୧୦୦ କିଲୋମିିଟର ଉଚ୍ଚରେ ଘୂରିବ।
ଚନ୍ଦ୍ରପୃଷ୍ଠରେ ଲ୍ୟାଣ୍ଡର ବିକ୍ରମ ଅବତରଣ କରିବା ପରେ ଏହା ଏକ ସେକେଣ୍ଡରେ ୨ ମିଟର ଗତି କରିବ। ଏହି ଗତିକୁ କମାଇବା ଭାରତୀୟ ବୈଜ୍ଞାନିକମାନଙ୍କ ପାଇଁ ଚ୍ୟାଲେଞ୍ଜ ହେବ। ଲ୍ୟାଣ୍ଡର୍ ଓ ରୋଭର୍ ସହ ବୈଜ୍ଞାନିକମାନଙ୍କର ସିଧା ସମ୍ପର୍କ ହୋଇପାରିବ ନାହିଁ, ଯାହା ହେବ କେବଳ ଅର୍ବିଟର ମାଧ୍ୟମରେ । ଏହି କାରଣରୁ ଲ୍ୟାଣ୍ଡର୍ ଚନ୍ଦ୍ରପୃଷ୍ଠରେ ଅବତରଣ କରିବା ପରେ ୧୫ ମିନିଟ୍ ବୈଜ୍ଞାନିକମାନଙ୍କ ପାଇଁ ପୂରା ଗୁରୁତ୍ୱପୂର୍ଣ୍ଣ ରହିବ।