ନୂଆଦିଲ୍ଲୀ,୨୧।୬:ଆନ୍ଧ୍ରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଚନ୍ଦ୍ରାବାବୁ ନାଇଡ଼ୁଙ୍କ ନେତୃତ୍ୱାଧୀନ ତେଲୁଗୁ ଦେଶମ୍ ପାର୍ଟି(ଟିଡିପି)ର ୪ ରାଜ୍ୟ ସଭା ସଦସ୍ୟ ଗୁରୁବାର ଭାଜପାରେ ସାମିଲ ହୋଇଛନ୍ତି। ସେମାନେ ହେଲେ ଓ୍ବାଇ.ଏସ୍. ଚୌଧୁରୀ, ସି.ଏମ୍. ରମେଶ, ଜି. ପି. ମୋହନ ରାଓ ଏବଂ ଟି. ଜି. ଭେଙ୍କଟେଶ୍। ଏମାନେ ଗୃହର ଅଧ୍ୟକ୍ଷ ତଥା ଉପରାଷ୍ଟ୍ରପତି ଏମ୍. ଭେଙ୍କାୟା ନାଇଡ଼ୁଙ୍କୁ ସାକ୍ଷାତ କରି ଭାଜପାରେ ଯୋଗଦେବା ନେଇ ଏକ ଚିଠି ମାଧ୍ୟମରେ ଜଣାଇଛନ୍ତି। ଏହି ୪ ଏମ୍ପି ଭାଜପା କାର୍ଯ୍ୟକାରୀ ଅଧ୍ୟକ୍ଷ ଜେ. ପି. ନଡ୍ଡାଙ୍କ ସହ ମିଶି ରାଜ୍ୟ ସଭା ଅଧ୍ୟକ୍ଷଙ୍କୁ ଭେଟି ତୁରନ୍ତ ଭାଜପାରେ ସାମିଲ ହେବାକୁ ଇଚ୍ଛା ପ୍ରକାଶ କରିଛନ୍ତି। ସେମାନଙ୍କ ଏହି ଦଳବଦଳ ଫଳରେ ଚନ୍ଦ୍ରାବାବୁଙ୍କୁ ଶକ୍ତ ଝଟକା ଲାଗିଛି। ସେପଟେ ଆମେରିକାରେ ଛୁଟି କାଟୁଥିବା ଚନ୍ଦ୍ରାବାବୁ କହିଛନ୍ତି, ଏଭଳି ସମସ୍ୟା ନୂଆ ନୁହେଁ । ଏନେଇ କର୍ମୀମାନେ ହତୋତ୍ସାହ ହେବା ଅନୁଚିତ। କେବଳ ଆନ୍ଧ୍ରର ସ୍ବାର୍ଥ ଲାଗି ଆମେ ସ୍ବତନ୍ତ୍ର ରାଜ୍ୟ ପାହ୍ୟା ଦାବିକରି ଭାଜପାକୁ ବିରୋଧ କରୁଛୁ। ଟିଡିପିକୁ ଦୁର୍ବଳ କରିବା ଲାଗି ଭାଜପା ହୀନ ପ୍ରୟାସ ଚଳାଇଛି। ପ୍ରକାଶଥାଉ କି, ଗତବର୍ଷ ଚନ୍ଦ୍ରାବାବୁ ଏନ୍ଡିଏ ଛାଡ଼ିଥିଲେ। ଏବେ ଓ୍ବାଇଏସ୍ଆର୍ କଂଗ୍ରେସ ମୁଖ୍ୟ ଜଗନ୍ମୋହନ ରେଡ୍ଡୀ ଆନ୍ଧ୍ରପ୍ରଦେଶରେ କ୍ଷମତାକୁ ଫେରିଛନ୍ତି। ସେ କେବଳ ବିଧାନସଭା ଦଖଲ କରିନାହାନ୍ତି ବରଂ ଆନ୍ଧ୍ରରେ ମୋଟ ୨୫ରୁ ୨୨ ଏମ୍ପିଙ୍କୁ ଲୋକ ସଭାକୁ ପଠାଇବାରେ ସଫଳ ହୋଇଛନ୍ତି।