ପାଇକମାଲ,୩।୨(ଡି.ଏନ.ଏ)- କଥାରେ ଅଛେ ମନ୍ବଲ ଥିଲେ ସବୁ ସମ୍ଭବ। ଏହେଦେ ଏନ୍ତା ଝନେ ଦିବ୍ୟାଙ୍ଗ ଛାତ୍ର ନିଜର ମଜବୁତ୍ ମନ୍ବଲ ଲାଗି ଏହେଦେ ଚରଚାରେ ରହିଛନ୍। ସେ ହେଉଛନ୍ ବରଗଡ଼ ଜିଲା ପାଇକମାଲ ବ୍ଲକ ଜାମସେଠ ପଁଚେତ୍ ଭେରୁଆମୁଣ୍ଡା ଗଁାର କ୍ଷୀରୋଦ୍ର ତାଣ୍ଡିକଁର ପୁଓ ଜଗନ୍ନାଥ ତାଣ୍ଡି(୧୧)।
ସୂଚନା ଅନ୍ସାରେ ଭେରୁଆମୁଣ୍ଡାର କ୍ଷୀରୋଦ୍ର ତାଣ୍ଡିକଁର ପରିବାର କହେଲେ ମାଏକିନା ଜେମା ତାଣ୍ଡି, ଦୁଇ ଝି ଆର ଗୁଟେ ବଲି ପୁଓ ଜଗନ୍ନାଥକୁଁ ନେଇ ସଁସାର। ଜଗନ୍ନାଥ ଜନ୍ମୁ ଦିବ୍ୟାଙ୍ଗ ଆଏ, ତାକର ହାତ୍ଗୋଡ଼ ନଁାଇଁନ। ସାଂଗସାଥି ଆର ଗଁାର ଲୋକ ତାହାକୁ ଜଗା ଭାଇ ବଲି ଡାକୁଛନ୍। ଜଗା ଏହେଦେ ଗଁାର ପ୍ରାଥମିକ ସ୍କୁଲରେ ୬ଷ୍ଠ ଶ୍ରେଣୀରେ ପାଠ୍ ପଢ଼ୁଛନ୍। ମା’ ଜେମା ତାହାକୁ ଫିଦିନ ହ୍ବିଲ ଚେୟାରରେ ବସେଇ ସ୍କୁଲ ନେବାର ଆନବାର କରୁଛନ୍। ଦିନାକେତେ ତଲେ ସ୍କୁଲର ବଛରକିଆ ଉଛବ୍ରେ ଜଗା ନାଚ୍ ପରିବେଷନ କରି ଚରଚାକେ ଆସିଥିଲେ। ଗୀତ୍, ବାଜ୍ନାର ତାଲେ ତାଲେ ତାକର ନାଚ୍ ଆର ଦିହି ମଲ୍କାର କମାଲ ଦେଖି ସାଂଗସାଥି, ଶିକ୍ଷୟିତ୍ରୀ ଶିକ୍ଷକ, ଗଁବାସୀ ତାହାକୁ ପରଶଁସାରେ ଗୁଧେଇ ଦେଇଥିଲେ। ସେନ୍ତା ତାକର ଇ ନାଚ୍ ସୋସିଆଲ ମିଡ଼ିଆରେ ଭାଇରାଲ ହେଲା ଉତାରୁ ପିଲାନୁ ବୁଢ଼ା ତକ୍ ତାକର ପରଶଁସା କରିଛନ୍। ସେ ଖାଲି ନାଚ୍ ନୁହେ ଭଲ ଗୀତ୍ ବି ଗାଇ ପାରୁଛନ୍। ଲେଖାପଢ଼ା ସଂଗେ ଫଟୁ ବି କାଟିପାରୁଛନ୍। ଜଗାକଁର ଇ ସବୁ କାଯ୍ ଏହେଦେ ମୋବାଇଲରୁ ମୋବାଇଲ ଘୂରି ବୁଲୁଛେ। ତାକର ଇ ଆତ୍ମ ବିଶୁଆସକେ ଲୋକ୍ ପରଶଁସା କରବାର ସଂଗେ ଛାତ୍ରୀଛାତ୍ରକଁର ଲାଗି ସେ ଉଦାହରନ୍ ଆଏ ବଲି ଚରଚା ହେଉଛେ। ଜଗାକୁଁ ଭବିଷତ୍ରେ କାଣା କରବ ବଲି ପଚ୍ରାଲାରୁ ଆଗିଅଁା ମୁଇଁ ଝନେ ନିହାତି ଗରିବ୍ ଘରର ପିଲା। ଅଭାବ୍ ଅନାଟନ ଲାଗି ପାଠ୍ପଢ଼ାରେ ଅସ୍ବିଧା ହେଉଛେ। ହେଲେ ସରକାରୀ ସାହାଯ୍ ମିଲ୍ଲେ ପାଠ୍ପଢ଼ି ଜୀବନ୍ରେ ଝନେ ଶିକ୍ଷକ ହେମି ବଲି ସେ କହିଥିଲେ।