ଭଦ୍ରକ ଅଫିସ, ୧୯।୫ – ଭଦ୍ରକ ଜିଲା ଚରମ୍ପାରେ ଫ୍ଲାଏଓଭର ବ୍ରିଜ୍ ନିର୍ମାଣ ହେବ। ଜାତୀୟ ରାଜପଥ ପ୍ରାଧିକରଣର କର୍ତ୍ତୃପକ୍ଷ ନିକଟରେ ଏନେଇ କ୍ଷେତ୍ର ପରିଦର୍ଶନ କରି ଫେରିଛନ୍ତି। ରାଜପଥ ସମ୍ପ୍ରସାରଣ ପ୍ରକଳ୍ପରେ ଚରମ୍ପାଠାରେ ଏହି ପୋଲ ନିର୍ମାଣ ସ୍ଥାନ ଦିଆଯାଇଛି। ଜାତୀୟ ରାଜପଥ ପ୍ରକଳ୍ପ ନିର୍ଦ୍ଦେଶକ ନାଗେଶ୍ୱର ରାଓ ଚରମ୍ପାରେ ପହଞ୍ଚି ଚରମ୍ପା ରାଜପଥ ସମ୍ପ୍ରସାରଣ କମିଟିର କର୍ମକର୍ତ୍ତାଙ୍କ ସହ ଆଲୋଚନା କରି ଫେରିଛନ୍ତି। କମିଟି ସଭାପତି ନାରାୟଣ ବିଶ୍ୱାଳ ଓ ସଂଯୋଜକ ଅବିନାଶ ଜେନାଙ୍କ ସହ ପ୍ରକଳ୍ପ ନିର୍ଦ୍ଦେଶକ ରାଓ ପ୍ରସ୍ତାବିତ ପୋଲ ନିର୍ମାଣ ସ୍ଥଳ ପରିଦର୍ଶନ କରିଥିଲେ।
ଚରମ୍ପାରେ ପୂର୍ବରୁ ଥିବା ଗଳାପୋଲ ଆଉ ଭଙ୍ଗାଯିବ ନାହିଁ। ଗଳାପୋଲ ପାଖାପାଖି ଫ୍ଲାଏଓଭର ବ୍ରିଜ୍ ନିର୍ମାଣ ହେବ ବୋଲି କୁହାଯାଇଛି। ତେବେ ଆଲୋଚନା ବେଳେ କମିଟିର ସଂଯୋଜକ ଜେନା ରାଜପଥ ନିର୍ମାଣ ସମୟରେ ଜଳ ନିଷ୍କାସନ ବ୍ୟବସ୍ଥାରେ ରହିଥିବା ତ୍ରୁଟି ସମ୍ପର୍କରେ ଦୃଷ୍ଟି ଆକର୍ଷଣ କରିଥିଲେ। ପ୍ରସ୍ତାବିତ ପ୍ରକଳ୍ପରେ ଏହାକୁ ସୁଧାରିବାକୁ ସେ ଦାବି କରିଥିଲେ। ସୂଚନାଥାଉ କି, ୧୬ ନମ୍ବର ଜାତୀୟ ରାଜପଥର ଚରମ୍ପାଠାରେ ଥିବା ସଂକୀର୍ଣ୍ଣ ଗଳାପୋଲକୁ ପ୍ରଶସ୍ତ କରିବା ନିମନ୍ତେ ଚରମ୍ପା ଅଞ୍ଚଳବାସୀ ବହୁବାର ଜାତୀୟ ରାଜପଥ ଉଚ୍ଚପଦସ୍ଥ ଅଧିକାରୀ ଓ ପ୍ରଶାସନ ନିକଟରେ ଦାବି ଉପସ୍ଥାପନ କରିଆସୁଥିଲେ। ମାତ୍ର ଏଥିପ୍ରତି କେହି କର୍ଣ୍ଣପାତ କରୁ ନ ଥିବା ଅଭିଯୋଗ ହୋଇଥିଲା। ରାଜପଥ କର୍ତ୍ତୃପକ୍ଷଙ୍କ ଏହି ବୈମାତୃକ ମନୋଭାବ ବିରୋଧରେ ଚରମ୍ପାବାସୀ ଆନ୍ଦୋଳନକୁ ଓହ୍ଲାଇବାକୁ ନିଷ୍ପତ୍ତି ନେଇଥିଲେ। ଏହି କ୍ରମରେ ଗତ ଫେବୃୟାରୀରେ ଚରମ୍ପାରେ ଏକ ଖୋଲାମଞ୍ଚ ବୈଠକ ହୋଇଥିଲା। ସେହିମାସ ୧୯ ତାରିଖରେ ଜାତୀୟ ରାଜପଥ ଅବରୋଧ ପାଇଁ ଚେତାବନୀ ଦିଆଯାଇଥିଲା। ତେବେ ଫେବୃୟାରୀ ୧୮ ରେ ଜିଲା ପ୍ରଶାସନର ମଧ୍ୟସ୍ଥତାରେ ଜାତୀୟ ରାଜପଥ କର୍ତ୍ତୃପକ୍ଷ ଓ ଚରମ୍ପା ରାଜପଥ ସମ୍ପ୍ରସାରଣ କମିଟି ମଧ୍ୟରେ ଆଲୋଚନା କରାଯାଇଥିଲା। ସେତେବେଳେ ଚରମ୍ପାବାସୀଙ୍କ ଦାବି ପୂରଣ ହେବ ବୋଲି ପ୍ରତିଶ୍ରୁତି ମିଳିଥିଲା।