ନୂଆଦିଲ୍ଲୀ, ୧୯।୨- ଭାରତୀୟ ବ୍ୟାଟିଂ କିମ୍ବଦନ୍ତୀ ରାହୁଲ ଡ୍ରାଭିଡ୍ଙ୍କ ପୁଅ ସମିତ୍ ଏବେ ଚର୍ଚ୍ଚାର କେନ୍ଦ୍ରବିନ୍ଦୁରେ ରହିଛନ୍ତି। ଦୁଇମାସ ବ୍ୟବଧାନରେ ୨ଟି ଦ୍ୱିଶତକ ହାସଲ କରି ଖବରର ଶିରୋନାମାରେ ରହିଛନ୍ତି। ବେଙ୍ଗାଲୁରୁରେ ଚାଲିଥିବା ୧୪ ବର୍ଷରୁ କମ୍ ବିଟିଆର୍ ସିଲ୍ଡ ସ୍କୁଲ କ୍ରିକେଟ୍ ପ୍ରତିଯୋଗିତାରେ ସମିତ୍ ମାଲ୍ୟା ଆଦିତି ଇଣ୍ଟରନ୍ୟାଶନାଲ (ଏମ୍ଏଆଇ) ସ୍କୁଲ ପକ୍ଷରୁ ପ୍ରତିନିଧିତ୍ୱ କରି ଏହି ସଫଳତା ପାଇଛନ୍ତି। ରାହୁଲ ଜଣେ ରକ୍ଷଣାତ୍ମକ ବ୍ୟାଟ୍ସମ୍ୟାନ ଭାବେ ବିଶ୍ୱରେ ବେଶ୍ ପରିଚୟ ସୃଷ୍ଟି କରିଥିବାବେଳେ ଏହାର ବିପରୀତ ଖେଳ ସମିତ୍ଙ୍କ ନିକଟରେ ଦେଖିବାକୁ ମିଳିଛି। ବିଜିଏସ୍ ନ୍ୟାଶନାଲ ପବ୍ଲିକ ସ୍କୁଲ ବିପକ୍ଷ ଏକ ମ୍ୟାଚ୍ରେ ଡାହାଣହାତୀ ସମିତ ମାତ୍ର ୧୪୪ ବଲରୁ ୨୧୧ ରନର ମାରାଥନ ଇନିଂସ ଖେଳିଥିଲେ। ଯେଉଁଥିରେ ୨୬ ଚୌକା ଓ ଗୋଟିଏ ଛକା ରହିଥିଲା। ସମିତ୍ଙ୍କ ଏହି ବିସ୍ଫୋରକ ଇନିସ ଯୋଗୁ ତାଙ୍କ ସ୍କୁଲ ୫୦ ଓଭରରେ ୩ ଉଇକେଟ୍ ହରାଇ ୩୮୬ ରନ କରିଥିଲା। ଜବାବରେ ପ୍ରତିପକ୍ଷ ସ୍କୁଲ ୩ ଉଇକେଟ୍ରେ ୨୫୪ ରନ କରିବାକୁ ସମର୍ଥ ହୋଇଥିଲା। ଫଳରେ ସମିତ୍ଙ୍କ ଏମ୍ଏଆଇ ସ୍କୁଲ ୧୩୨ ରନରେ ବିଜୟୀ ହୋଇଥିଲା। ଏଥିପୂର୍ବରୁ ଗତ ଡିସେମ୍ବରରେ ସମିତ୍ ଏକ ଇଣ୍ଟରଜୋନାଲ ଟୁର୍ନାମେଣ୍ଟରେ ୨୦୧ ରନର ଇନିଂସ ଖେଳିଥିଲେ। ସମିତ୍ଙ୍କ ପ୍ରତିଭା କେବଳ ବ୍ୟାଟିଂରେ ସମୀତ ରହିନାହିଁ। ବୋଲିଂରେ ମଧ୍ୟ ସମିତ୍ ବେଶ୍ ସଫଳ ହୋଇଛନ୍ତି। ସେ ୫ ମ୍ୟାଚ୍ରୁ ୭ ଉଇକେଟ୍ ମଧ୍ୟ ନେଇଛନ୍ତି। ପ୍ରକାଶଯୋଗ୍ୟ, ୨୦୧୫ରେ ଏକ ସ୍କୁଲ କ୍ରିକେଟ୍ ପ୍ରତିଯୋଗିତାରେ ୩ଟି ଅର୍ଦ୍ଧଶତକୀୟ ଇନିଂସ ଖେଳି ସମିତ୍ ପ୍ରଥମେ ଚର୍ଚ୍ଚାର ପରିଧିକୁ ଆସିଥିଲେ। ରାହୁଲ ତାଙ୍କ ୧୬ ବର୍ଷର ସ୍ମରଣୀୟ କ୍ରିକେଟ୍ କ୍ୟାରିୟରରେ ଟେଷ୍ଟରେ ୧୩,୨୮୮ ଓ ଦିନିକିଆରେ ୧୦,୮୮୯ ରନ ସଂଗ୍ରହ କରିଥିଲେ।