ବାଲେଶ୍ୱର ଅଫିସ, ୫।୧୧-ବାଲେଶ୍ୱର ରେଳଷ୍ଟେଶନରେ ମଙ୍ଗଳବାର ପୂର୍ବାହ୍ନରେ ବାରିପଦା-ଭୁବନେଶ୍ୱର ବାଙ୍ଗିରିପୋଷି ଏକ୍ସପ୍ରେସ୍ ପହଞ୍ଚତ୍ବାକୁ ଅଳ୍ପ ସମୟ ଥିବା ବେଳେ ପୂର୍ବରୁ ଗାଡ଼ି ଭିତରେ ଥିବା ଜଣେ ନାବାଳକ ଚଳନ୍ତା ଟ୍ରେନ୍ରୁ ଡେଇଁ ଆତ୍ମହତ୍ୟା କରିବାକୁ ଉଦ୍ୟମ କରିଥିଲେ। ଆର୍ପିଏଫ୍ ଏଏସ୍ଆଇ ସୁନୀଲ କୁମାର ବେହେରା ତାଙ୍କୁ କାବୁ କରିବାରେ ସଫଳ ହୋଇଥିଲେ। ସେ ଚାଇଲ୍ଡ ହେଲ୍ପଲାଇନ୍ର ଜିଲା ମୁଖ୍ୟ ପ୍ରଶାନ୍ତ ରାଉତଙ୍କୁ ଖବର ଦେବା ପରେ ସେମାନେ ନାବାଳକଙ୍କୁ ନେଇ ବାଳାଶ୍ରମରେ ରଖିଥିବା ଜଣାପଡ଼ିଛି।
ବାରିପଦାରୁ ଆସୁଥିବା ବାରିପଦା-ଭୁବନେଶ୍ୱର ବାଙ୍ଗିରିପୋଷି ଏକ୍ସପ୍ରେସ୍ ଟ୍ରେନ୍ରେ ଭଞ୍ଜପୁର ଅଞ୍ଚଳର ଜଣେ ୧୧ ବର୍ଷର ନାବାଳକ ଆସିଥିଲେ। ଟ୍ରେନ୍ ବାଲେଶ୍ୱର ଷ୍ଟେଶନ ପ୍ରବେଶ କରିବାର ଅଳ୍ପ ସମୟ ପୂର୍ବରୁ ଉକ୍ତ ନାବାଳକ ଡେଇଁ ଆତ୍ମହତ୍ୟା କରିବାକୁ ଉଦ୍ୟମ କରୁଥିଲେ। ଠିକ୍ ସମୟରେ ଆର୍ପିଏଫ୍ ଏଏସ୍ଆଇ ବେହେରା ତାଙ୍କୁ ଅଟକାଇ ଦେଇଥିଲେ। ଏହାର କାରଣ ପଚାରିବାରୁ ପିଲାଟି କାନ୍ଦି କାନ୍ଦି କହିଥିଲେ ଯେ, ତାଙ୍କ ମା’ ତାଙ୍କୁ ଗାଳି କରିବା ସହ ମରିଯିବା ପାଇଁ କହିଥିଲେ। ଏଥିପାଇଁ ସେ ଏହି ଟ୍ରେନ୍ ଯୋଗେ ପଳାଇ ଆସି ଆତ୍ମହତ୍ୟା କରିବାକୁ ଉଦ୍ୟମ କରୁଥିବା କହିଛନ୍ତି। ଚାଇଲ୍ଡ ହେଲ୍ପଲାଇନ୍ର ଜିଲା ମୁଖ୍ୟ ରାଉତ ଜିଲା ଶିଶୁ ସୁରକ୍ଷା ଅଧିକାରୀ ଯୁବକ ମାଝି ଏବଂ ଜିଲା ଶିଶୁ ମଙ୍ଗଳ କମିଟିର ଚେୟାରମ୍ୟାନ୍ ଭାଗିରଥି ବାରିକଙ୍କୁ ଅବଗତ କରାଇ ପିଲାଟିକୁ ପୋଲିସ ପାଖରୁ ଆଣି ବାଳାଶ୍ରମରେ ପହଞ୍ଚାଇଛନ୍ତି।