ବିଶାଖାପାଟଣା,୧୯।୧୨- ଭାରତୀୟ ପେସର ମହମ୍ମଦ ଶାମି ନ୍ୟୁଜିଲାଣ୍ଡ ପେସର ଟ୍ରେଣ୍ଟ ବୋଲ୍ଟଙ୍କୁ ଅତିକ୍ରମ କରି ଚଳିତବର୍ଷ ଦିନିକିଆରେ ସର୍ବାଧିକ ଉଇକେଟ ନେଇଥିବା ବୋଲର ହୋଇପାରିଛନ୍ତି। ଏ ବର୍ଷ ୨୦ ମ୍ୟାଚ୍ ଖେଳି ଶାମି ହାତେଇଛନ୍ତି ୪୦ ଉଇକେଟ। ତାଙ୍କ ପଛକୁ ରହିଥିବା ବୋଲ୍ଟ ସମାନ ସଂଖ୍ୟକ ମ୍ୟାଚ୍ରେ ୩୮ ଉଇକେଟ ହାସଲ କରି ଦ୍ୱିତୀୟ ସ୍ଥାନରେ ରହିଛନ୍ତି। ଓ୍ବେଷ୍ଟଇଣ୍ଡିଜ ଅଧିନାୟକ କିରନ ପୋଲାର୍ଡ ୨୯ ବର୍ଷୀୟ ଶାମିଙ୍କ ୪୦ତମ ଶିକାର ପାଲଟି ଥିଲେ। ଉଲ୍ଲେଖଥାଉ କି, ଦ୍ୱିତୀୟ ଦିନିକିଆ ମ୍ୟାଚ୍ରେ ଲୋକେଶ ରାହୁଲ(୧୦୨) ଓ ରୋହିତ ଶର୍ମା(୧୫୯)ଙ୍କ ଓପନିଂ ଭଗୀଦାରି ୨୨୭ ରନ୍ କରିଥିଲା। ଫଳରେ ଭାରତ ୩୮୮ ରନ୍ର ବିଶାଳ ଟାର୍ଗେଟ ଛିଡ଼ା କରିଥିଲା। ପରେ କୁଲଦୀପ ଯାଦବଙ୍କ ହ୍ୟାଟ୍ରିକ ଓ ଅନ୍ୟ ବୋଲରଙ୍କ ଭଲ ପ୍ରଦର୍ଶନ ଯୋଗୁ ଓ୍ବେଷ୍ଟଇଣ୍ଡିଜ ୨୮୦ ରନ୍ରେ ସୀମିତ ରହିଥିଲା।
