ପ୍ୟାରିସ୍, ୧୮।୧୨: ଚଳିତ ବର୍ଷ ପୃଥିବୀର ବିଭିନ୍ନ ଦେଶରେ ମୋଟ ୪୯ ଗଣମାଧ୍ୟମ ପ୍ରତିନିଧିଙ୍କୁ ହତ୍ୟା କରାଯାଇଛି। ଗତ ୧୦ ବର୍ଷ ମଧ୍ୟରେ ଚଳିତ ବର୍ଷ କମ୍ ଗଣମାଧ୍ୟମ ପ୍ରତିନିଧିଙ୍କୁ ହତ୍ୟା କରାଯାଇଛି। ସେଥିମଧ୍ୟରୁ ଲାଟିନ୍ ଆମେରିକାରେ ସର୍ବାଧିକ ୧୪ ଜଣଙ୍କୁ ହତ୍ୟା କରାଯାଇଥିବା ଫ୍ରାନ୍ସ୍ର ରିପୋର୍ଟ ଓ୍ବିଦାଉଟ୍ ବର୍ଡର ପକ୍ଷରୁ ପ୍ରକାଶ ପାଇଛି। ମେକ୍ସିକୋରେ ୧୦ ଜଣଙ୍କୁ ହତ୍ୟା କରାଯାଇଛି। ସେହିପରି ଚଳିତ ବର୍ଷ ୩୮୯ ଗଣମାଧ୍ୟମ ପ୍ରତିନିଧିଙ୍କୁ ଗିରଫ କରାଯାଇଛି। ସେଥିମଧ୍ୟରୁ ଚାଇନା,ଇଜିପ୍ଟ ଏବଂ ସୌଦିରେ ଅଧାରୁ ଅଧିକ ଗଣମାଧ୍ୟମ ପ୍ରତିନିଧି ଗିରଫ ହୋଇଛନ୍ତି। ଅପରପକ୍ଷରେ ୫୭ଜଣଙ୍କୁ ବନ୍ଦୀ କରାଯାଇଥିବା ଏହି ରିପୋର୍ଟରେ ଦର୍ଶାଯାଇଛି। ବନ୍ଦୀ ଗଣମାଧ୍ୟମ ପ୍ରତିନିଧିଙ୍କ ମଧ୍ୟରୁ ସିରିଆ, ୟେମେନ୍, ଇରାକ୍ ଏବଂ ୟୁକ୍ରେନ୍ରେ ଅଧିକ ବନ୍ଦୀ ହୋଇ ରହିଛନ୍ତି। ଆତଙ୍କବାଦୀ ପ୍ରବଣ ଅଞ୍ଚଳରେ ଅଧିକ ହତ୍ୟା ଘଟଣା ଘଟିଛି। ଶାନ୍ତ କୁହାଯାଉଥିବା ଦେଶରେ ମଧ୍ୟ ଏଭଳି ଘଟଣା ଘଟୁଛି। ଫଳରେ ଗଣମାଧ୍ୟମ ପ୍ରତିନିଧି ନିଜକୁ ଏବେ ସୁରକ୍ଷିତ ମଣୁ ନାହାନ୍ତି। ସୂଚନାଯୋଗ୍ୟ, ଗତ ୨୦ ବର୍ଷ ଧରି ପ୍ରତିବର୍ଷ ହାରାହାରି ୮୦ ପାଖାପାଖି ଗଣମାଧ୍ୟମ ପ୍ରତିନିଧିଙ୍କୁ ହତ୍ୟା କରାଯାଉଥିବା ଏହି ରିପୋର୍ଟରେ ଦର୍ଶାଯାଇଛି।
