ଭବାନୀପାଟଣା,୩୧।୧(ଡି.ଏନ୍.ଏ.): କଳାହାଣ୍ଡି ଜିଲା ଗୋଲାମୁଣ୍ଡା ବ୍ଲକ ଚହକା କ୍ଷୁଦ୍ର ଜଳସେଚନ ପ୍ରକଳ୍ପ ରାଜ୍ୟସ୍ତରରେ ପୁରସ୍କୃତ ହୋଇଛି। ଜାନୁୟାରୀ ୧୬ ରୁ ୩୦ ତାରିଖ ପର୍ଯ୍ୟନ୍ତ ଆୟୋଜିତ ପାଣି ପଞ୍ଚାୟତ ପକ୍ଷ ପାଳନ ଅବସରରେ ରାଜ୍ୟ ଜଳ ସମ୍ପଦ ବିଭାଗ ପକ୍ଷରୁ ଚହକା କ୍ଷୁଦ୍ର ଜଳସେଚନ ପ୍ରକଳ୍ପକୁ ସେଚ କ୍ଷେତ୍ରରେ ଉତ୍ତମ ଜଳ ପରିଚାଳନା, କେନାଲର ରକ୍ଷଣାବେକ୍ଷଣ ଓ ପାଣି ପଞ୍ଚାୟତଗୁଡ଼ିକର ସାମଗ୍ରିକ ଦାୟିତ୍ୱ ନିର୍ବାହ କ୍ଷେତ୍ରରେ ସଫଳତା ପାଇଁ ଏହି ପୁରସ୍କାର ଦିଆଯାଇଛି। ଏ ନେଇ କ୍ଷୁଦ୍ର ଜଳସେଚନ ଅନ୍ତର୍ଗତ ପ୍ରକଳ୍ପ ଗୁଡ଼ିକରେ ରାଜ୍ୟସ୍ତରରେ ଏହା ତୃତୀୟ ସ୍ଥାନ ଅଧିକାର କରିଥିବାରୁ ଶ୍ରେଷ୍ଠ ପ୍ରକଳ୍ପ ପୁରସ୍କାର ପ୍ରଦାନ କରାଯାଇଛି। ରାଜ୍ୟ ଜଳସମ୍ପଦ ଓ ସୂଚନା ଲୋକସମ୍ପର୍କ ବିଭାଗ ମନ୍ତ୍ରୀ ରଘୁନନ୍ଦନ ଦାସ ଏହି ପୁରସ୍କାର ଭୁବନେଶ୍ୱରରେ ଆୟୋଜିତ ସ୍ବତନ୍ତ୍ର କାର୍ଯ୍ୟକ୍ରମରେ ଜିଲା ଧର୍ମଗଡ କ୍ଷୁଦ୍ର ଜଳସେଚନ ବିଭାଗ ଏସ୍ଡିଓ ଧୀରେନ୍ଦ୍ର କୁମାର ନାଏକଙ୍କୁ ପ୍ରଦାନ କରିଛନ୍ତି।