ନୂଆଦିଲ୍ଲୀ,୭।୬: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ଙ୍କୁ ବେଖାତିର କରି ତାଙ୍କ ପୋଷ୍ଟକୁ ହଟାଇ ଦେଉଥିବା ଟୁଇଟର ଚାଇନାକୁ ଡରିଯାଇଛି। ଏହି ସୋସିଆଲ ନେଟଓ୍ବାର୍କିଂ ସାଇଟ ବେଜିଂକୁ ସୁହାଇଲା ଭଳି କାମ କରୁଛି। ଦୁଗ୍ଧଜାତ ସାମଗ୍ରୀ ଉତ୍ପାଦନକାରୀ ପ୍ରମୁଖ କମ୍ପାନୀ ଅମୁଲର ଏକ ସଦ୍ୟ ଟୁଇଟକୁ ହଟାଇ ଦେବା ପରେ ଏହାର ଚାଇନା ପ୍ରୀତି ପଦାରେ ପଡିଛି।
ଲଦାଖ ସୀମାରେ ଉତ୍ତେଜନା ସୃଷ୍ଟି କରୁଥିବା ଚାଇନା ବିରୋଧରେ ଭାରତୀୟଙ୍କ ମଧ୍ୟରେ ଅସନ୍ତୋଷ ବଢ଼ିବାରେ ଲାଗିଛି। ଏହି ଦେଶର ସାମଗ୍ରୀଗୁଡିକୁ ବର୍ଜନ କରିବା ପାଇଁ ଭାରତରେ ଅଭିଯାନ ଆରମ୍ଭ ହୋଇଛି। ଏଭଳି ସ୍ଥିତିରେ ଅମୁଲ ନିଜ ଅଫିସିଆଲ ଟୁଇଟର ଆକାଉଣ୍ଟରେ ‘ଏକ୍ଜିଟ ଦି ଡ୍ରାଗନ’ ନାମରେ ଏକ ଟେମ୍ପଲେଟ ପୋଷ୍ଟକରି କମେଣ୍ଟ କରିଥିଲା। ଏହାପରେ ଟୁଇଟର ଅମୁଲ ଆକାଉଣ୍ଟକୁ ଗୁରୁବାର ରାତିରେ ହଟାଇ ଦେଇଥିବା ଦେଖାଯାଇଥିଲା। ପରବର୍ତ୍ତୀ ସମୟରେ ହଟାଯାଇଥିବା ଆକାଉଣ୍ଟକୁ ପୁଣି ଥରେ ଆକ୍ଟିଭ କରାଯାଇଥିଲା। ଉକ୍ତ ପୋଷ୍ଟରେ ଅମୁଲ ଗାର୍ଲ ଡ୍ରାଗନ ସହ ଲଢ଼େଇ କରୁଥିବା ଦର୍ଶାଯାଇଛି। ଡ୍ରାଗନ ପାର୍ଶ୍ୱରେ ଚାଇନାର ଭିଡିଓ ଶେୟାରିଂ ପ୍ଲାଟ୍ଫର୍ମ ଟିକ୍ଟକ୍ ରହିଛି।
ସ୍ଥାନୀୟ ଏବଂ ବିଶ୍ୱସ୍ତରର କୌଣସି ପ୍ରସଙ୍ଗ ଉପରେ ଅମୁଲ ଏଭଳି ସୃଜନାତ୍ମକ ଟେମ୍ପଲେଟ ୧୯୬୬ ପରଠାରୁ ପ୍ରସ୍ତୁତ କରିଥାଏ। ଦୀର୍ଘ ବର୍ଷ ଧରି ଏଭଳି ହୋଇଆସିଛି। ଏଥିଲାଗି ଘରେ ଘରେ ଅମୁଲର ଲୋକପ୍ରିୟତା ମଧ୍ୟ ରହିଛି। ନିକଟରେ ଅମୁଲ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ‘ଆତ୍ମନିର୍ଭର ଭାରତ’ ସହ ସ୍ଥାନୀୟ ସାମଗ୍ରୀକୁ ଫୋକସ କରିଥିବାବେଳେ ଚାଇନା ପ୍ରଡକ୍ଟ ବିରୋଧରେ ଏଭଳି ପୋଷ୍ଟ କରିଛି। ଟୁଇଟର ଏହାକୁ ହଟାଇବା ପରେ ଅମୁଲ ଉଦ୍ବେଗ ପ୍ରକାଶ କରିଛି। ବିନା କୌଣସି ସୂଚନାରେ ଏହା କରାଯାଇଥିବା କମ୍ପାନୀ ପକ୍ଷରୁ ପ୍ରତିକ୍ରିୟାରେ କୁହାଯାଇଛି। ଟୁଇଟର ଆକାଉଣ୍ଟକୁ ଗୁରୁବାର ମଧ୍ୟରାତିରେ ହଟାଯାଇଥିଲାବେଳେ ଶୁକ୍ରବାର ସକାଳେ ପୁଣି ଥରେ ଆକ୍ଟିଭେଟ କରାଯାଇଥିଲା। ଟୁଇଟରର ଏଭଳି କାର୍ଯ୍ୟ ଦ୍ୱାରା ଶେୟାର କରାଯାଇଥିବା ‘ଏକ୍ଜିଟ ଦି ଡ୍ରାଗନ’ ଶୀର୍ଷକ ପୋଷ୍ଟକୁ ଫଲୋଅର ଦେଖିବାକୁ ସକ୍ଷମ ହୋଇ ନ ଥିଲେ। ଟୁଇଟରର ଏଭଳି ବ୍ୟବହାର ନେଇ ଅମୁଲ ମର୍ମାହତ ବୋଲି ଅନ୍ୟ ଏକ ପୋଷ୍ଟରେ ପ୍ରକାଶ କରିଛି।
କାହିଁକି ଆକାଉଣ୍ଟ ହଟାଗଲା ବୋଲି ଅମୁଲ ଟୁଇଟରର ଉତ୍ତର ଲୋଡ଼ିଥିଲା। ଟୁଇଟର ପକ୍ଷରୁ କୁହାଯାଇଛି ଯେ, ଚାଇନା ବିରୋଧୀ ପୋଷ୍ଟକୁ ନେଇ ଏଭଳି କରାଯାଇ ନାହିଁ। ଆକାଉଣ୍ଟର ସୁରକ୍ଷା ଏବଂ ନିରାପତ୍ତାକୁ ଧ୍ୟାନରେ ରଖି ଏହି ପଦକ୍ଷେପ ନିଆଯାଇଛି। ସୂଚନାଯୋଗ୍ୟ, ଅମୁଲ ବିଭିନ୍ନ ପ୍ରସଙ୍ଗ ଉପରେ ଏଭଳି କଳାତ୍ମକ ଢଙ୍ଗରେ ଟପିକାଲ ପ୍ରସ୍ତୁତ କରିଆସୁଛି। ଲୋକଙ୍କ ଜୀବନ ଉପରେ ପ୍ରଭାବ ରହିଥିବା ପ୍ରସଙ୍ଗଗୁଡିକ ସାଧାରଣତଃ ଏଥିରେ ସ୍ଥାନିତ ହୋଇଥାଏ। ବିଗତ ଦିନଗୁଡ଼ିକରେ ରାଷ୍ଟ୍ରପତି ଓ ସାଧାରଣ ନିର୍ବାଚନ, ବ୍ରେକ୍ଜିଟ, କୋଭିଡ୍-୧୯ ମୁକାବିଲା ଲାଗି ଲକ୍ଡାଉନ, ରାମାୟଣ, ମହାଭାରତ ସହ ଜରୁରିକାଳୀନ ପରିସ୍ଥିତିର ଥିମ୍କୁ ନେଇ ମଧ୍ୟ ଅମୁଲ ଏପରି ପୋଷ୍ଟ କରିଥିଲା। ଏଗୁଡିକ ନିରପେକ୍ଷ ଢଙ୍ଗରେ କରାଯାଇଥାଏ। ଲୋକଙ୍କୁ ପ୍ରଭାବିତ କରିବା କିମ୍ବା କୌଣସି ସ୍ବାର୍ଥ ରଖି ଏହା କରାଯାଏ ନାହିଁ ବୋଲି ଅମୁଲ ସ୍ପଷ୍ଟ କରିଛି।