କାଠମାଣ୍ଡୁ,୧୪ା୧୦(ପି.ଟି.): କୌଣସି ଶକ୍ତି ଚାଇନାକୁ ବିଭାଜନ ଉଦ୍ୟମ କଲେ ତାକୁ ଦଳି ଦିଆଯିବ ବୋଲି ରାଷ୍ଟ୍ରପତି ଜି ଜିନ୍ପିଙ୍ଗ୍ ରବିବାର ଚେତାବନୀ ଦେଇଛନ୍ତି।
ଭାରତ ଗସ୍ତ ଶେଷ କରି ଜିନ୍ପିଙ୍ଗ୍ ନେପାଳ ଯାଇଛନ୍ତି। ସେ ସେଠାରେ ନେପାଳର ଶୀର୍ଷ ନେତୃତ୍ୱଙ୍କ ସହ ବିଭିନ୍ନ ଦ୍ୱିପାକ୍ଷିକ ପ୍ରସଙ୍ଗରେ ଆଲୋଚନା କରିଛନ୍ତି। ଏହାସହ ହିମାଳୟ ରେଲଓ୍ବେ ଲାଇନ୍ ପ୍ରତିଷ୍ଠା ସମେତ ଭିତ୍ତିଭୂମି ପ୍ରକଳ୍ପ ନେଇ ୨୦ଟି ଚୁକ୍ତି ସ୍ବାକ୍ଷର କରିଛନ୍ତି। ଏହି ଅବସରରେ ଜିନ୍ପିଙ୍ଗ୍ ନେପାଳ ରାଷ୍ଟ୍ରପତି ବିଦ୍ୟାଦେବୀ ଭଣ୍ଡାରୀଙ୍କୁ ସାକ୍ଷାତ୍ କରି ୫୬ ବିଲିୟନ ନେପାଳୀ ଟଙ୍କାର ସହାୟତା ଘୋଷଣା କରିଛନ୍ତି। ଆସନ୍ତା ଦୁଇବର୍ଷ ମଧ୍ୟରେ ବେଜିଂ ଏହି ସହାୟତା ପ୍ରଦାନ କରିବ। ୨୩ ବର୍ଷ ମଧ୍ୟରେ ଚାଇନାର କୌଣସି ରାଷ୍ଟ୍ରପତି ନେପାଳ ଗସ୍ତ କରିବାରେ ଏହା ପ୍ରଥମ।