ନୂଆଦିଲ୍ଲୀ,୧୩।୪: କରୋନା ଭାଇରସ ପ୍ରଥମେ ଚାଇନାରେ ଆରମ୍ଭ ହୋଇଥିବା ବେଳେ ଏବେ ଏହା ସାରା ବିଶ୍ୱରେ କାୟା ବିସ୍ତାର କରି ସାରିଲାଣି। ଏହାକୁ ନେଇ ଭାରତ ଚିନ୍ତାରେ ଥିବା ବେଳେ ଏଠାରେ ଦିନକୁ ଦିନ ସଂକ୍ରମିତଙ୍କ ସଂଖ୍ୟା ମଧ୍ୟ ବଢିବାରେ ଲାଗିଛି। ତେବେ ଭାରତ ଯେଉଁ କୋଭିଡ-୧୯ କିଟ୍ ଚାଇନାଠାରୁ ମଗାଇଥିଲା ତାହା ଆସନ୍ତା ବୁଧବାର ଅର୍ଥାତ୍ ଏପ୍ରିଲ ୧୫ରେ ଭାରତରେ ପହଞ୍ଚିବ ବୋଲି କହିଛନ୍ତି ଇଣ୍ଡିଆନ କାଉନସିଲ ଅଫ୍ ମେଡିକାଲ ରିସର୍ଚ୍ଚର ସଦସ୍ୟ ରମଣ ଆର୍ ଗଙ୍ଗାଖେଦକର। ଏହି କିଟ୍ ପହଞ୍ଚିବା ପରେ ଭାରତରେ କରୋନା ଟେଷ୍ଟ ଶୀଘ୍ର କରାଯାଇ ପାରିବ ବୋଲି କୁହାଯାଉଛି। କେତେଜଣ ବିଶେଷଜ୍ଞଙ୍କ କହିବା କଥା ହେଲା ଭାରତରେ କରୋନା ଟେଷ୍ଟ ସୁବିଧା ପର୍ଯ୍ୟାପ୍ତ ପରିମାଣରେ ଉବଲବ୍ଧ ନ ଥିବାରୁ ଏଠାରେ ସଂକ୍ରମିତଙ୍କ ଚିହ୍ନଟରେ ବିଳମ୍ବ ହେଉଛି। ହେଲେ କେନ୍ଦ୍ର ସରକାର ଏ କ୍ଷେତ୍ରରେ ଦୃଢ ପଦକ୍ଷେପ ନେଉଥିବା ସୂଚନା ରହିଛି।