ଗୟା,୨୬ା୧୨(ଏଏଫ୍ପି): ତିବ୍ବତ୍ର ବୌଦ୍ଧ ଧର୍ମାବଲମ୍ବୀମାନେ ସତ୍ୟର ଶକ୍ତି ବଳରେ ଚାଇନାର ବନ୍ଧୁକ ଶକ୍ତି ସହ ଲଢ଼େଇ ଜାରି ରଖିତ୍ବା ଲାଗି ପ୍ରତିବଦ୍ଧ ବୋଲି ଧର୍ମଗୁରୁ ଦଲାଇଲାମା କହିଛନ୍ତି। ବିହାରର ବୋଧଗୟାଠାରେ ଥିବା ମହାବୋଧି ମନ୍ଦିରରେ ଉଦ୍ବୋଧନ ଦେଇ ତିବ୍ବତୀୟ ଧର୍ମଗୁରୁ କହିଥିଲେ,ଚାଇନାରେ ବୌଦ୍ଧ ଧର୍ମାବଲମ୍ବୀଙ୍କ ସଂଖ୍ୟା ଯଥେଷ୍ଟ ବୃଦ୍ଧି ପାଇଥିବା ସର୍ଭେରୁ ଜଣାପଡିଛି। ଆମ ପାଖରେ ସତ୍ୟର ଶକ୍ତି ରହିଛି, ଯାହା ବନ୍ଧୁକ ଶକ୍ତିଠାରୁ ଅଧିକ ପ୍ରଭାବଶାଳୀ। ଏହି ଅବସରରେ ଦଲାଇଲାମା ଭାରତର ପୁରାତନ ଶିକ୍ଷା ବ୍ୟବସ୍ଥାର ସ୍ମରଣ କରିବା ସହ ଅହିଂସା, ସହାନୁଭୂତି ଓ ଗଣତନ୍ତ୍ର ଉପରେ ଗୁରୁତ୍ୱାରୋପ କରିଥିଲେ। ମାନସିକ ଶାନ୍ତି ଅତ୍ୟନ୍ତ ଜରୁରୀ। ଏବେ ଧର୍ମକୁ ନେଇ ବିଭିନ୍ନ ଦେଶରେ ହିଂସାକାଣ୍ଡ ଘଟୁଛି। ଏହାକୁ ବନ୍ଦ କରି ମାନବିକତା ମୂଲ୍ୟବୋଧର ପ୍ରସାର ହେବା ଆବଶ୍ୟକ ବୋଲି ଦଲାଇଲାମା କହିଥିଲେ। ଚାଇନାର ପିପିଲ୍ସ ଲିବରେଶନ୍ ଆର୍ମି ଦ୍ୱାରା ଅତ୍ୟାଚାରିତ ହେବା ପରେ ଦଲାଇଲାମା ୧୯୫୯ରେ ଭାରତର ଶରଣ ନେଇଥିଲେ।
