ପ୍ୟାରିସ, ୪ା୬ (ଏଏଫ୍ପି)- ଚାଇନା ଏସିଆନ କପ୍ ୨୦୨୩ର ଆୟୋଜନ କରିବ। ଏସିଆନ ଫୁଟ୍ବଲ କନଫେଡେରେଶନ(ଏଏଫ୍ସି) ମଙ୍ଗଳବାର ସୂଚନା ଦିଆଯାଇଛି। ପ୍ରତି ୪ବର୍ଷ ବ୍ୟବଧାନରେ ହୋଇ ଆସୁଥିବା ଏହି ଟୁର୍ନାମେଣ୍ଟକୁ ଚାଇନା ଦ୍ୱିତୀୟ ଥର ଆୟୋଜନ କରିବ। ଏହା ପୂର୍ବରୁ ଦେଶ ୨୦୦୪ ସଂସ୍କରଣ ଆୟୋଜନ କରିଥିଲା। ସେହିବର୍ଷ ଦେଶ ଫାଇନାଲରେ ଜାପାନଠାରୁ ହାରି ରନର୍ସଅପ୍ ହୋଇଥିଲା। ଟୁର୍ନାମେଣ୍ଟର ଆସନ୍ତା ସଂସ୍କରଣ ଆମେ ସଫଳତାର ସହିତ ଆଲୋଚନା କରିବୁ ବୋଲି ପ୍ୟାରିସଠାରେ ଅନୁଷ୍ଠିତ ଏଏଫ୍ସି ଅସାଧାରଣ କଂଗ୍ରେସରେ ଚାଇନିଜ୍ ଫିଫା କାଉନ୍ସିଲ ସଦସ୍ୟ ଡୁ ଝାଓକାଇ ପ୍ରକାଶ କରିଛନ୍ତି। ଗତମାସରେ ଦକ୍ଷିଣ କୋରିଆ ବିଡ୍ରୁ ଓହରିଯିବା ଦ୍ୱାରା ଚାଇନା ଟୁର୍ନାମେଣ୍ଟ ଆୟୋଜନ ପାଇଁ ଏକମାତ୍ର ପ୍ରାର୍ଥୀ ରହିଥିଲା। ପୂର୍ବରୁ ଥାଇଲାଣ୍ଡ ଓ ଇଣ୍ଡୋନେସିଆ ଏହି ଇଭେଣ୍ଟର ଆୟୋଜନ ପାଇଁ ଆଗ୍ରହ ଦେଖାଇଥିଲେ ମଧ୍ୟ ପରବର୍ତ୍ତୀ କାଳରେ ଓହରିଯାଇଥିଲେ। ଚାଇନା ରାଷ୍ଟ୍ରପତି ଜି ଜିନ୍ପିଙ୍ଗ୍ ହେଉଛନ୍ତି ଜଣେ ଫୁଟ୍ବଲପ୍ରେମୀ। ସେ କହିଛନ୍ତି ତାଙ୍କ ଦେଶ ଭବିଷ୍ୟତରେ ଫୁଟ୍ବଲର ଏକ ପାଓ୍ବାରହାଉସ ହେବାକୁ ଚାହୁଁଛି। ଏହଛଡ଼ା ତାଙ୍କ ଦେଶ ଆହୁରି ମଧ୍ୟ ବିଶ୍ୱକପ୍ ଆୟୋଜନ ଲକ୍ଷ୍ୟ ରଖିଛି। ଫିଫା ର଼୍ୟାଙ୍କିଙ୍ଗରେ ୭୪ତମ ସ୍ଥାନରେ ଥିବା ଚାଇନା ଥରେ ମାତ୍ର ୨୦୦୨ରେ ବିଶ୍ୱକପ୍ ଖେଳିବା ଲାଗି ଯୋଗ୍ୟତା ଅର୍ଜନ କରିଥିଲା। ଚଳିତ ବର୍ଷ ସଂଯୁକ୍ତ ଆରବ ଏମିରେଟ୍ସ(ୟୁଏଇ)ରେ ଅନୁଷ୍ଠିତ ଏସିଆ କପ୍ରେ ପ୍ରଥମ ଥର ୨୪ଟି ଦେଶ ଭାଗ ନେଇଥିଲେ। ଏଥିରେ କାତାର ୩- ୧ ଗୋଲ୍ରେ ଜାପାନ ବିପକ୍ଷ ଫାଇନାଲ ମ୍ୟାଚ ଜିତିଥିଲା।