ମାନିଲା(ଫିଲିପାଇନ୍ସ),୧୨।୫- ଫିଡେ୍ ଚେସ୍ ପକ୍ଷରୁ ଆୟୋଜିତ ସର୍ବପ୍ରଥମ ଅନ୍ଲାଇନ୍ ନେସନ୍ସ କପ୍ ଚେସ୍ ଟୁର୍ନାମେଣ୍ଟରେ ଚାଇନା ଚାମ୍ପିୟନ ହୋଇଛି। ଚାଇନା ଓ ଆମେରିକା ମଧ୍ୟରେ ଅନୁଷ୍ଠିତ ସୁପର ଫାଇନାଲ ୨-୨ ସ୍ଥିତିରେ ଶେଷ ହୋଇଥିଲା। ଫଳରେ ରାଉଣ୍ଡ ରବିନ୍ ଭିତ୍ତିରେ ଚାଇନା ଟାଇଟଲ ହାସଲ କରିଥିଲା। କେବଳ ଗ୍ରାଣ୍ଡମାଷ୍ଟରଙ୍କୁ ନେଇ ୬ଟି ଦେଶ ମଧ୍ୟରେ ୨,୦୦,୦୦୦ ଡଲାର ପୁରସ୍କାର ରାଶି ବିଶିଷ୍ଟ ଏହି ଟୁର୍ନାମେଣ୍ଟ ହୋଇଥିଲା। ଏହାକୁ ବିିିଭିନ୍ନ ଭାଷାଭାଷୀ ପ୍ରାୟ ଏକ ମିଲିଅନରୁ ଉର୍ଦ୍ଧ୍ୱ ଦର୍ଶକ ଉପଭୋଗ କରିଥିଲେ। ତାରକା ଖେଳାଳି ୟୁ ୟାଙ୍ଗୟି (୨୭୩୮ ରେଟିଂ) ଫିଲିପାଇନ୍ସ ଜନ୍ମିତ ଆମେରିକାର ୱେସ୍ଲି ସୋ(୨୭୪୧)ଙ୍କୁ ହରାଇ ଚାଇନାକୁ ମହତ୍ତ୍ୱପୂର୍ଣ୍ଣ ଅଗ୍ରଣୀ କରିଥିଲେ। ଡିଙ୍ଗ୍ ଲିରେନ(୨୮୩୬)-ହିକାରୁ ନାକାମୁରା(୨୮୨୯) ଏବଂ ହୋ ୟିଫାନ(୨୬୨୧)-ଇରିନା କୃଶ(୨୩୯୨) ମ୍ୟାଚ ଡ୍ର ରହିଥିଲା। ଆମେରିକାର ଫାବିଆନୋ କାରୁଆନା(୨୭୭୩) ଚାଇନାର ୱେଇ ୟି(୨୭୫୨)ଙ୍କୁ ହରାଇଥିଲେ ହେଁ କିଛି ଫରକ ପଡ଼ି ନ ଥିଲା।
ଆୟୋଜକ ଅନ୍ତର୍ଜାତୀୟ ଚେସ୍ ଫେଡେରେଶନ ପକ୍ଷରୁ ପ୍ରତି ଦଳକୁ ୨୪,୦୦୦ ଡଲାର ପ୍ରଦାନ କରାଯାଇଛି। ଚାମ୍ପିୟନ ଚାଇନା ଅଧିକ ୨୪,୦୦୦ ଡଲାର ଏବଂ ଆମେରିକା ୧୨,୦୦୦ ଡଲାର ହାସଲ କରିଛି। ୧୦ ରାଉଣ୍ଡ ବିଶିଷ୍ଟ ପ୍ରତିଯୋଗିତାରେ ଚାଇନା ସର୍ବାଧିକ ୨୫.୫, ଆମେରିକା ୨୨ ଓ ୟୁରୋପ ଦଳ ୨୧.୫ ପଏଣ୍ଟ ସହ ପ୍ରଥମ ୩ ସ୍ଥାନ ଅଧିକାର କରିଛି। ଅନ୍ୟ ଦଳଗୁଡ଼ିକ ମଧ୍ୟରେ ରୁଷିଆ ୧୯, ଭାରତ ୧୭.୫ ଓ ଅବଶିଷ୍ଟ ବିଶ୍ୱ ଦଳ ୧୪.୫ ପଏଣ୍ଟ ପାଇ ଶେଷ ୩ ସ୍ଥାନରେ ରହିଛନ୍ତି ।