ନୂଆଦିଲ୍ଲୀ,୧୮।୬: ଚାଇନା ସେନା ଦ୍ୱାରା ଭାରତୀୟ ସୈନିକଙ୍କ ଉପରେ ହୋଇଥିବା ଆକ୍ରମଣକୁ ସର୍ବଭାରତୀୟ ବ୍ୟବସାୟୀ ମହାସଂଘ (ସିଏଆଇଟି) ପକ୍ଷରୁ ନିନ୍ଦା କରାଯାଇଛି। ଚାଇନାର ଏଭଳି ନୀତିକୁ ନେଇ କ୍ରୋଧ ପ୍ରକାଶ କରିବା ସହ ଚାଇନା ସାମଗ୍ରୀକୁ ବର୍ଜନ,ଭାରତୀୟ ସାମଗ୍ରୀକୁ ଉତ୍ସାହିତ କରିବା ଲାଗି ବ୍ୟବସାୟୀ ସଂକଳ୍ପ ନେଇଛନ୍ତି। ଏଥିଲାଗି ସାରା ଦେଶରେ ଚାଲିଥିବା ଅଭିଯାନକୁ ଆହୁରି ଦୃଢ଼ କରାଯିବ ବୋଲି ସଂଘ ପକ୍ଷରୁ ନିଷ୍ପତ୍ତି ନିଆଯାଇଛି। ଚାଇନା କମ୍ପାନୀଗୁଡିକୁ ଦିଆଯାଇଥିବା ସବୁ ଠିକାକୁ ରଦ୍ଦ କରିବା ଲାଗି ସଂଘ ସରକାଙ୍କୁ ନିବେଦନ କରିଛି। ସେହିଭଳି ଭାରତୀୟ ଷ୍ଟାର୍ଟଅପ୍ଗୁଡିକରେ ଚାଇନା କମ୍ପାନୀ କରିଥିବା ନିବେଶ ସଂକ୍ରାନ୍ତ ନିୟମ ଉପରେ କାମ କରିବାକୁ ସରକାରଙ୍କୁ ସଂଘ କହିଛି। ଏଭଳି ବିଭିନ୍ନ ପଦକ୍ଷେପ ଦ୍ୱାରା ଚାଇନାର ବର୍ବରତାପୂର୍ଣ୍ଣ କାର୍ଯ୍ୟକୁ କଡା ଜବାବ ଦେବାକୁ କୁହାଯାଇଛି।
ସଂଘର ରାଷ୍ଟ୍ରୀୟ ଅଧ୍ୟକ୍ଷ ବି.ସି. ଭରତିଆ ଏବଂ ରାଷ୍ଟ୍ରୀୟ ମହାସଚିବ ପ୍ରଭୀନ ଖଣ୍ଡେଲଓ୍ବାଲ କହିଛନ୍ତି ଯେ, ଚାଇନାର ଏଭଳି କାର୍ଯ୍ୟକୁ ଦେଖି ସାରା ଦେଶରେ ବ୍ୟବସାୟୀମାନେ ଚାଇନା ସାମଗ୍ରୀ ବର୍ଜନ କରିବା ସଂକଳ୍ପ ନେଇଛନ୍ତି। ଚାଇନାରୁ ହେଉଥିବା ରପ୍ତାନିକୁ ମଧ୍ୟ ଏହାଦ୍ୱାରା ପ୍ରଭାବିତ କରାଯିବ। ଡିସେମ୍ବର ଯାଏ ପ୍ରାୟ ୧ ଲକ୍ଷ କୋଟି ଚାଇନା ରପ୍ତାନି ଉପରେ ପ୍ରଭାବ ପକାଇବାକୁ ସବୁ ପ୍ରକାର ପଦକ୍ଷେପ ନିଆଯିବ। କାରବାର ଚାଇନା ଉପରେ ନିର୍ଭର କରୁଥିଲେ ମଧ୍ୟ ରାଷ୍ଟ୍ରୀୟ ହିତକୁ ଧ୍ୟାନରେ ରଖି ଏହା କରିବାକୁ ସଂଘ ନିଷ୍ପତ୍ତି ନେଇଛି। ଚାଇନା କମ୍ପାନୀଗୁଡିକ କଣ୍ଟ୍ରାକ୍ଟ ପ୍ରଦାନ ନ କରି ଭାରତୀୟ କମ୍ପାନୀଗୁଡିକୁ ପ୍ରାଥମିକତା ଦିଆଯିବାକୁ ସଂଘ ଆହ୍ବାନ କରିଛି। ବଡ ଷ୍ଟାର୍ଟଅପ୍ କମ୍ପାନୀଗୁଡିକରେ ଚାଇନା ପତିଆରା କମାଇବା ଦିଗରେ ସରକାର କାମ କରନ୍ତୁ।
ସଂଘ ପକ୍ଷରୁ କୁହାଯାଇଛି ଯେ, ଭାରତୀୟ ଖୁଚୁରା ବଜାରକୁ କବ୍ଜା କରିବା ଲାଗି ଚାଇନା ସବୁବେଳେ ପ୍ରୟାସ କରି ଆସିଛି। ଏହାକୁ ବ୍ୟବସାୟୀମାନେ ସିଧାସଳଖ ପ୍ରତିରୋଧ କରିବେ। ଚାଇନା ନିବେଶ ଉପରେ ପ୍ରତିବନ୍ଧକ ଲଗାଇବା ଲାଗି ସରକାର ନିୟମ ଆଣିବା ଆବଶ୍ୟକ। ସେହିଭଳି ବଲିଉଡ୍ ଷ୍ଟାରମାନେ ଚାଇନା ବିଜ୍ଞାପନ କରିବା ବନ୍ଦ କରିବାକୁ ସଂଘର ମହାସଚିବ ଖଣ୍ଡେଲଓ୍ବାଲ ନିବେଦନ କରିଛନ୍ତି।