ଜୟପୁର,୨୨।୬: ଗତ କିଛି ଦିନରୁ ଲଦାଖ ଏଲ୍ଏସିରେ ଭାରତ ଓ ଚାଇନା ମଧ୍ୟରେ ସୀମା ବିବାଦ ଲାଗିରହିଛି। ଜୁନ ୧୫ ରାତିରେ ଲଦାଖର ଗଲଓ୍ବାନ ଘାଟିରେ ଭାରତୀୟ ସୈନ୍ୟ ଓ ଚାଇନା ସୈନ୍ୟଙ୍କ ମଧ୍ୟରେ ସଂଘର୍ଷ ଦେଖାଦେଇଥିଲା। ଏହି ସଂଘର୍ଷରେ ଭାରତୀୟ ସେନାର ୨୦ଜଣ ଯବାନ ଶହୀଦ ହୋଇଥିଲେ। ନିଜ ଯବାନଙ୍କୁ ହରାଇବା ପରେ ଦେଶରେ ଚାଇନା ପ୍ରତି କ୍ରୋଧଭାବ ବୃଦ୍ଧି ପାଇବାରେ ଲାଗିଛି। ବିଭିନ୍ନ ସ୍ଥାନରେ ଚାଇନା ବିରୋଧରେ ବିକ୍ଷୋଭ ପ୍ରଦର୍ଶନ କରାଯିବା ସହ ଚାଇନା ସମାଗ୍ରୀକୁ ବହିଷ୍କାର କରିବା ଲାଗି ଦାବି କରାଯାଉଛି। ଇତିମଧ୍ୟରେ ଜୟପୁରରେ ବ୍ୟବସାୟୀମାନେ ଚାଇନା ସାମଗ୍ରୀକୁ ବହିଷ୍କାର କରିବେ ବୋଲି ନିଷ୍ପତ୍ତି ନେଇଛନ୍ତି। ଏଥିପାଇଁ ପ୍ରତ୍ୟେକ ଦୋକାନରେ #ବୟକଟ୍ଚାଇନାର ଏକ ପୋଷ୍ଟର ଲଗାଯାଇଥିବା ଦେଖିବାକୁ ମିଳିଛି। ସୂଚନା ମୁତାବକ ଜୟପୁର ବ୍ୟବସାୟୀ ସଂଘ ସୋମବାର ରାଜାପାର୍କରେ ଥିବା ଦୋକାନଗୁଡ଼ିକରେ ୧୫ହଜାର ପୋଷ୍ଟର ଲଗାଇ ଏହାର ଆରମ୍ଭ କରିଛନ୍ତି। ଯେଉଁ ଗ୍ରାହକ ମୋବାଇଲ୍ କିଣିବା ପାଇଁ ଆସିବେ ସେମାନଙ୍କୁ ଚାଇନା ମୋବାଇଲ୍ ବଦଳରେ ସାମସଙ୍ଗ୍ ଓ ନୋକିଆ ଫୋନ କିଣିବାକୁ ପରାମର୍ଶ ଦିଆଯିବ। ଏଭଳି ଲୋକଙ୍କ ମନରେ ଚାଇନା ସାମଗ୍ରୀ ବିରୋଧରେ ସଚେତନତା ସୃଷ୍ଟି କରାଯିବ ବୋଲି ସଂଘ ପକ୍ଷରୁ କୁହାଯାଇଛି। ତେବେ ଦେଶପାଇଁ କ୍ଷତି ସହିବାକୁ ବ୍ୟବସାୟୀ ପ୍ରସ୍ତୁତ ଅଛନ୍ତି ବୋଲି ଜୟପୁର ବ୍ୟବସାୟୀ ସଂଘର ଅଧ୍ୟକ୍ଷ କହିଛନ୍ତି।