ଭଦ୍ରକ ଅଫିସ, ୨୫।୭ – ଭଦ୍ରକ ଜିଲା ବାସୁଦେବପୁର ବ୍ଲକ ବଂଶୀପାଟଣାସ୍ଥିତ ଏକ ସଂସ୍କୃତ ମହାବିଦ୍ୟାଳୟରେ ନିଯୁକ୍ତି କରାଇଦେବା ନାଁରେ ୮୪ ଲକ୍ଷ ଟଙ୍କା ଠକେଇ ହୋଇଥିବା ନେଇ ଗୁରୁବାର ଏସ୍ପିଙ୍କ ନିକଟରେ ଅଭିଯୋଗ ହୋଇଛି। ନିଯୁକ୍ତି ଆଶାୟୀ ଯୁବତୀ ଯୁବକ ଓ ମହିଳା ଏସ୍ପିଙ୍କ କାର୍ଯ୍ୟାଳୟକୁ ଯାଇ ଏ ନେଇ ଅଭିଯୋଗ କରିଛନ୍ତି। ଉକ୍ତ ମହାବିଦ୍ୟାଳୟରେ କିରାଣି ଓ ପିଅନ ପଦବୀରେ ନିଯୁକ୍ତ କରାଇଦେବାକୁ କହି ବାସୁଦେବପୁରର ୨୮ ଜଣଙ୍କଠାରୁ ୩୦ ଲକ୍ଷ, ବାଲେଶ୍ୱର ଓ ମୟୂରଭଞ୍ଜ ଜିଲାର ୪୩ ଜଣଙ୍କଠାରୁ ୫୪ ଲକ୍ଷ ଟଙ୍କା ଠକି ନିଆଯାଇଥିବା ଅଭିଯୋଗପତ୍ରରେ ଉଲ୍ଲେଖ କରାଯାଇଛି। ଏହାପୂର୍ବରୁ ନିଯୁକ୍ତି ଆଶାୟୀ ଯୁବତୀଯୁବକ ବାସୁଦେବପୁର ଥାନାରେ ଲିଖିତ ଅଭିଯୋଗ କରିଥିଲେ। ପୋଲିସ ୨ଟି ମାମଲା(ନଂ.୨୨୯/୧୯ ଓ ୨୩୮/୧୯) ରୁଜୁ କରି ଚୁପ୍ ହୋଇ ବସିଛି। ଏହି ଠକେଇରେ କଲେଜ ପରିଚାଳନା କମିଟିର କେତେକ ବରିଷ୍ଠ କର୍ମକର୍ତ୍ତା ଓ କର୍ତ୍ତୃପକ୍ଷ ସାମିଲ ଥିବାରୁ ସୋମନଙ୍କୁ ପୋଲିସ ଗିରଫ କରୁନାହିଁ ବୋଲି ଅଭିଯୋଗ ହୋଇଛି। ଏହି ନିଯୁକ୍ତି ଆଶାୟୀମାନେ ମାଧ୍ୟମିକ ଶିକ୍ଷା ପରିଷଦ, ଜିଲାପାଳ, ମୁଖ୍ୟମନ୍ତ୍ରୀ, ଉଚ୍ଚ ଶିକ୍ଷାମନ୍ତ୍ରୀ ଓ କ୍ରାଇମବ୍ରାଞ୍ଚ ପକ୍ଷରୁ ତଦନ୍ତ କରାଯାଉ ବୋଲି ଦାବି ଜଣାଇଛନ୍ତି। ଏସ୍ପି ରାଜେଶ ପଣ୍ଡିତ ଆବଶ୍ୟକ ପଦକ୍ଷେପ ନେବେ ବୋଲି ପ୍ରତିଶ୍ରୁତି ଦେଇଛନ୍ତି। ଏ ସମ୍ପର୍କରେ ଉକ୍ତ କଲେଜ ଅଧ୍ୟକ୍ଷ ତଥା ପରିଚାଳନା କମିଟି ସମ୍ପାଦକ ପ୍ରଶାନ୍ତ ପାଢ଼ୀଙ୍କୁ ପଚାରିବାରୁ କଲେଜ ଓ ତାଙ୍କୁ ବଦ୍ନାମ କରିବା ପାଇଁ ଏହା ଏକ ଚକ୍ରାନ୍ତ ବୋଲି କହିଛନ୍ତି।