କେନ୍ଦୁଝର,୨୪ା୬ (ସ୍ବ.ପ୍ର.)-ଏକ ମାର୍କେଟିଂ ସଂସ୍ଥା ଖୋଲି ବେକାର ଯୁବତୀଯୁବକଙ୍କୁ ଚାକିରି ଦେବା ପ୍ରଲୋଭନ ଦେଖାଇ ଠକିଥିବା ଅଭିଯୋଗରେ କେନ୍ଦୁଝର ଟାଉନ ଥାନା ପୋଲିସ ୪ ଯୁବତୀଙ୍କ ସମେତ ୬ ଜଣଙ୍କୁ ଗିରଫ କରି ରବିବାର କୋର୍ଟଚାଲାଣ କରିଛି। ଏନେଇ ଥାନାରେ ଏକ ମାମଲା ରୁଜୁ ହୋଇଛି।
ପୋଲିସ ସୂଚନା ଅନୁଯାୟୀ କେତେକ ବ୍ୟକ୍ତି ସ୍ଥାନୀୟ ନରଣପୁର ଠାରେ ଗ୍ଲେଜ ଇଣ୍ଡିଆ ନାମକ ଏକ ମାର୍କେଟିଂ ସଂସ୍ଥା ଖୋଲି ଏଥିରେ ସ୍ଥାନୀୟ ଯୁବତୀ ଓ ଯୁବକଙ୍କୁ ଚାକିରି କରାଇଦେବାକୁ କହି ସେମାନଙ୍କଠାରୁ ମୋଟା ଅଙ୍କରେ ଟଙ୍କା ଆଦାୟ କରିଥିଲେ। ପରେ ଏହି ସଂସ୍ଥା ପକ୍ଷରୁ ନିଯୁକ୍ତି ଦିଆ ନ ଯିବାରୁ ଟଙ୍କା ଦେଇଥିବା ଯୁବତୀଯୁବକ ଠକେଇର ଶିକାର ହୋଇଥିବା ଜାଣି ଟାଉନ ଥାନାରେ ଅଭିଯୋଗ କରିଥିଲେ। ପୋଲିସ ଏକ ମାମଲା ରୁଜୁ କରି ତଦନ୍ତ କରିବାପରେ ୬ ଜଣଙ୍କୁ ଗିରଫ କରିଛି। ଚଢାଉବେଳେ ଏହି ସଂସ୍ଥାରୁ ବହୁ ଲାପଟପ, ରସିଦ ବହି, ଓ ବହୁ ନଥିପତ୍ର ପୋଲିସ ଜବତ କରିଛି। ଗିରଫ ଅଭିଯୁକ୍ତମାନେ ହେଲେ କିଶୋର କୁମାର ସାମଲ, ଅମିତ କୁମାର ସାମଲ, ନନ୍ଦିନୀ ସ୍ବାଇଁ, ଅନୁସୂୟା ମହାନ୍ତ ସୀମା ସାହୁ ଓ ବର୍ଷାରାଣୀ ପ୍ରଧାନ। ସମସ୍ତେ ଜିଲା ବାହାର ଅଞ୍ଚଳର ଲୋକ ହୋଇଥିବାରୁ ଏହା ପଛରେ ଅନ୍ୟ କାହାରି ସମ୍ପୃକ୍ତି ରହିଥିବା ନେଇ ପୋଲିସ ସନ୍ଦେହ କରି ପୋଲିସ ଅଧିକ ତଦନ୍ତ ଜାରି ରଖିଛି ା ଗିରଫ ଅଭିଯୁକ୍ତଙ୍କୁ ଡାକ୍ତରୀ ମାଇନା ପରେ କୋର୍ଟ ଚାଲାଣ କରାଯାଇଥିବା ଟାଉନ ଥାନା ଅଧିକାରୀ ସୋମନାଥ ଜେନା ସୂଚନା ଦେଇଛନ୍ତି।