କଟିହାର,୧୪ା୧୧(ପି.ଟି.): ପଶ୍ଚିମବଙ୍ଗର ଏକ ହାଟକୁ ଗୋରୁ ବିକିବା ପାଇଁ ନେଉଥିବା ଜଣେ ବ୍ୟକ୍ତିଙ୍କୁ ବିହାରର କଟିହାର ଜିଲାରେ କିଛି ଦୁର୍ବୃତ୍ତ ପିଟିପିଟି ମାରିଦେଇଛନ୍ତି। ସୋମବାର ସନ୍ଧ୍ୟାରେ ଏହି ଘଟଣା ଘଟିଛି। ମୃତକଙ୍କ ନାଁ ମହମ୍ମଦ ଜମାଲ ବୋଲି ଜଣାପଡିଛି।
ପୋଲିସ କହିବା ଅନୁଯାୟୀ ଜମାଲ, ତାଙ୍କ ଭାଇ ଓ ଅନ୍ୟ କେତେଜଣ ୧୮ଟି ଗୋରୁ ନେଇ ଆଜମନଗରର କୁର୍ସେଲ ହାଟକୁ ବିକିବା ପାଇଁ ଯାଉଥିଲେ। ଲାଭା ବ୍ରିଜ୍ ନିକଟରେ କିଛି ଲୋକ ସେମାନଙ୍କୁ ଘେରିଯାଇ ଜୋରଜବରଦସ୍ତ ଚାନ୍ଦା ମାଗିଥିଲେ। ଜମାଲ ଟଙ୍କା ଦେବାକୁ ମନା କରିଦେବାରୁ ଦୁର୍ବୃତ୍ତମାନେ ତାଙ୍କୁ ପିଟିଥିଲେ। ଜମାଲଙ୍କ ଅନ୍ୟ ସହଯୋଗୀମାନେ ସେଠାରୁ କୌଣସି ପ୍ରକାର ଖସି ପଳାଇଥିଲେ। ଫଳରେ ଜମାଲଙ୍କର ଘଟଣାସ୍ଥଳରେ ମୃତ୍ୟୁ ହୋଇଥିଲା। ପୋଲିସ ସାଗର ଯାଦବ ଓ ଅନ୍ୟ ଅଭିଯୁକ୍ତମାନଙ୍କ ବିରୋଧରେ ମାମଲା ରୁଜୁ କରିଥିବା କଟିହାର ସଦର ଏସ୍ଡିପିଓ ଅନିଲ କୁମାର କହିନ୍ତି। ଅଭିଯୁକ୍ତମାନଙ୍କୁ ଧରିବା ପାଇଁ ପୋଲିସ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଛି। ଭିଡ଼ହିଂସା ପ୍ରତିବାଦରେ ସ୍ଥାନୀୟ ଲୋକେ କଟିହାର-ଗେରାବାରି ଜାତୀୟ ରାଜପଥ ୩୧କୁ ଅବରୋଧ କରିଥିଲେ। ମୃତକଙ୍କ ପରିବାରକୁ ୨୫ ଲକ୍ଷ ଟଙ୍କା କ୍ଷତିପୂରଣ ଯୋଗାଇଦେବାକୁ ସେମାନେ ଦାବି କରିଛନ୍ତି।
