ଭଞ୍ଜନଗର,୧୧।୮(ଡି.ଏନ.ଏ.)- ବ୍ରହ୍ମପୁର ଭାୟା ଭଞ୍ଜନଗର ସମ୍ବଲପୁର ରେଳ ଲାଇନ ଦାବି ନେଇ ଭଞ୍ଜନଗର ବାର୍ ଆସୋସିଏଶନ କାର୍ଯ୍ୟାଳୟ ପରିସରରେ ଶନିବାର ଏକ ବୈଠକ ହୋଇଯାଇଛି। ବୈଠକରେ ଗଞ୍ଜାମ, କନ୍ଧମାଳ ଓ ବୌଦ୍ଧ ଜିଲାର ବିଭିନ୍ନ ବାର ଆସୋସିଏଶନ କର୍ମକର୍ତ୍ତା ଯୋଗଦେଇ ଆଲୋଚନାରେ ଭାଗ ନେଇଥିଲେ। କନ୍ଧମାଳ ଓ ବୌଦ୍ଧ ଜିଲାବାସୀ ଏ ଯାଏ ରେଳଲାଇନ ଦେଖିନାହାନ୍ତି। ଅନ୍ୟପକ୍ଷରେ ଦେଶ ସ୍ବାଧୀନ ହେବା ପୂର୍ବରୁ ଗଞ୍ଜାମ ଜିଲାରେ ଯେତିକି ରେଳଲାଇନ ଥିଲା ବର୍ତ୍ତମାନ ସେତିକି ଅଛି। କେନ୍ଦ୍ର ସରକାର ରେଳଲାଇନ ସଂପ୍ରସାରଣ ଯୋଜନା କରୁନାହାନ୍ତି। ବିଭିନ୍ନ ସମୟରେ ଏ ନେଇ ଦାବି ଉପସ୍ଥାପନ କରାଯାଉଥିଲେ ମଧ୍ୟ ଗୁରୁତ୍ୱ ଦିଆଯାଉନି। ତେଣୁ ଆନ୍ଦୋଳନକୁ ଜୋରଦାର କରିବା ପାଇଁ ପଦକ୍ଷେପ ନିଆଯିବ। ଦାବି ହାସଲ ପାଇଁ ବିଭିନ୍ନ ସଙ୍ଗଠନକୁ ଏକାଠି କରିବାକୁ ହେବ। ବିଭିନ୍ନ ରାଜନୈତିକ ଦଳ, ନିର୍ବାଚିତ ପ୍ରତିନିଧି, କେନ୍ଦ୍ର ଓ ରାଜ୍ୟ ସରକାରଙ୍କ ଉପରେ ଚାପ ପଡ଼ିଲେ ଯାଇ ଦାବି ପୂରଣ ହୋଇପାରିବ। ତେଣୁ ଆନ୍ଦୋଳନ କରିବା ପାଇଁ ବୈଠକରେ ନିଷ୍ପତ୍ତି ନିଆଯାଇଛି। ବୈଠକରେ ଭଞ୍ଜନଗର ବାର ଆସୋସିଏଶନ ସଭାପତି ଅଭିମନ୍ୟୁ ଗୌଡ଼ ଅଧ୍ୟକ୍ଷତା କରିଥିଲେ। ସମ୍ପାଦକ ଅଶୋକ ଜେନା ବୈଠକର ଉଦ୍ଦେଶ୍ୟ ସମ୍ପର୍କରେ କହିଥିଲେ। ବ୍ରହ୍ମପୁର ବାର ଆସୋସିଏଶନର ପୂର୍ବତନ ସଭାପତି ମୋହନ ସିଂଘାରୀ, ଆସିକା ବାର ଆସୋସିଏଶନର ସଭାପତି ସରୋଜ ତ୍ରିପାଠୀ, ଭାରତ ବିକାଶ ପରିଷଦ ସଭାପତି ସୁରେଶ ପାଣିଗ୍ରାହୀ, ହିଞ୍ଜିଳି ସମ୍ପାଦକ ମାନସ ପାଢ଼ୀ, ଆଇନଜୀବୀ ଏମ୍.ତାଜ୍ ଆଦେନୀ, ଦିବାକର ନାୟକ, ସନ୍ତୋଷ ନାୟକ, ସନ୍ତୋଷ ତ୍ରିପାଠୀ, ସନ୍ତୋଷ ତିଆଡ଼ି, ଦଣ୍ଡପାଣି ସ୍ବାଇଁ, ବିନୟ କୁମାର ରଥ, କବିସୂର୍ଯ୍ୟନଗରର ବି.ଶଙ୍କର ପାତ୍ର, ଜି.ଉଦୟଗିରି ବାର ଆସୋସିଏଶନର ପୂର୍ବତନ ସଭାପତି ବୁଲିୟାନ ନାୟକ, ଦାରିଙ୍ଗିବାଡ଼ିର ଦିଲୀପ ବଳିଆରସିଂ ପ୍ରମୁଖ ଯୋଗଦେଇ ଆଲୋଚନାରେ ଭାଗ ନେଇଥିଲେ।