ଘର ଉତ୍ତରପ୍ରଦେଶ। କିନ୍ତୁ ତାଙ୍କ ପରିଚୟ ରହିଛି ନାଲ୍କୋ ଅଞ୍ଚଳରେ। ଜଣେ ଭଲ ଚାବି କାରିଗର ଭାବେ ବର୍ଷ ବର୍ଷ ଧରି ସେ ଏଠାରେ କାର୍ଯ୍ୟ କରିଆସୁଛନ୍ତି। ତାଙ୍କ ବାପା ମଧ୍ୟ ନାଲ୍କୋ ଅଞ୍ଚଳରେ ରହି ବ୍ୟବସାୟ ଚଳାଇ ଆସୁଥିଲେ। କୌଳିକ ବୃତ୍ତି ହୋଇ ନ ଥିଲେ ବି ବାପା କରିଥିବା ଦୋକାନ ସମ୍ଭାଳୁଛନ୍ତି ଯଶୋବନ୍ତ ସିଂ।
ଅନୁଗୋଳ ସହରରେ ରହୁଥିବା ଯଶୋବନ୍ତଙ୍କ ବୟସ ପ୍ରାୟ ୩୩। ପରିବାର କହିଲେ ସ୍ତ୍ରୀ ଓ ୪ ଝିଅପୁଅ। ୧୦ମ ଶ୍ରେଣୀ ପର୍ଯ୍ୟନ୍ତ ସେ ପଢ଼ିଛନ୍ତି। ତେବେ ଆର୍ଥିକ ଅଭାବ ଓ ପାରିବାରିକ ସମସ୍ୟା ଯୋଗୁ ତାଙ୍କୁ ପାଠରେ ଡୋରି ବାନ୍ଧିବାକୁ ପଡ଼ିଥିଲା। ବାପା ନାଲ୍କୋ ମେନଗେଟ୍ ନିକଟରେ ଦୋକାନ ଦେବା ସହ ଏହି ପେଶାରେ ଥିବାରୁ ଯଶୋବନ୍ତ ମଧ୍ୟ ଉତ୍ତରାଧିକାରୀ ସୂତ୍ରରେ ଉକ୍ତ ବ୍ୟବସାୟକୁ ଆଗକୁ ବଢ଼ାଉଛନ୍ତି। ଉତ୍ତମ ବ୍ୟବହାର ଓ କାରିଗରୀ ଜାଣିଥିବାରୁ ଯଶୋବନ୍ତ ସମସ୍ତଙ୍କ ପ୍ରିୟପାତ୍ର ହୋଇପାରିଛନ୍ତି। ଘର ତାଲା ହେଉ କି ଗାଡ଼ି ଚାବି ହଜିଯିବା, ଏପରି କି ଗଡରେଜ ଚାବି ହଜିଯାଇଥିଲେ ଖବରପାଇ ଘରେ ପହଞ୍ଚି ତାଲା ଖୋଲିଦେଇଥାନ୍ତି ଯଶୋବନ୍ତ। ଦୀର୍ଘବର୍ଷ ହେଲା ସେ ଏହି କାର୍ଯ୍ୟ କରି ଆସିଥିବାରୁ ଚାବି ହଜାଇ ଦେଉଥିବା ବ୍ୟକ୍ତିମାନେ ପ୍ରଥମେ ଯଶୋବନ୍ତଙ୍କୁ ମନେ ପକାନ୍ତି। ନୂଆ ତାଲା ବିକ୍ରି ଠାରୁ ଆରମ୍ଭ କରି ମରାମତି କାର୍ଯ୍ୟ ସେ କରିଥାନ୍ତି। ଏଥିପାଇଁ ଦୈନିକ ସେ ୫ଶହରୁ ୮ ଶହ ପର୍ଯ୍ୟନ୍ତ ରୋଜଗାର କରିପାରିଥାନ୍ତି। ସେଥିରୁ ମିଳୁଥିବା ଲାଭ ଅର୍ଥରେ ତାଙ୍କ ସଂସାର ଠିକ୍ ଠାକ ଚାଲିଥିବା ଯଶୋବନ୍ତ କହିଛନ୍ତି। ପ୍ରତ୍ୟକ ଦିନ ପୂର୍ବାହ୍ନ ୯ଟାରୁ ରାତି ୮ଟା ପର୍ଯ୍ୟନ୍ତ ସେ ଦୋକାନରେ ବେପାର କରୁଥିବା ଯଶୋବନ୍ତ ପ୍ରକାଶ କରିଛନ୍ତି।